മതമൈത്രിയുടെ നല്ലപാഠം. മനുഷ്യനെ മതത്തിന്റെ പേരില്‍ വേര്‍തിരിക്കാന്‍ വര്‍ഗീയ ശക്തികള്‍ ശ്രമം നടത്തുന്ന കാലത്ത് മതേതര ശക്തികള്‍ക്ക് മാള്‍ഡയില്‍ നിന്നൊരു സന്തോഷ വാര്‍ത്ത. രാജ്യത്ത് തന്നെ ഏറ്റവും ദരിദ്രമായ ജില്ലകളിലൊന്നാണ് മാള്‍ഡ. അവിടെ നിന്നാണ് ഈ വാര്‍ത്ത.
മാള്‍ഡയിലെ ഷെയ്ഖ്പുര ഗ്രാമത്തിലെ ബിശ്വജിത്ത് രാജക് എന്ന മുപ്പത്തിയഞ്ച് വയസ്സായ യുവാവ് മരിച്ചു. ദരിദ്ര ഹിന്ദു കുടുംബത്തിലെ അംഗമായിരുന്നു ബിശ്വജിത്ത്. ബിശ്വജിത്തിന്റെ മൃതദേഹം അയല്‍ക്കാരായ മുസ്ലിം സഹോദരന്‍മാര്‍ 3 കിലോമീറ്റര്‍ അപ്പുറത്തുള്ള ശ്മശാനത്തിലേക്ക് മഞ്ചലിലേറ്റി, രാമന്റെ മറ്റൊരു നാമമായ ഹരി ഓം എന്ന് വിളിച്ച് എത്തിക്കുകയും അവിടെ വച്ച് എല്ലാ ഹിന്ദു മരണചടങ്ങുകളും നടത്തി മൃതദേഹം സംസ്‌കരിക്കുകയായിരുന്നു. പുഴയോരത്തുള്ള ശ്മശാനത്തില്‍ ദഹിപ്പിക്കുകയും ചിതാഭസ്മം പുഴയില്‍ ഒഴുക്കുകയും ചെയ്തു.
രജക് വിഭാഗത്തില്‍ പെടുന്നവര്‍ ദരിദ്രരാണ്. അത് കൊണ്ട് തന്നെ ബിശ്വജിത്തിന്റെ മൃതദേഹം അടക്കാന്‍ പണമില്ലാത്തതിനാല്‍ എന്ത് ചെയ്യണമെന്നറിയാതെ ഇരിക്കുകയായിരുന്നു കുടുംബം.
ബിശ്വജിത്ത് കരള്‍ രോഗം വന്നായിരുന്നു മരിച്ചത്. തിങ്കളാഴ്ചയായിരുന്നു മരണം സംഭവിച്ചത്. ചൊവ്വാഴ്ച ശവമടക്കാന്‍ പണമില്ലാത്തതിനാല്‍ കുടുംബം ഒന്നും ചെയ്തില്ല. അപ്പോഴാണ് ഗ്രാമത്തിലെ ആളുകള്‍ ഒന്നു ചേര്‍ത്ത് ബിശ്വജിത്തിന്റെ പിതാവിനോട് ശവമടക്കാന്‍ തങ്ങളെ അനുവദിക്കണമെന്ന് ആവശ്യപ്പെട്ടത്.
ശ്മശാനത്തിലേക്ക് സമീപത്തുള്ള മുസ്ലിം പള്ളിയിലെ പുരോഹിതന്‍ പോവുകയും അയല്‍വാസികളായ മുസ്ലിം സഹോദരന്‍മാര്‍ നല്‍കിയ പണം നല്‍കുകയും ചെയ്തു. എന്ത് ചെയ്യണമെന്നറിയാതെ ഇരുന്ന തനിക്ക് തന്റെ അയല്‍ക്കാര്‍ ചെയ്ത പ്രവര്‍ത്തിയോട് എങ്ങനെ നന്ദി പറയണമെന്ന് അറിയില്ലെന്ന് ബിശ്വജിത്തിന്റെ പിതാവ് പറഞ്ഞു.
ഒരു മതവും മറ്റുള്ളവരെ വെറുക്കാന്‍ പഠിപ്പിക്കുന്നില്ല. ബിശ്വജിത്ത് ഞങ്ങളുടെ സഹോദരനാണ്. മറ്റൊരു മതത്തിലാണ് വിശ്വസിക്കുന്നത് എന്നത് കൊണ്ട നല്ല പ്രവര്‍ത്തികള്‍ മറ്റുള്ളവര്‍ക്ക് വേണ്ടി ചെയ്ത് കൊടുക്കാതിരിക്കരുത് എന്ന് അള്ളാഹു പറഞ്ഞിട്ടില്ലെന്ന് ചടങ്ങുകള്‍ക്ക് വേണ്ടി മുന്‍കൈ എടുത്ത ഹാജി അബ്ദുള്‍ കലേഖ് പറഞ്ഞു.
പള്ളിയിലെ പുരോഹിതന്‍, നൂറുകണക്കിന് ആളുകളാണ് ബിശ്വജിത്തിന്റെ മൃതദേഹം സംസ്‌കരിക്കുന്നതിന് വേണ്ടി ശ്മശാനത്തിലേക്ക് വന്നത്. അവര്‍ രാജ്യത്തെ ഹിന്ദുമുസ്ലിം ഐക്യത്തെയാണ് സൂചിപ്പിക്കുന്നതെന്ന് മാള്‍ഡ ജില്ലാ പഞ്ചായത്ത് പ്രസിഡണ്ട് ചന്ദ്ര മോണ്ഡല്‍ പറഞ്ഞു.