ശബരിമലയില്‍ സ്ത്രീകള്‍ പ്രവേശിച്ചെന്ന വിവാദത്തെ തുടര്‍ന്ന് നടന്‍ ജയറാമിന്റെ മൊഴി ദേവസ്വം വിജിലന്‍സ് എടുത്തേക്കും. സ്ത്രീകള്‍ ദര്‍ശനം നടത്തിയ സമയത്ത് ജയറാം സന്നിധാനത്ത് ഉണ്ടായിരുന്നെന്നാണ് റിപ്പോര്‍ട്ട്. എസ്.പി രതീഷ് കൃഷ്ണനും ദേവസ്വം ഉദ്യോഗസ്ഥരും യുവതികള്‍ സന്നിധാനത്ത് എത്തിയെന്ന് പറയുന്ന ദിവസത്തെ സി.സി.ടി.വി ദൃശ്യങ്ങളും ഫോട്ടോകളും പരിശോധിച്ചു. പൂജ നടക്കുന്നതിനിടെ ദേവസ്വം ഉദ്യോഗസ്ഥനായ സോപാനം കലാകാരന്റെ കയ്യില്‍ നിന്നും ഇടയ്ക്ക വാങ്ങി ജയറാം കൊട്ടിയതും അന്വേഷിക്കും.

ഇത് കീഴ് വഴക്കങ്ങളുടെയും ആചാരങ്ങളുടെയും ലംഘനമാണെന്ന് തന്ത്രി ഉള്‍പ്പെടെ ചൂണ്ടിക്കാട്ടി. ദേവസ്വം ബോര്‍ഡിന്റെയോ, സന്നിധാനം ചീഫ് എക്‌സിക്യൂട്ടീവ് ഓഫീസറുടെയോ അനുമതിയില്ലാതെയാണ് ജയറാം ഇത്തരത്തില്‍ പ്രവര്‍ത്തിച്ചത്.

ചില ദേവസ്വം ബോര്‍ഡ് ഉദ്യോഗസ്ഥര്‍ സിനിമാ നടന്‍മാര്‍ ഉള്‍പ്പെടെയുള്ള വി.ഐ.പികള്‍ക്ക് വഴിവിട്ട സഹായം നല്‍കുന്നെന്ന് വ്യാപക ആക്ഷേപമുണ്ട്. എല്ലാ മകരവിളക്ക് ദിവസവും ജയറാമിന് പ്രത്യേക പരിഗണനയാണ് വര്‍ഷങ്ങളായി സന്നിധാനത്ത് ലഭിക്കുന്നത്. സാധാരണ ഭക്തര്‍ മണിക്കൂറുകളോളം ക്യൂ നിന്ന് എത്തി ഒരു മിനിറ്റ് പോലും തൊഴാതെ മടങ്ങുമ്പോള്‍ ജയറാമിനെ പോലെയുള്ളവര്‍ അരമണിക്കൂറിലധികമാണ് സന്നിധാനത്ത് തങ്ങുന്നത്. ദേസവസ്വം അധികൃതര്‍ ഇതിന് പ്രത്യേക സഹായവും നല്‍കുന്നു. പലരും പണവും സമ്മാനങ്ങളും വാങ്ങിയാണ് ഇത് ചെയ്യുന്നതെന്നും ആക്ഷേപമുണ്ട്.