ഹോട്ടലില്‍ ഭക്ഷണം കഴിക്കാനെത്തിയവരെ ചിലര്‍ തുറിച്ചുനോക്കിയതിന്റെ പേരില്‍ കൂട്ടത്തല്ല്. തിരുവനന്തപുരം ജില്ലയിലെ ബാലരാമപുരത്താണ് സംഭവം നടന്നത്. സംഘര്‍ഷത്തില്‍ ഹോട്ടലിലെ ഉപകരണങ്ങളെല്ലാം നശിപ്പിച്ചു. മൂന്ന് പേരെ പോലീസ് അറസ്റ്റ് ചെയ്തു. പരിക്കേറ്റ രണ്ടു പേരെ നെയ്യാറ്റിന്‍കര താലൂക്ക് ആശുപത്രിയില്‍ പ്രവേശിപ്പിച്ചു. സംഘര്‍ഷത്തില്‍ പ്രതിഷേധിച്ച് പ്രദേശത്ത് പുലര്‍ച്ചെ ആറു മുതല്‍ വൈകുന്നേരം ആറു വരെ വ്യാപാരി വ്യവസായി ഏകോപന സമിതിയും വ്യാപാരി വ്യവസായി സമിതിയും ഹോട്ടല്‍ റസ്‌റ്റോറന്റ് അസ്സോസിയേഷനും ആഹ്വാനം ചെയ്ത ഹര്‍ത്താല്‍ പുരോഗമിക്കുകയാണ്.

തിങ്കളാഴ്ച രാത്രി 11.30ന് ബാലരാമപുരം-നെയ്യാറ്റിന്‍കര റോഡിലെ എസ്പിആര്‍ ഹോട്ടലിലായിരുന്നു സംഭവമുണ്ടായത്. ഹോട്ടലില്‍ നല്ല തിരക്കായിരുന്നു. സ്ത്രീകളും കുട്ടികളും അടക്കം നിരവധി പേര്‍ ഭക്ഷണം കഴിച്ചു കൊണ്ടിരിക്കെയായിരുന്നു അക്രമം. ഭക്ഷണം കഴിച്ചു കൊണ്ടിരുന്ന പെരിങ്ങമ്മല സ്വദേശികള്‍ തങ്ങളെ തുറിച്ചു നോക്കിയെന്ന കാരണം പറഞ്ഞായിരുന്നു വഴിമുക്ക് സ്വദേശികളായ അഞ്ചംഗ സംഘം ആക്രമിച്ചത്. അടി തുടങ്ങിയതോടെ ഭക്ഷണം കഴിച്ചുകൊണ്ടിരുന്ന സ്ത്രീകളും കുട്ടികളും ഉള്‍പ്പടെയുള്ളവര്‍ കൈകഴുകാന്‍ പോലും നില്‍ക്കാതെ പുറത്തേക്ക് ഓടി. കഴിച്ചു തുടങ്ങിയവരും പകുതി കഴിച്ചവരും പണം കൊടുക്കാന്‍ പോലും നില്‍ക്കാതെ ഓടി രക്ഷപ്പെടുകയായിരുന്നു.

നിരവധി കസേരകളും മേശകളും അക്രമികള്‍ തകര്‍ത്തു. ചുവരിലെ കണ്ണാടിയും എറിഞ്ഞുടച്ചു. ഭക്ഷണ സാധനങ്ങളും വാരിവലിച്ചിട്ട സംഘം വലിയ നഷ്ടമുണ്ടാക്കിയെന്ന് കടയുടമ രാജാറാം പറഞ്ഞു. അക്രമത്തില്‍ തലക്ക് പരിക്കേറ്റ വെങ്ങാനൂര്‍ ചാവടിനട ദര്‍ശനയില്‍ എസ്.സുജിത് (29), പെരിങ്ങമ്മല പുല്ലാനിമുക്ക് സ്വദേശി യു.നിദേഷ് (28) എന്നിവരെ നെയ്യാറ്റിന്‍കര ജനറല്‍ ആശുപത്രിയില്‍ പ്രവേശിപ്പിച്ചു. സംഭവവുമായി ബന്ധപ്പെട്ട് വഴിമുക്ക് സ്വദേശികളായ നിയാസ് (28), അസ്‌റുദ്ദീന്‍ (27) അബ്ദുള്‍ ഹമീദ് (27) എന്നിവരെ ബാലരാമപുരം പോലീസ് അറസ്റ്റ് ചെയ്തു.