മുതിര്ന്ന അംഗമെന്ന പരിഗണനപോലും കിട്ടുന്നില്ല, അതൃപ്തി രേഖപ്പെടുത്തി വിഎസ് സ്പീക്കര്ക്ക് കത്ത് അയച്ചു
ഭരണപരിഷ്കാര കമ്മീഷന് സെക്രട്ടറിയേറ്റില് ഓഫീസില്ലെന്ന് മുഖ്യമന്ത്രി നിയമസഭയില് വ്യക്തമാക്കിയതിനെ തുടര്ന്ന് അതൃപ്തി രേഖപ്പെടുത്തി വിഎസ് സ്പീക്കര്ക്ക് കത്ത് അയച്ചു. നിയമസഭയില് വിശ്രമിക്കാന് സൗകര്യമില്ല, ക്യാബിനറ്റ് പദവി ഉണ്ടായിട്ടും പ്രത്യേകം മുറിയോ പദവിയോ നല്കുന്നില്ല, മുതിര്ന്ന അംഗമായിട്ടും ആ പരിഗണന കിട്ടുന്നില്ല എന്നിങ്ങനെയുളള പരാതികള് ഉന്നയിച്ചാണ് സ്പീക്കര് ശ്രീരാമകൃഷ്ണന് വിഎസ് കത്ത് കൈമാറിയത്. ഇക്കാര്യങ്ങളൊക്കെ ശ്രദ്ധയില് പെടുത്തിയിട്ടും നടപടികളൊന്നും കൈക്കൊള്ളുന്നില്ലെന്നും കത്തില് വിഎസ് വ്യക്തമാക്കുന്നു.
ഭരണപരിഷ്കാര കമ്മീഷന് അധ്യക്ഷന് വിഎസ് അച്യുതാനന്ദന്റെ ഓഫിസിന് മാറ്റമില്ലെന്ന് ഇന്ന് രാവിലെയാണ് മുഖ്യമന്ത്രി നിയമസഭയില് വ്യക്തമാക്കിയത്. ഭരണപരിഷ്കാര കമ്മീഷന്റെ ഓഫിസ് ഐഎംജിയില് തന്നെ പ്രവര്ത്തിക്കും. കമ്മീഷന് പ്രവര്ത്തനങ്ങള് ആരംഭിച്ചുകഴിഞ്ഞെന്നും ഇതുവരെ പ്രവര്ത്തനച്ചെലവ് കണക്കാക്കിയിട്ടില്ലെന്നും അദ്ദേഹം രേഖാമൂലം സഭയില് മറുപടി നല്കി.
ഇതോടെ സെക്രട്ടറിയേറ്റില് ഓഫിസ് വേണമെന്ന വിഎസിന്റെ ആവശ്യമാണ് മുഖ്യമന്ത്രി തള്ളിയത്. നേരത്തെ ഐഎംജി കെട്ടിടത്തിലാണ് വിഎസിന് ഓഫിസ് അനുവദിച്ചിരുന്നത്. സെക്രട്ടറിയേറ്റിലെ പുതിയ അനക്സ് മന്ദിരത്തില് തനിക്ക് ഓഫിസ് വേണമെന്നും എങ്കിലെ കമ്മീഷന്റെ പ്രവര്ത്തനങ്ങള് സുഗമമായി നടക്കുവെന്നുമായിരുന്നു വിഎസിന്റെ ആവശ്യം.
https://www.facebook.com/Malayalivartha
