താനൊരു തെറ്റും ചെയ്തിട്ടില്ല; രാജി വച്ചത് കുറ്റസമ്മതമല്ല, തനിക്കെതിരായ ആരോപണം സമൂഹം ചര്ച്ച ചെയ്യുമ്പോള് ആരോപണവിധേയനായ ആള് മന്ത്രിസ്ഥാനത്ത് തുടരുന്നത് ശരിയല്ലെന്ന് എ.കെ.ശശീന്ദ്രന്
തനിക്കു നേരെ ഉയര്ന്ന ആരോപണത്തിലെ ശരിതെറ്റുകളെക്കാള് രാഷ്ട്രീയ ധാര്മികതയ്ക്കാണ് ഊന്നല് നല്കുന്നതെന്ന് എ.കെ.ശശീന്ദ്രന്. താനൊരു തെറ്റും ചെയ്തിട്ടില്ലെന്നും രാജി വച്ചതിനെ കുറ്റസമ്മതമായി കാണേണ്ടതില്ലെന്നും എന്.സി.പി ദേശീയ നിര്വാഹക സമിതി അംഗം എ.കെ.ശശീന്ദ്രന് പറഞ്ഞു. പരാതിയുമായി തന്നെ സമീപിച്ച ആരോടും ഇതുവരെ മോശമായി സംസാരിക്കുകയോ പെരുമാറുകയോ ചെയ്തിട്ടില്ലെന്നും അദ്ദേഹം വാര്ത്താ സമ്മേളനത്തില് പറഞ്ഞു.
തനിക്കെതിരായ ആരോപണം സമൂഹം ചര്ച്ച ചെയ്യുമ്പോള് ആരോപണവിധേയനായ ആള് മന്ത്രിസ്ഥാനത്ത് തുടരുന്നത് ശരിയല്ല. ആരോപണത്തെ കുറിച്ച് ഏത് ഏജന്സിയെ കൊണ്ട് വേണമെങ്കിലും മുഖ്യമന്ത്രിക്ക് അന്വേഷിപ്പിക്കാം. ഇക്കാര്യം താന് തന്നെ ആവശ്യപ്പെടുമെന്നും ശശീന്ദ്രന് പറഞ്ഞു. പാര്ട്ടി പ്രവര്ത്തകര്ക്ക് എന്നിലുള്ള വിശ്വാസം ഊട്ടിയുറപ്പിക്കണം എന്ന് നിര്ബന്ധമുണ്ട്. എല്.ഡി.എഫ് സര്ക്കാര് രാഷ്ട്രീയ പ്രതിബദ്ധത ഉയര്ത്തിപ്പിടിച്ച് മുന്നോട്ടു കൊണ്ടു പോകുകയാണ്. അപ്പോള് ആരോപണവിധേയനായ താന് മന്ത്രിയായി തുടരുന്നത് ശരിയല്ല. ഓഡിയോ ടേപ്പ് പുറത്ത് വന്നതിന് പിന്നില് ഗൂഢാലോചനയുണ്ടോയെന്ന ചോദ്യത്തിന് ആരെക്കുറിച്ചും പരാതിയില്ലെന്നായിരുന്നു ശശീന്ദ്രന്റെ മറുപടി.
വസ്തുനിഷ്ഠമായി അന്വേഷിക്കണമെന്ന് മുഖ്യമന്ത്രിയോട് ആവശ്യപ്പെടും. അതിലൂടെ നിരപരാധിത്വം തെളിയിക്കാനാകുമെന്നാണ് പ്രതീക്ഷ. എന്റെ പേരില് പാര്ട്ടിയിലെ ഒരു പ്രവര്ത്തകനും തലകുനിച്ച് നില്ക്കേണ്ടി വരില്ല. തിരഞ്ഞെടുപ്പില് മത്സരിക്കുമ്ബോഴും വോട്ടര്മാര്ക്കും ഇതേ വാഗ്ദാനം നല്കിയിരുന്നു. മന്ത്രിപദവിയില് ഇരുന്നുകൊണ്ട് ഒരു അന്വേഷണം സാദ്ധ്യമല്ല. അതിനാലാണ് രാജിവയ്ക്കുന്നത്. പ്രതിപക്ഷ നേതാക്കള് പോലും തനിക്കെതിരെ രൂക്ഷമായി പ്രതികരിച്ചിട്ടില്ല. പക്ഷേ. തന്റെ രാജി കേരളത്തിന് ഒരു മാതൃകയാവണമെന്നും മാദ്ധ്യമ പ്രവര്ത്തകരുടെ പിന്തുണയ്ക്ക് നന്ദിയുണ്ടെന്നും അദ്ദേഹം പറഞ്ഞു.
https://www.facebook.com/Malayalivartha
