കശുവണ്ടി വ്യവസായിയായ അയ്യപ്പ ഭക്തന്
ആദ്ധ്യാത്മിക കാര്യങ്ങള്ക്ക് ഉദാരമായി സംഭാവന നല്കി മുടിയും താടിയും നീട്ടി വളര്ത്തി കാഴ്ചയില് ചെറുപ്പമായ സുനില് സ്വാമി തികഞ്ഞ അയ്യപ്പ ഭക്തനാണ്. ശബരിമല നട തുറന്നിരുന്നാല് സന്നിധാനത്തുണ്ടാകും. എല്ലാ ദീവസവും നിര്മ്മാല്യം മുതല് ഹരിവരാസനം പാടിയുള്ള നടയടപ്പ് പൂജവരെ അയ്യപ്പനെ തൊഴുന്ന ഭക്തന്. ശബരിമലയില് എത്തുന്ന വിഐപി കള്ക്കും പ്രിയങ്കരനാണിദ്ദേഹം. ശബരിമലയിലെ സെക്യൂരിറ്റിക്കാര് മുതല് എക്സിക്യൂട്ടീവ് ഓഫീസര്വരെയുള്ളവര്ക്കും പ്രിയങ്കരന്. സന്നിധാനത്ത് എത്തിയാല് സെക്യൂരിറ്റി ജീവനക്കാരുടെ വിശ്രമ മുറിയിലാണ് താമസം. ജീവനക്കാര്ക്ക് ഭക്ഷണത്തിന് വേണ്ടെതെല്ലാം എത്തിച്ചു നല്കുന്നതും ഈ വ്യവസായി തന്നെ. അതിലുപരി സന്നിധാനത്തെ പൂജാ സാധാനങ്ങളും സുനില് സ്വാമിയുടെ വക. ഒരു ദിവസം ലക്ഷക്കണക്കിന് രൂപയാണ് ശബരിമലയിലെ നേര്ച്ചയ്ക്കും മറ്റുമായി ഇദ്ദേഹം ചെലവാക്കുന്നത്.
ശബരിമല വികസനത്തിലെ നിര്ണ്ണായക ഘട്ടത്തിലെല്ലാം ഇദ്ദേഹത്തിന്റെ പങ്കാളിത്തമുണ്ടാകും.
കൊല്ലത്തുകാരന് സുനില് സ്വാമിയുടെ യഥാര്ത്ഥ വീട് പാലക്കാട് ചെര്പ്പുളശേരിയിലാണ്. കശുവണ്ടി ബിസിനസ്സാണ് മേഖല. അങ്ങനെയാണ് കൊല്ലത്ത് എത്തി അവിടെ സ്ഥിര താമസമാക്കുന്നത്. അവിവാഹിതനുമാണ്. അയ്യപ്പനോടുള്ള കഠിനമായ ഭക്തികാരണം ശബരി എന്നാണ് സ്ഥാപനങ്ങളുടെ പേര്. സ്വാമിയുടെ മറ്റ് കാര്യങ്ങളെല്ലാം ദുരൂഹമാണ്. ആര്ക്കും ഒന്നുമറിയില്ല. കശുവണ്ടി കച്ചവടക്കാരന് എങ്ങനെ ശബരിമല വികസനത്തിന് കോടികള് ചെലവിടാനാകുന്നു എന്ന ചോദ്യത്തിനും ആര്ക്കും വ്യക്തമായ മറുപടി ഇല്ല.
അഞ്ച് കൊല്ലം മുമ്പ് എല്ലാ പൂജയും മുന്നില് നിന്ന് തൊഴുന്നു എന്നത് വലിയ വിവാദമുണ്ടാക്കി. ബാബറി മസ്ജിദിന്റെ ഓര്മ്മദിനമായ ഡിസംബര് ആറിന് ഇരുമുടികെട്ടുള്ള ഭക്തരേയും ദേവസം ജീവനക്കാര്ക്കും മാത്രമേ അന്ന് സന്നിധാനത്തേക്ക് പ്രവേശനം ഉണ്ടായിരുന്നുള്ളൂ. എന്നാല് ആ ദിവസവും സുനില് സ്വാമി സന്നിധാനത്ത് സജീവമായിരുന്നു. എന്നും എല്ലാ പൂജയും തൊഴുന്നു എന്ന വിവാദത്തില് നിന്ന് രക്ഷനേടാന് എല്ലാ ദിവസവും സുനില് സ്വാമി നിത്യ പൂജ ബുക്ക് ചെയ്തു. മണ്ഡലമകരവിളക്ക് കാലത്ത് നിത്യ ചെലവിനായി ഒരു ലക്ഷത്തിലധികം രൂപ എക്സിക്യൂട്ടീവ് ഓഫീസര്ക്ക് ദിവസവും ചെലവിടാം. പുഷ്പവും പൂജാസാധനങ്ങളും മറ്റ് ചെലവുകള്ക്കുമായി ഹൈക്കോടതി അനുവദിച്ച അധികാരമാണ് ഇത്.
എന്നാല് ഈ സാധനമെല്ലാംഈ സ്വാമി ഭക്തന് ഫ്രീയായി നല്കും. അതുകൊണ്ട് എക്സിക്യൂട്ടീവ് ഓഫീസര്മാര്ക്ക് ഈ തുക എഴുതിയെടുക്കാമെന്നാണ് ആക്ഷേപം. ഒരു അഴിമതിയുടെ ഗണത്തിലും വരികയുമില്ല. അതിനാല് എക്സിക്യൂട്ടീവ് ഓഫീസറായി ഏത് ഉദ്യോഗസ്ഥനെത്തിയാലും സുനില് സ്വാമിയുടെ പ്രിയങ്കരനാകും. അത്കൊണ്ട് തന്നെ സന്നിധാനത്തെ സെക്യൂരിറ്റി ജീവനക്കാരുടെ മുറിയിലെ അനധികൃത താമസം പോലും ആരും ചോദ്യം ചെയ്യുന്നില്ല.
https://www.facebook.com/Malayalivartha
