ജിഷ്ണു കേസ് അന്വേഷണത്തില്‍ സര്‍ക്കാര്‍ വരുത്തിയ വീഴ്ച ചൂണ്ടിക്കാട്ടാന്‍ പ്രതിപക്ഷത്തെ വെല്ലുവിളിച്ച് മുഖ്യമന്ത്രി പിണറായി വിജയന്‍. അന്വേഷണത്തില്‍ വീഴ്ചയുണ്ടായെന്നു പ്രതിപക്ഷ നേതാവ് പോലും പറഞ്ഞിട്ടില്ലെന്നും, വീഴ്ചയുണ്ടെങ്കില്‍ അത് ചൂണ്ടിക്കാട്ടാന്‍ മുന്‍ ആഭ്യന്തരമന്ത്രി കൂടിയായ ചെന്നിത്തല തയ്യാറാകണമെന്നും പിണറായി പറഞ്ഞു.

ജിഷ്ണു കേസില്‍ സര്‍ക്കാരിനു തെറ്റുപറ്റിയിട്ടില്ല. ആഭ്യന്തര വകുപ്പിനു തെറ്റു പറ്റിയിട്ടുണ്ടെങ്കില്‍ തിരുത്തും. തെറ്റില്ലാതെ ആര്‍ക്കുമെതിരെ നടപടിയെടുക്കില്ല. കോണ്‍ഗ്രസിനും ബി.ജെ.പിക്കും വളരെ വേണ്ടപ്പെട്ടവരാണ് സംഭവത്തില്‍ ഉള്‍പ്പെട്ട കോളജിന്റെ മാനേജ്‌മെന്റിലുള്ളതെന്നും പിണറായി വിജയന്‍ ആരോപിച്ചു. ജിഷ്ണുവിന്റെ ആത്മഹത്യ യു.ഡി.എഫ് ഭരണകാലത്ത് ആയിരുന്നെങ്കില്‍, ഈ കോളേജിനെതിരെ ഒരു കേസുപോലും ഉണ്ടാകില്ലായിരുന്നുവെന്നും അദ്ദേഹം പറഞ്ഞു.

സര്‍ക്കാരിനെ അപമാനിക്കുന്ന വക്രബുദ്ധികള്‍ക്കു മുന്നില്‍ മുട്ടുമടക്കില്ലെന്നും മുഖ്യമന്ത്രി പറഞ്ഞു. യു.ഡി.എഫ് ദുഷിപ്പിച്ച ഉദ്യോഗസ്ഥരെ തിരുത്തി നേരെയാക്കാന്‍ സമയമെടുക്കുമെന്നും പിണറായി വിജയന്‍ പറഞ്ഞു.