സ്വാശ്രയ കോളെജിലെ ഫീസ് നിരക്ക് ഉയര്‍ത്തിയതുമായി ബന്ധപ്പെട്ട് യൂത്ത് കോണ്‍ഗ്രസ് നടത്തുന്ന നിരാഹാര സമരം എട്ടാംദിവസത്തിലേക്ക് കടക്കവെ വിഷയത്തില്‍ മുഖ്യമന്ത്രി ഇടപെടണമെന്ന് കോണ്‍ഗ്രസ് നേതാവും മുന്‍ മുഖ്യമന്ത്രിയുമായ ഉമ്മന്‍ചാണ്ടി. തന്റെ ഫെയ്‌സ്ബുക്കിലൂടെയാണ് മുഖ്യമന്ത്രിയോട് ഉമ്മന്‍ചാണ്ടിയുടെ അഭ്യര്‍ത്ഥന.
സെക്രട്ടറിയേറ്റിന് മുന്നില്‍ രണ്ടാം ദിവസവും സംഘര്‍ഷം തുടരുകയും പ്രതിപക്ഷം നിയമസഭ ബഹിഷ്‌കരിക്കുകയും ചെയ്ത സാഹചര്യത്തില്‍ തന്നെയാണ് എട്ടുദിവസം പിന്നിട്ട യൂത്ത് കോണ്‍ഗ്രസ് നേതാക്കളുടെ നിരാഹാരം സമരം ഒത്തുതീര്‍പ്പാക്കാനായി ഉമ്മന്‍ചാണ്ടി മുഖ്യമന്ത്രിയോട് അഭ്യര്‍ത്ഥിക്കുന്നതും. ഉമ്മന്‍ചാണ്ടിയുടെ ഫെയ്‌സ്ബുക്ക് പോസ്റ്റില്‍ നിന്നും.
''സ്വാശ്രയ കോളേജ് ഫീസ്, കഴിഞ്ഞ വര്‍ഷങ്ങളെക്കാളും വളരെയധികം ഒറ്റയടിക്ക് വര്‍ധിപ്പിച്ചിരിക്കുകയാണ്. യു ഡി എഫ് സര്‍ക്കാര്‍ അഞ്ച് കൊല്ലം കൊണ്ട് 47,000 രൂപ കൂട്ടിയപ്പോള്‍, എല്‍ഡിഎഫ് സര്‍ക്കാര്‍ എംബിബിഎസ് മെറിറ്റ് സീറ്റില്‍ 65000 രൂപയും മാനേജ്‌മെന്റ് ആന്‍ഡ് മെറിറ്റ് സീറ്റില്‍ 2,50,000 രൂപ വീതം വര്‍ധിപ്പിച്ചിരിക്കുന്നു.സര്‍ക്കാരിന് വ്യക്തമായ നിയന്ത്രണമുള്ള പരിയാരം മെഡിക്കല്‍ കോളേജില്‍ മെറിറ്റ് സീറ്റില്‍ 1,00,000 രൂപയും, മാനേജ്മന്റ് സീറ്റില്‍ 3,50,000 രൂപയും, എന്‍ആര്‍ഐ സീറ്റില്‍ 2,00,000 രൂപയും ഒറ്റയടിക്ക് വര്‍ധിപ്പിച്ചിരിക്കുകയാണ്. വര്‍ധിപ്പിച്ച ഫീസ് കുറയ്ക്കണമെന്ന ആവശ്യം അംഗീകരിക്കാത്ത സര്‍ക്കാരിന്റെ കൂറ് വിദ്യാര്‍ത്ഥികളോടും രക്ഷാകര്‍ത്താക്കളോടുമല്ല, സ്വാശ്രയ സ്വകാര്യ മാനേജ്മന്റ്കളോടാണ് എന്ന് വ്യക്തം.പരിയാരം മെഡിക്കല്‍ കോളേജില്‍ ഫീസ് കുറച്ചാല്‍ സ്വകാര്യ സ്വാശ്രയ കോളേജുകളിലും ഫീസ് കുറയ്ക്കാന്‍ സമ്മര്‍ദ്ദമേറും എന്നത് കൊണ്ടാണ് സര്‍ക്കാരിന്റെ ഈ പിടിവാശി.
സ്വാശ്രയ കോളേജ് പ്രശ്‌നത്തില്‍ സിപിഎം എടുത്ത നിലപാടുകളും എസ് എഫ് ഐയുടെ അക്രമ സമരങ്ങളും തികഞ്ഞ കാപട്യമാണെന്ന് കേരളീയ സമൂഹം തിരിച്ചറിയും. ഫീസ് കുറയ്ക്കുവാന്‍ കഴിഞ്ഞ അഞ്ച് വര്‍ഷം സമരം ചെയ്തവര്‍ അധികാരത്തില്‍ വന്നപ്പോള്‍ വന്‍ ഫീസ് വര്‍ദ്ധനവ് അടിച്ചേല്‍പ്പിക്കുകയും, സര്‍ക്കാരിന് സ്വന്തമായി തീരുമാനം എടുക്കുവാന്‍ അധികാരമുള്ള പരിയാരം മെഡിക്കല്‍ കോളേജില്‍ പോലും ഒരു വിചാരവുമില്ലാതെ വിദ്യാര്‍ത്ഥികളെയും രക്ഷകര്‍ത്താക്കളേയും കബിളിപ്പിക്കുകയുമാണ്.
ഒരുവശത്ത് തത്വദീക്ഷയില്ലാതെ ഫീസ് വര്‍ധിപ്പിച്ച എല്‍ഡിഎഫ് സര്‍ക്കാര്‍ 25,000 രൂപ വാര്‍ഷിക ഫീസില്‍ പഠിക്കുവാന്‍ സമര്‍ഥരായ കുട്ടികള്‍ക്ക് അവസരം ലഭിക്കുന്ന സര്‍ക്കാര്‍ മെഡിക്കല്‍ കോളേജിലെ 250 സീറ്റ് വേണ്ടന്ന് വയ്ക്കുകയും ചെയ്തിരിക്കുന്നു. ഇന്ത്യന്‍ മെഡിക്കല്‍ കൗണ്‍സിലിന്റെ അംഗീകാരം വ്യവസ്ഥകള്‍ക്ക് വിധേയമായി ലഭിക്കുമെന്ന് ഉറപ്പായിട്ടും തിരുവനന്തപുരം 100, ഇടുക്കി 50, പാരിപ്പള്ളി ഇ എസ് ഐ മെഡിക്കല്‍ കോളേജില്‍ 100 സീറ്റ് വീതം നഷ്ട്ടപെടുത്തിയിരിക്കുന്നത് മാപ്പര്‍ഹിക്കാത്ത കുറ്റമാണ്.
മുഖ്യമന്ത്രി അടിയന്തിരമായി ഇടപെട്ട് ഈ പ്രശ്‌നത്തിന് പരിഹാരം കണ്ടെത്തി യൂത്ത് കോണ്‍ഗ്രസ് പ്രസിഡന്റ് ശ്രീ ഡീന്‍ കുര്യാക്കോസിന്റെയും, വൈസ് പ്രസിഡന്റ് ശ്രീ സി.ആര്‍ മഹേഷിന്റേയും എട്ട് ദിവസം പിന്നിട്ട നിരാഹാര സമരം ഒത്തുതീര്‍പ്പാക്കണമെന്ന് അഭ്യര്‍ത്ഥിക്കുന്നു.''