പാപ്പാത്തിച്ചോലയില്‍ റവന്യൂ വകുപ്പ് ഒഴിപ്പിച്ചതിനു പിന്നാലെ വീണ്ടും സ്ഥാപിച്ച കുരിശ് നീക്കം ചെയ്തു എന്ന് കരുതുന്ന രണ്ട് പേര്‍ കസ്റ്റഡിയില്‍. സ്പിരിറ്റ് ഇന്‍ ജീസസ് പ്രവര്‍ത്തകരായ കല്‍പ്പറ്റ സ്വദേശി രാജുവും രാജകുമാരി സ്വദേശി സെബാസ്റ്റ്യനുമാണ് പിടിയിലായത്. നേരത്തെ പൊളിച്ച കുരിശ് ഉണ്ടായിരുന്ന അതേ സ്ഥലത്താണ് അഞ്ച് അടി ഉയരമുള്ള മരക്കുരിശ് സ്ഥാപിച്ചിരുന്നത്.

സ്പിരിറ്റ് ഇന്‍ ജീസസ് സ്ഥാപകന്റെ പിക്കപ്പ് വാനും കസ്റ്റഡിയില്‍ എടുത്തിട്ടുണ്ട്. പിടിയിലായവര്‍ ഈ വാഹനത്തിലാണ് രക്ഷപ്പെടാന്‍ ശ്രമിച്ചതെന്നാണ് വിവരം. ഇവരെ സ്ഥലത്തെത്തിച്ച് ചോദ്യം ചെയ്യുകയാണ്. കുരിശ് സ്ഥാപിച്ചതും നീക്കം ചെയ്തതും സ്പിരിറ്റ് ഇന്‍ ജീസസ് തന്നെയാണെന്നാണ് സംശയിക്കുന്നത്.