തന്ത്രി മന്ത്രിയാണോ? സംശയം ഉയരുന്നത് ശബരിമലയില്‍ നിന്ന്.ശബരിമലയിലെ ആചാരലംഘന വിവാദത്തില്‍ ദേവസ്വം വിജിലന്‍സാണ് ഗുരുതരമായ ചട്ടലംഘനം നടത്തിയിരിക്കുന്നത്.
ശബരിമലയില്‍ യുവതികള്‍ പ്രവേശിച്ചു എന്ന ആരോപണം ദേവസ്വം വിജിലന്‍സ് തള്ളിയെങ്കിലും ഇതു സംബന്ധിച്ച് കൂടുതല്‍ അന്വേഷണം വേണം എന്ന തലത്തിലേക്കുയരുകയാണ് കാര്യങ്ങള്‍.
വിഷുപൂജയോട് അനുബന്ധിച്ചാണ് ശബരിമല നട ഏപ്രില്‍ പത്തിന് നേരത്തെ തുറന്നത്. കൊല്ലത്തെ വ്യവസായി സുനില്‍ സ്വാമി എന്ന സുനില്‍കമാറിനു പൂജ നടത്താന്‍ വേണ്ടിയാണ് അയ്യപ്പന്റെ നട നേരത്തെ തുറന്നത്.
തന്ത്രിയാണ് ശബരിമലയില്‍ ആചാരങ്ങളുടെ അവസാന വാക്ക് .തന്ത്രി പറഞ്ഞിട്ടാണ് നട നേരത്തെ തുറന്നത്. തന്ത്രി പറഞ്ഞാല്‍ ദേവസ്വം ഉദ്യോഗസ്ഥര്‍ക്ക് അനുസരിക്കാതിരിക്കാനാവില്ലെന്നാണ് പറയുന്നത്. എന്നാല്‍ തുറക്കാന്‍ പാടില്ലാത്ത സമയത്ത് തുറക്കാന്‍ തന്ത്രി പറഞ്ഞാല്‍ അക്കാര്യം തിരുവനന്തപുരത്തെ ദേവസ്വം ബോര്‍ഡ് ആസ്ഥാനത്ത് അറിയിക്കേണ്ട ബാധ്യത ഉദ്യോഗസ്ഥനു ണ്ട്. കാരണം അദ്ദേഹത്തിന് ശമ്പളം നല്‍കുന്നത് തന്ത്രിയല്ല, ദേവസ്വം ബോര്‍ഡാണ്.
സോപാനത്ത് ഇടയ്ക്ക വായിക്കുന്ന ശ്രീകുമാറിനെതിരെയും ദേവസ്വം വിജിലന്‍സ് നടപടിക്ക് ശുപാര്‍ശ ചെയ്തിട്ടുണ്ട്. ശ്രീകുമാര്‍ തന്റെ ഇടയ്ക്ക നടന്‍ ജയറാമിനു കൈമാറി എന്നാണ് ആരോപണം. സായിപ്പിനെ കാണുമ്പോള്‍ കവാത്തു മറക്കുന്നവരാണ് ദേവസ്വം ഉദ്യോഗസ്ഥര്‍ . അപ്പോള്‍ ജയറാമിനെ കണ്ടാല്‍ എന്തു ചെയ്യണമെന്ന് പറയണോ?
സുനില്‍ കുമാര്‍ മുട്ടിയാല്‍ ശബരിമലയിലെ എല്ലാ വാതിലും തുറക്കുമെന്നും ഇയാളെ ഉടന്‍ പുറത്താക്കണമെന്നും വിജിലന്‍സ് റിപ്പോര്‍ട്ടിലുണ്ട്.
ശബരിമലയില്‍ രാജാക്കന്‍മാരായിരിക്കുന്ന നിരവധി സുനില്‍ കുമാര്‍മാരുണ്ട്. അവിടെ പണം മാത്രമാണ് പ്രശ്‌നം. പതിവിനു വിപരീതമായി നട തുറന്നത് പോലും പണം കണ്ടിട്ടാണ്.സുനില്‍കുമാറിനൊപ്പം യുവതികള്‍ ദര്‍ശനം നടത്തിയതായും ആരോപണം ഉയര്‍ന്നിട്ടുണ്ട്.ഇതിന്റെ ചിത്രങ്ങള്‍ സാമൂഹ്യ മാധ്യമങ്ങളില്‍ പ്രചരിക്കുന്നുണ്ട്. ചിത്രം കണ്ടിട്ടാണ് ദേവസ്വം മന്ത്രി അന്വേഷണത്തിന് ഉത്തരവിട്ടത്.
ആരാണ് തന്ത്രി? പ്രസിദ്ധമായ ഒരു ക്ഷേത്രത്തിലെ ആചാരങ്ങള്‍ താന്‍ താത്പര്യപ്പെടുന്നത് പോലെ രൂപാന്തരം ചെയ്യാന്‍ ആരാണ് അദ്ദേഹത്തിന് അനുവാദം നല്‍കിയത്? തന്ത്രിമാരെ വീട്ടില്‍ ചെന്ന് കണ്ടാല്‍ എന്തും നടക്കുമെന് പറയുന്നത് ശരിയാണോ? രസകരമായ വസ്തുത, തന്ത്രിക്കെതിരെ ഒരു നടപടിയും ഇല്ല എന്നതാണ്.