ദേവികുളത്ത് കൈയ്യേറ്റം ഒഴിപ്പിക്കാനെത്തിയ സബ് കളക്ടര്‍ ഉള്‍പ്പെടെയുള്ളവരെ സി.പി.എം പ്രവര്‍ത്തകര്‍ തടഞ്ഞ സംഭവത്തില്‍ റവന്യു മന്ത്രി ഇ.ചന്ദ്രശേഖരന്‍ പ്രതിഷേധം രേഖപ്പെടുത്തി. ദേവികുളം ആര്‍.ഡി.ഒ ഓ ഫീസിന് എതിര്‍വശത്തെ എട്ട് സെന്റ് സര്‍ക്കാര്‍ ഭൂമിയാണ് ഹെല്‍ത്ത് ഡിപ്പാര്‍ട്ട്‌മെന്റില്‍ നിന്നും വിരമിച്ച ജീവനക്കാരന്‍ കൈയേറിയത്. ക്വാട്ടേഴ്‌സിന് സമീപത്തെ സര്‍ക്കാര്‍ ഭൂമിയില്‍ ഇയാള്‍ ഷെഡ് നിര്‍മിക്കുകയായിരുന്നു. രാവിലെ സബ് കളക്ടര്‍ ശ്രീറാം വെങ്കിട്ടരാമന്റെ നിര്‍ദേശ പ്രകാരം ഭൂസംരക്ഷണ സേനയിലെ നാല് ജീവനക്കാരാണ് ഒഴിപ്പിക്കാന്‍ എത്തിയത്. ദേവികുളം പഞ്ചായത്തിലെ 12-ാം വാര്‍ഡ് മെമ്പറായ സി.പി.എമ്മിലെ സുരേഷ് കുമാറിന്റെ നേതൃതത്തില്‍ ഇവരെ ആക്രമിക്കുകയായിരുന്നു.

തുടര്‍ന്ന് സംഭവസ്ഥലത്തെത്തിയ സബ് കളക്ടര്‍ ആക്രമികളെ പിടിക്കാന്‍ ആവശ്യപ്പെട്ടെങ്കിലും പരാതി എഴുതി നല്‍കണമെന്ന് പോലീസ് ആവശ്യപ്പെട്ടു. വാര്‍ഡ് മെമ്പറെ പോലീസ് അല്‍പനേരത്തിന് ശേഷം കസ്റ്റഡിയിലെടുത്തു. ഇതോടെ ഒരു സംഘം സബ് കളക്ടറെ തടഞ്ഞുവെക്കുകയും അസഭ്യം പറയുകയും ചെയ്തു. നാട്ടുകരോട് അസഭ്യം പറഞ്ഞ ഉദ്യോഗസ്ഥരെ അറസ്റ്റ് ചെയ്യണമെന്നാവശ്യപ്പെട്ടാണ് ഇവര്‍ കലക്ടറെ തടഞ്ഞുവെച്ചത്. പിന്നീട് സുരേഷ്‌കുമാറിനെ വിട്ടയച്ചാല്‍ സ്വയം ഷെഡ് പൊളിച്ച് ഒഴിഞ്ഞു പോകാമെന്ന് അറിയിച്ചതോടെ ഇയാളെ പൊലീസ് വിട്ടയച്ചു. സ്ഥലത്ത് എം.എല്‍.എ രാജേന്ദ്രന്‍ എത്തിയെങ്കിലും സംഭവത്തില്‍ ഇടപെടാതെ മടങ്ങി.

ഇതിനെത്തുടര്‍ന്ന്, കൈയേറ്റമൊഴിപ്പിക്കാനെത്തിയ റവന്യൂ ഉദ്യോഗസ്ഥരെ തടഞ്ഞവര്‍ക്കെതിരെ നടപടിയെടുക്കാന്‍ ഇടുക്കി ജില്ലാകലക്ടര്‍ നിര്‍ദേശിച്ചു. സര്‍ക്കാര്‍ നടപടി തടസ്സപ്പെടുത്തിയെന്ന കുറ്റത്തിലാണ് നടപടിയുണ്ടാവുകയെന്ന് ജില്ലാ കലക്ടര്‍ അറിയിച്ചു. പ്രതിഷേധക്കാരെ തടയാതിരുന്ന പോലീസുകാര്‍ക്കെതിരെയും നടപടിയുണ്ടാകുമെന്ന് സൂചനയുണ്ട്.

കൈയേറ്റം ഒഴിപ്പിക്കാനെത്തിയ റവന്യു വകുപ്പ് സംഘത്തെ സി.പി.എം പ്രവര്‍ത്തകരുടെ നേതൃത്വത്തിലുള്ള സംഘം തടഞ്ഞതില്‍ റവന്യൂ മന്ത്രി ഇ.ചന്ദ്രശേഖരന്‍ അതൃപ്തി അറിയിച്ചു. ഇന്നുണ്ടായ സംഭവത്തില്‍ സബ് കലക്ടറോട് റിപ്പോര്‍ട്ട് ആവശ്യപ്പെട്ടതായി റവന്യൂമന്ത്രി ഇ.ചന്ദ്രശേഖരന്‍ അറിയിച്ചു. കൈയേറ്റം ഒഴിപ്പിക്കാന്‍ പോലീസ് സഹായവും ആവശ്യപ്പെട്ടിട്ടുണ്ട്.