പ്രണയം നടിച്ച് വലയിലാക്കുകയും പീഡിപ്പിക്കുകയും ചെയ്തശേഷം യുവതിയെ വിരട്ടി കഞ്ചാവ് കടത്തല്‍ സംഘത്തിലെ കണ്ണിയാക്കിയതായി പരാതി. കോട്ടയം സ്വദേശിനിയായ യുവതിക്കാണ് പീഡനം നേരിട്ടത്.
കരുളായിയിലെ സ്വകാര്യ ആശുപത്രിയില്‍ ജോലിചെയ്തിരുന്ന 22 കാരിയാണ് ക്രൂരമായ പീഡനങ്ങള്‍ക്കിരയായത്. കരുളായി വലപ്പുറം സ്വദേശി യാഷിഖും രണ്ടു സുഹൃത്തുക്കളും ഉള്‍പ്പെടെ മൂന്നു പേരാണ് യുവതിയെ പീഡനത്തിനിരയാക്കിയത്.
യാഷിഖ് പ്രണയം നടിച്ച് വലയിലാക്കുകയായിരുന്നുവെന്നാണ് യുവതി മൊഴി നല്‍കിയിട്ടുള്ളത്. വിദേശത്ത് നഴ്‌സിങ് ജോലിക്ക് വിസ നല്‍കാമെന്നു പറഞ്ഞ് പല തവണയായി 80,000 രൂപയും സ്വന്തമാക്കി. ഗള്‍ഫിലേക്ക് പോകാന്‍ വിമാനത്താവളത്തിലേക്കെന്നു പറഞ്ഞ് കൊണ്ടുപോയി നാടുകാണിയിലെ ഒരുവീട്ടില്‍ വച്ച് പാനീയത്തില്‍ ലഹരിനല്‍കി മയക്കി യാഷിക്കും രണ്ടു കൂട്ടുകാരും ചേര്‍ന്ന് പീഡിപ്പിക്കുകയായിരുന്നു.
പീഡനദൃശ്യം കാമറയില്‍ പകര്‍ത്തിയിരുന്നു. ഇതു പറഞ്ഞ് ഭീഷണിപ്പെടുത്തിയാണ് പിന്നീട് കഞ്ചാവ് കടത്തില്‍ കാരിയറാക്കിയത്. ഇതിനു വിസമ്മതിച്ച യുവതിയെ പലപ്പോഴും ക്രൂരമര്‍ദ്ദനത്തിനിരയാക്കുകയും ചെയ്തു.
ഈ സംഭവം പുറത്തറിഞ്ഞതോടെ ബ്ലോക്ക് പഞ്ചായത്ത് അംഗവും ജനാധിപത്യമഹിളാ അസോസിയേഷന്‍ പ്രവര്‍ത്തകരും യുവതിയുമായി നിലമ്പൂര്‍ സി.ഐ ഓഫീസിലെത്തിയെങ്കിലും പൊലീസുകാര്‍ പരാതി സ്വീകരിക്കാനോ കേസെടുക്കാനോ തയ്യറായില്ല. യുവതിയെ ട്രെയിനില്‍ നാട്ടിലേക്കു കയറ്റിവിടാന്‍ ആവശ്യപ്പെടുകയായിരുന്നു.
യുവതി മഹിളാ അസോസിയേഷന്‍ പ്രവര്‍ത്തകരോട് പീഡനവിവരം തുറന്നു പറഞ്ഞതോടെ അവര്‍ സന്നദ്ധസംഘടനയായ കേരള മഹിളാ സമഖ്യ സൊസൈറ്റിയുമായി ബന്ധപ്പെട്ടു. മഹിളാ സമഖ്യ സൊസൈറ്റി ഇടപെടലില്‍ ഡി.ജി.പിക്കു പരാതി നല്‍കി. ഡി.ജി.പി കേസ് എ.ഡി.ജി.പി ബി.സന്ധ്യയുടെ പരിഗണനക്കുവിട്ടു.