അവന്റെ മുഖമൊന്നു കാണട്ടെ സാറേ..
'അവന്റെ മുഖമൊന്നു കാണട്ടെ', ആള്ക്കൂട്ടത്തിനിടയില്നിന്ന് ഇങ്ങനെ ഒരു ആവശ്യമുയര്ന്നപ്പോള് എല്ലാവരും അമ്പരന്നു. ജിഷ വധക്കേസ് പ്രതി അമീറുല് ഇസ്ലാമിനെ കാഞ്ചീപുരത്തെ ശിങ്കടിവാക്കത്തെ താമസ സ്ഥലത്ത് എത്തിച്ചു തെളിവെടു ക്കുമ്പോഴായിരുന്നു സംഭവം. നാട്ടുകാരില് ചിലരാണു പ്രതിയുടെ മുഖത്തെ കറുത്ത തുണി മാറ്റണമെന്ന ആവശ്യവുമായി രംഗത്തെത്തിയത്. 'മുഖംമൂടി മാറ്റണം. അവന്റെ മുഖം കണ്ടാല് ആളെ മനസ്സിലാവും. ഇവിടെയും എന്തെങ്കിലും ഒപ്പിച്ചിട്ടുണ്ടോയെന്ന് അറിയണമല്ലോ?'തെളിവെടുപ്പു കാണാനെത്തിയ ചെറിയ ആള്ക്കൂട്ടത്തിനിടയില്നിന്ന യുവാവ് പറഞ്ഞു.
ഇയാളെ കാര്യങ്ങള് പറഞ്ഞു മനസ്സിലാക്കാന് അവിടെ കൂടിയവര് വളരെ പാടുപെട്ടു. അമീറിനെ തെളിവെടുപ്പിനായി ഇതുവരെ കൊണ്ടുപോയ എല്ലായിടത്തും മുഖം മറച്ചാണെന്നു പൊലീസ് വിശദീകരിച്ചു. ചെന്നൈയില്നിന്ന് 70 കിലോമീറ്റര് മാറി, കാഞ്ചീപുരം ജില്ലയിലുള്ള ചെറു ഗ്രാമമാണു ശിങ്കടിവാക്കം. അമീറിനെ തെളിവെടുപ്പിനായി കൊണ്ടുവരുന്നതറിഞ്ഞു പ്രദേശവാസികള് ഉച്ചയോടെ വട്ടംകൂടിയിരുന്നു.
ഉച്ചയ്ക്കു രണ്ടേകാലിനാണു കേരളത്തില്നിന്നുള്ള അഞ്ചംഗ പൊലീസ് സംഘം അമീറിനെയും കൊണ്ടെത്തിയത്. ഒന്പതു മുറികളുള്ള കെട്ടിടത്തിലെ ഒരു മുറിയില് മറ്റു നാലുപേര്ക്കൊപ്പമാണ് അമീര് താമസിച്ചിരുന്നത് എന്നാണു പറയപ്പെടുന്നത്. ആസ്ബസ്റ്റോസ് ഷീറ്റ് കൊണ്ടാണു മേല്ക്കൂര. ഒരു മുറിയില് അഞ്ചുപേര്ക്കാണു താമസം നല്കിയിരുന്നതെന്നു നാട്ടുകാര് പറയുന്നു. കെട്ടിടത്തിന്റെ ഉടമസ്ഥനുമായി പൊലീസ് ബന്ധപ്പെടാന് ശ്രമിച്ചെങ്കിലും ഇപ്പോള് സ്ഥലത്തില്ലെന്നായിരുന്നു മറുപടി.
ഈ പ്രദേശത്ത് ഏകദേശം രണ്ടായിരത്തോളം അന്യസംസ്ഥാന തൊഴിലാളികള് താമസിക്കുന്നുണ്ടെന്നാണ് ഏകദേശ കണക്ക്. ഇവര്ക്കു താമസിക്കാനായി ഇത്തരത്തിലുള്ള കെട്ടിടങ്ങള് പല സ്ഥലങ്ങളിലും നിര്മിച്ചിട്ടുണ്ട്. ഇവരെയൊക്കെ എങ്ങനെ വിശ്വസിച്ചു താമസിപ്പിക്കുമെന്ന ചോദ്യവുമായാണു ഗ്രാമവാസി പരിമളം മുന്നോട്ടുവന്നത്. താമസിപ്പിക്കുന്നതിനു മുന്പു രേഖകളൊക്കെ വാങ്ങി സൂക്ഷിക്കണമെന്നാണു പറയുന്നത്. പക്ഷേ, പലരും അങ്ങനെയൊന്നുമല്ല ചെയ്യുന്നത്.
പൊലീസും ഇതൊന്നും കാര്യമായി ശ്രദ്ധിക്കാറില്ല. ഇങ്ങനെയുള്ള ഓരോ സംഭവങ്ങളുണ്ടാവുമ്പോഴാണ് ഓരോരുത്തരും ഇതേക്കുറിച്ച് ആലോചിക്കുന്നതുതന്നെ, പരിമളം പറഞ്ഞു. അന്യസംസ്ഥാന തൊഴിലാളികള് ഏറെ താമസിക്കുന്ന സ്ഥലമായിട്ടും അമീറിനെ തെളിവെടുപ്പിനു കൊണ്ടുവന്നപ്പോള് അവരെ ആരെയും അവിടെ കാണാനുണ്ടായിരുന്നില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
