ആടിനെ പട്ടിയാക്കുന്ന ലോകത്താണല്ലോ നമ്മുടെ ജീവിതം. കാര്യം കേള്‍ക്കുന്നതിന് മുമ്പേ ചാടിപ്പുറപ്പെടുന്നവര്‍ അറിയാന്‍ ഏതുകാര്യത്തിനും രണ്ടുവശമുണ്ടാകും. മൂന്നു കുട്ടികളുടെ അമ്മയും 44കാരിയുമായ ആദിവാസി യുവതിയെ പീഡിപ്പിച്ച കേസില്‍ അയല്‍പക്കത്തെ 36 കാരനെതിരേ പരാതി നല്‍കിയിട്ടും നടപടിയില്ല എന്ന വാര്‍ത്ത വലിയ സംഭവമായിരുന്നു. 
സമീപത്തെ വീട്ടിലെ യുവാവുമായുള്ള പ്രണയബന്ധവും ഫോണ്‍ സല്ലാപവും ഭര്‍ത്താവ് കണ്ടുപിടിച്ചപ്പോള്‍ യുവാവിനെതിരേ യുവതി പീഡനത്തിന് പരാതി നല്‍കുകയായിരുന്നു. കഥ മുഴുവന്‍ അറിയാവുന്ന നാട്ടുകാര്‍ യുവതിക്ക് എതിരേ ഒന്നടങ്കം രംഗത്ത്. തിരുവല്ല കോട്ടത്തോട് പാറയില്‍ കോളനിയില്‍ താമസിക്കുന്ന 44 വയസുകാരി വീട്ടമ്മയാണ് 36 വയസുള്ള യുവാവിനെതിരേ പീഡനത്തിന് പരാതി നല്‍കിയത്. മൂന്നു കുട്ടികളുടെ മാതാവായ വീട്ടമ്മ എസ്.ടി പ്രമോട്ടര്‍ കൂടിയാണ്. ആദിവാസി വിഭാഗത്തില്‍പ്പെട്ട തന്നെ പട്ടികജാതിക്കാരനായ യുവാവ് പീഡിപ്പിച്ചെന്നായിരുന്നു പരാതി. കേസെടുക്കാന്‍ വൈകിയതിന്റെ പേരില്‍ പൊലീസിനെയും ഇവര്‍ പ്രതിക്കൂട്ടില്‍ നിര്‍ത്തിയിരുന്നു.
ഒടുവില്‍ യുവാവിനെതിരെ പൊലീസ് ജാമ്യമില്ലാ വകുപ്പു പ്രകാരം കേസെടുത്ത് അന്വേഷണം നടത്തുമ്പോഴാണ് കോളനി നിവാസികളായ 21 കുടുംബങ്ങള്‍ ഒപ്പിട്ട പരാതി യുവതിക്കെതിരേ ഡിവൈ.എസ്പിക്ക് ലഭിച്ചത്. ഇത് പീഡനമല്ലെന്നും കഴിഞ്ഞ നാലുവര്‍ഷത്തോളമായി ഇവര്‍ പ്രണയബദ്ധരാണെന്നും പരാതിയില്‍ പറയുന്നു. യുവാവിനെ ഫോണില്‍ വിളിച്ച് സംസാരിക്കുന്നത് ഇവരുടെ ഭര്‍ത്താവ് മനസിലാക്കുകയും ഇതിന്റെ പേരില്‍ വഴക്കുണ്ടാവുകയും ചെയ്തു. ഇതിനു ശേഷമാണ് പീഡനമാണെന്ന് പറഞ്ഞ് യുവതി പരാതി നല്‍കിയത്.
പീഡിപ്പിച്ചതായി ആരോപിക്കുന്ന യുവാവിന്റെ ഫോണിലേക്ക് യുവതി നിരവധി തവണ വിളിച്ചിരുന്നു. പിന്നീട് യുവാവ് ഫോണെടുക്കാതെ വന്നു. തുടര്‍ന്ന് കുറ്റൂരിലുള്ള ഒരു പെണ്‍കുട്ടിയുടെ ഫോണില്‍ നിന്നും വീട്ടമ്മ യുവാവിനെ വിളിച്ച് സംസാരിച്ചു. ഫോണ്‍ സംഭാഷണം ഈ പെണ്‍കുട്ടി റെക്കോഡ് ചെയ്തിരുന്നു. ഇത് വീട്ടമ്മയുടെ ഭര്‍ത്താവിനെ അറിയിച്ച ശേഷം മൂത്ത മകന്റെ ഫോണിലേക്ക് അയച്ചുകൊടുത്തിരുന്നു. ഇതിനു ശേഷമാണ് പീഡനത്തിന് പരാതി വന്നതെന്നും നാട്ടുകാര്‍ പറയുന്നു. യുവതിയുടെ പരാതി വ്യക്തമായി അന്വേഷിച്ചു മാത്രമേ തുടര്‍ നടപടികള്‍ സ്വീകരിക്കാവൂ എന്നും പരാതിയില്‍ ആവശ്യപ്പെട്ടു.
ഇരുവരുടെയും കോള്‍ലിസ്റ്റുകള്‍ പരിശോധനയ്ക്ക് വിധേയമാക്കണമെന്നും നാട്ടുകാരുടെ മൊഴി കേള്‍ക്കാന്‍ അന്വേഷണ ഉദ്യോഗസ്ഥര്‍ തയാറാകണമെന്നും നാട്ടുകാര്‍ പറയുന്നു. കോളനി നിവാസികളുടെ പരാതി ലഭിച്ചതായും ഇത് സംബന്ധിച്ച് അന്വേഷണം നടത്തുമെന്നും ഡിവൈ.എസ്പി ചന്ദ്രശേഖര പിള്ള പറഞ്ഞു.