ശശികല എല്ലാക്കളവും മാറ്റിക്കളിക്കുന്നു. ഒപ്പം ജയിച്ചേ തീരൂവെന്ന വാശിയും. അനധികൃത സ്വത്ത് സമ്പാദനക്കേസിലെ സുപ്രീംകോടതി വിധി എതിരായാല്‍ ബദല്‍ പദ്ധതിയുമായി അണ്ണാഡിഎംകെ ജനറല്‍ സെക്രട്ടറി വികെ ശശികല. വിശ്വസ്തനായ പാര്‍ട്ടി എംഎല്‍എ ഇടപ്പടി പളനിസ്വാമിയെ മുഖ്യമന്ത്രി സ്ഥാനത്തേക്ക് നിര്‍ദേശിക്കാനാണ് ശശികലയുടെ തീരുമാനം. സഹോദരനെ മുഖ്യമന്ത്രി ആക്കാനായിരുന്നു ചിന്നമ്മയുടെ ആദ്യനീക്കം. എന്നാല്‍ ഇത് ജനരോഷത്തിന് ഇടയാക്കുമെന്ന് സ്വന്തം ക്യാമ്പില്‍ അഭിപ്രായം ഉയര്‍ന്നതോടെ പളനിസ്വാമിക്ക് നറുക്ക് വീഴുകയായിരുന്നു.
ശശികല മുഖ്യമന്ത്രിയാകുന്നതിനെതിരെ സംസ്ഥാനത്ത് വ്യാപക പ്രതിഷേധമാണ് ഉയരുന്നത്. നവമാധ്യമങ്ങളിലും വിമര്‍ശനം ശക്തമാണ്. മുഖ്യമന്ത്രിയാകാന്‍ ശശികലയ്ക്ക് എന്ത് യോഗ്യതയുണ്ടെന്നാണ് വിമര്‍ശകരുടെ ചോദ്യം. പാര്‍ട്ടിയ്ക്കുള്ളിലോ തെരഞ്ഞെടുപ്പിലോ ചിന്നമ്മ ഇതുവരെ മത്സരിച്ച് ജയിച്ചിട്ടില്ലെന്നും വിമര്‍ശകര്‍ കുറ്റപ്പെടുത്തുന്നു.
അനധികൃത സ്വത്ത് സമ്പാദന കേസില്‍ ശശികല അടക്കമുള്ളവരെ വെറുതെ വിട്ടതിനെതിരെ കര്‍ണാടക സര്‍ക്കാര്‍ സമര്‍പ്പിച്ച ഹര്‍ജിയാണ് സുപ്രീംകോടതിയുടെ പരിഗണനയില്‍ ഉള്ളത്. 63 കോടിയുടെ അനധികൃത സ്വത്ത് സമ്പാദനമാണ് കേസിന് ആധാരം. കര്‍ണാടക ഹൈക്കോടതിയാണ് പ്രതികളെ വെറുതെ വിട്ടിരുന്നത്. അപ്പീലുകളില്‍ ഒരാഴ്ച്ചക്കകം വിധി പറയുമെന്ന് സുപ്രീംകോടതി കുറച്ചു ദിവസം മുമ്പ് അറിയിച്ചിരുന്നു.
മുഖ്യമന്ത്രിയായ ശേഷം ശശികലയെ കോടതി ശിക്ഷിച്ചാല്‍ അവര്‍ രാജിവെയ്‌ക്കേണ്ടി വരും. ഈ സാഹചര്യത്തിലാണ് തനിക്ക് പകരം മുഖ്യമന്ത്രിയാകാന്‍ ശശികല വിശ്വസ്തനെ കണ്ടെത്തിയിരിക്കുന്നത്.
ശശികലയ്ക്ക് തിരിച്ചടി; പിന്തുണയ്ക്കില്ലെന്ന് കോണ്‍ഗ്രസ്
പനീര്‍ശെല്‍വവുമായുള്ള അധികാര വടംവലിയില്‍ ശശികലയെ പിന്തുണയ്ക്കില്ലെന്ന് കോണ്‍ഗ്രസ്. തമിഴ്‌നാടിലെ സ്ഥിതിഗതികള്‍ വിലയിരുത്താന്‍ ചേര്‍ന്ന കോണ്‍ഗ്രസ് ഉന്നതല യോഗത്തിലാണ് തീരുമാനം. നേരത്തെ പിന്തുണ തേടി ശശികല ക്യാമ്പ് കോണ്‍ഗ്രസിനെ സമീപിച്ചിരുന്നു. സഭയില്‍ ഭൂരിപക്ഷം തെളിയിക്കാന്‍ തനിക്ക് കഴിയുമെന്നാണ് വ്യാഴാഴ്ച്ച രാത്രി ഗവര്‍ണറെ കണ്ട ശശികല അവകാശവാദം ഉന്നയിച്ചിരുന്നു.
പനീര്‍ശെല്‍വത്തെ പിന്തുണച്ചും കോണ്‍ഗ്രസ്സിന്റെ പ്രതികരണം വന്നിട്ടുണ്ട്. അധികാരത്തില്‍ തിരിച്ചെത്താന്‍ ഒപിഎസിന് കഴിയുമെന്ന് കോണ്‍ഗ്രസ് നേതാവും തെന്നിന്ത്യന്‍ നടിയുമായ ഖുശ്ബു പ്രതികരിച്ചു. തമിഴ്‌നാടില്‍ രാഷ്ട്രപതി ഭരണം ഏര്‍പ്പെടുത്തിയാല്‍ അത് സംസ്ഥാനത്തിന് നാണക്കേടാണ്. സംസ്ഥാനത്തെ ജനാധിപത്യത്തെ സംരക്ഷിക്കേണ്ടതുണ്ടെന്നും അവര്‍ പറഞ്ഞു.