മെഡിക്കല്‍ പ്രവേശന പരീക്ഷ: സുപ്രീംകോടതി കേരളത്തിന്റെ വാദം ഇന്ന് കേള്‍ക്കും
മെഡിക്കല്‍ പ്രവേശന പരീക്ഷയുമായി ബന്ധപ്പെട്ട കേരളത്തിന്റെ വാദം സുപ്രീംകോടതി ഇന്ന് കേള്‍ക്കും. ഏകീകൃത കൗണ്‍സിലിംഗ് വേണമെന്ന കേന്ദ്രസര്‍ക്കാര്‍ നിലപാടിനെ സംസ്ഥാന സര്‍ക്കാര്‍ പിന്തുണയ്ക്കും. അമൃത സര്‍വ്വകകലാശാല നടത്തിയ കൗണ്‍സിലിംഗ് റദ്ദാക്കണമെന്ന് കേരളം കഴിഞ്ഞ ദിവസം സുപ്രീംകോടതിയില്‍ ആവശ്യപ്പെട്ടിരുന്നു. നീറ്റ് പരീക്ഷ വിജ്ഞാപന പ്രകാരം ഏകീകൃത കൗണ്‍സിലിംഗാണ് വേണ്ടതെന്നാണ് കേന്ദ്രവും സംസ്ഥാനങ്ങളും കഴിഞ്ഞ ദിവസം സുപ്രിംകോടതിയില്‍ സ്വീകരിച്ച നിലപാട്.
വിദ്യാര്‍ത്ഥികളുടെ ഭാവിയും മെഡിക്കല്‍ വിദ്യാഭ്യാസത്തിന്റെ നിലവാരവും കണക്കിലെടുത്തായിരിക്കണം പ്രവേശന നടപടികള്‍ നടത്തേണ്ടത്. കേരളത്തിലെ ഏക കല്പ്പിത സര്‍വ്വകലാശാലയായ അമൃത സര്‍വ്വകലാശാല നടത്തിയ മെഡിക്കല്‍ കൗണ്‍സിംലിംഗും റദ്ദാക്കണമെന്ന് കേരളം കഴിഞ്ഞ ദിവസം ആവശ്യപ്പെട്ടിരുന്നു. കല്പ്പിത സര്‍വ്വകലാശാലകള്‍ക്ക് സ്വന്തം നിലയില്‍ മെഡിക്കല്‍ കൗണ്‍സിലിംഗ് നടത്താന്‍ അനുമതി നല്‍കിയ മുംബൈ ഹൈക്കോടതി ഉത്തരവിനെതിരെ മഹാരാഷ്ട്ര, കേന്ദ്ര സര്‍ക്കാറുകള്‍ നല്‍കിയ അപ്പീലാണ് സുപ്രീം കോടതി കഴിഞ്ഞ ദിവസം പരിഗണിച്ചത്.
കല്പ്പിത സര്‍വ്വകലാശാലകളുടെ നടപടി യുജിസി ചട്ടത്തിന്റെയും സുപ്രീം കോടതി ഭരണഘടന ബഞ്ച് ഉത്തരവിന്റെയും ലംഘനമാണെന്ന് ഇരുസര്‍ക്കാറുകളും വാദിച്ചു. സ്വന്തം നിലയില്‍ കൗണ്‍സിലിംഗ് നടത്താന്‍ മെഡിക്കല്‍ മാനേജ്‌മെന്റുകള്‍ക്ക് അനുമതി നല്‍കിയ കേരള ഹൈക്കോടതി ഉത്തരവിനെതിരെ കേന്ദ്രസര്‍ക്കാര്‍ നല്‍കിയ അപ്പീലും മഹാരാഷ്ട്രയുടെ ഹര്‍ജിക്കൊപ്പം സുപ്രീംകോടതി പരിഗണിക്കുന്നുണ്ട്. കേസില്‍ കേന്ദ്രത്തിന്റെ നിലപാടിനെ കേരളം പിന്തുണക്കും.
യുജിസി നിയമപ്രകാരം കല്പ്പിത സര്‍വകലാശാലകള്‍ കേന്ദ്രീകൃത കൗണ്‍സിലിന്റെ ഭാഗമാണെന്നും അതിനാല്‍ തന്നെ നീറ്റ് പരീക്ഷയുടെ അടിസ്ഥാനത്തിലുള്ള കേന്ദ്രീകൃത അല്ലോട്ട്‌മെന്റിലൂടെയാണ് ഇവിടങ്ങളിലേക്ക് വിദ്യാര്‍ത്ഥി പ്രവേശനം നടത്തേണ്ടതെന്നും ചൂണ്ടിക്കാട്ടിയാണ് അമൃത സര്‍വ്വകലാശാല നടത്തിയ മെഡിക്കല്‍ കൗണ്‍സിലിംഗ് റദ്ദാക്കണമെന്ന് സര്‍ക്കാര്‍ കഴിഞ്ഞ ദിവസം കോടതിയില്‍ ആവശ്യപ്പെട്ടത്. കല്പ്പിത സര്‍വകലാശാലയായ അമൃത മെഡിക്കല്‍ കോളേജിന് സ്വന്തമായി പരീക്ഷ നടത്താനും പ്രവേശന നടപടികള്‍ നടത്താനും അവകാശമില്ലെന്നും സംസ്ഥാനസര്‍ക്കാര്‍ സുപ്രീംകോടതിയെ അറിയിച്ചു.
https://www.facebook.com/Malayalivartha
