ബന്ധു നിയമന വിവാദത്തില് ഇ.പി. ജയരാജന്, പി.കെ. ശ്രീമതി എന്നിവര്ക്ക് വീഴ്ച പറ്റിയെന്ന് പോളിറ്റ് ബ്യൂറോ
ബന്ധു നിയമന വിവാദത്തില് ഇ.പി. ജയരാജന്, പി.കെ. ശ്രീമതി എന്നിവര്ക്ക് വീഴ്ച പറ്റിയെന്ന് പോളിറ്റ് ബ്യൂറോ വിലയിരുത്തി. ജയരാജനും ശ്രീമതിക്കുമെതിരായ സംസ്ഥാന ഘടകത്തിന്റെ റിപ്പോര്ട്ട് പരിശോധിച്ച പോളിറ്റ് ബ്യൂറോ തീരുമാനം കേന്ദ്ര കമ്മിറ്റിക്ക് വിട്ടു. കേന്ദ്ര കമ്മിറ്റിയില് വിശദമായ ചര്ച്ച നടക്കെട്ടയെന്നും അതിന് ശേഷം തീരുമാനമാകാമെന്നുമാണ് പോളിറ്റ് ബ്യൂറോയിലുണ്ടായ പൊതുധാരണ. ഇ.പി. ജയരാജനും പി.കെ. ശ്രീമതിയും കേന്ദ്ര കമ്മിറ്റിയംഗങ്ങളാണ്. അതിനാല് അവര്ക്കെതിരായ പാര്ട്ടി നടപടി സംബന്ധിച്ച തീരുമാനത്തിനുള്ള അധികാരം േകന്ദ്ര കമ്മിറ്റിക്കാണ്.
വീഴ്ച പറ്റിയെന്ന് പോളിറ്റ് ബ്യൂറോയും സംസ്ഥാന ഘടകവും വിലയിരുത്തിയ സാഹചര്യത്തില് ജയരാജനും ശ്രീമതിക്കുമെതിരെ നടപടി ഏറക്കുറെ ഉറപ്പായിട്ടുണ്ട്. സംസ്ഥാന ഘടകത്തിന്റെ റിപ്പോര്ട്ട് ചര്ച്ചക്ക് വരുമ്പോള് ഇരുവര്ക്കും തങ്ങളുടെ ഭാഗം കേന്ദ്രകമ്മിറ്റിയില് വിശദീകരിക്കാനുള്ള അവസരവും ലഭിക്കും. അതുകൂടി കേട്ട ശേഷമായിരിക്കും ഇരുവര്ക്കുമെതിരെ എന്തു നടപടി വേണമെന്ന കാര്യം തീരുമാനിക്കുക. ശാസന, അല്ലെങ്കില് താക്കീത് എന്ന ലഘുനടപടിയില് പ്രശ്നം അവസാനിപ്പിക്കാനാണ് സാധ്യത.
സംസ്ഥാനത്തെ സി.പി.െഎസി.പി.എം പോരും പി.ബിയില് ചര്ച്ചയായി. പിണറായി സര്ക്കാറിനെതിരായ സി.പി.െഎയുടെ കടന്നാക്രമണത്തില് സി.പി.എം കേന്ദ്ര നേതൃത്വത്തിനും അമര്ഷമുണ്ട്. എന്നാല്, പ്രശ്നം വഷളാക്കി മുന്നണിയില് അസ്വസ്ഥത ഉണ്ടാകാതിരിക്കാനുള്ള കരുതല് വേണമെന്ന് യോഗം വിലയിരുത്തി. ഇരുപാര്ട്ടികളുടെയും നേതാക്കള് സംസ്ഥാനത്ത് തന്നെ ചര്ച്ച നടത്തി പ്രശ്നം പരിഹരിക്കാനും പി.ബി നിര്ദേശിച്ചു.
രാഷ്ട്രപതി തെരഞ്ഞെടുപ്പില് പ്രതിപക്ഷം പൊതുസ്ഥാനാര്ഥിയെ കൊണ്ടുവന്നാല് പിന്തുണക്കും. അതേസമയം, 2019 പൊതുതെരഞ്ഞെടുപ്പ് മുന്നില് കണ്ട് കോണ്ഗ്രസും മറ്റും മുന്നോട്ടുവെച്ച വിശാല സഖ്യമെന്ന ആശയത്തോട് പോളിറ്റ് ബ്യൂറോയില് ഭൂരിപക്ഷവും വിയോജിച്ചതായാണ് വിവരം. ഇക്കാര്യത്തില് ചൊവ്വ, ബുധന് ദിവസങ്ങളില് കേന്ദ്ര കമ്മിറ്റിയില് കൂടുതല് ചര്ച്ച നടക്കും.
https://www.facebook.com/Malayalivartha
