സര്വീസ് സംബന്ധമായ വിഷയങ്ങളില് ജീവനക്കാര് നേരിട്ട് കോടതിയെ സമീപിക്കുന്നത് വിലക്കി വൈദ്യുതി ബോര്ഡിന്റെ സര്ക്കുലര്
ജീവനക്കാര് സര്വീസ് സംബന്ധമായ വിഷയങ്ങളില് നേരിട്ട് കോടതിയെ സമീപിക്കുന്നത് വിലക്കി വൈദ്യുതി ബോര്ഡിന്റെ സര്ക്കുലര്. ബോര്ഡിലെ ത്രിതലസംവിധാനം പ്രയോജനപ്പെടുത്തി തര്ക്കങ്ങള് പരിഹരിക്കണമെന്നും കോടതിയില് പോയാല് അച്ചടക്ക നടപടി സ്വീകരിക്കുമെന്നുമാണ് മുന്നറിയിപ്പ്. നടപടി ഭയന്ന് ഈ സര്ക്കുലറിനോട് പ്രതികരിക്കാന് ജീവനക്കാരും വിസമ്മതിക്കുകയാണ്. കെഎസ്ഇബിയില് ഫലത്തില് അടിയന്തിരാവസ്ഥയ്ക്ക് സമമാണ് കാര്യങ്ങള്.
സര്വിസ് വിഷയങ്ങളിലടക്കം ജീവനക്കാര്ക്ക് ബോര്ഡുമായുള്ള തര്ക്കങ്ങള് തീര്ക്കാന് ഇനി ആഭ്യന്തരസംവിധാനങ്ങള് ഉപയോഗിക്കണം. അതല്ലാതെ നേരിട്ട് കോടതിയെ സമീപിച്ചാല് അച്ചടക്കത്തിന്റെ വാള് തലയ്ക്കുമേലുണ്ടെന്ന് ജീവനക്കാര് മനസിലാക്കണമെന്നാണ് ഓര്മപ്പെടുത്തല്.
ലൈന്മാന് മുതല് ചീഫ് എന്ജിനീയര് വരെയുള്ളവര് ഈ ആഭ്യന്തര തര്ക്ക പരിഹാര സംവിധാനം ഉപയോഗിക്കണം. അതല്ലാതെ കോടതിയില് പോയാല് വകുപ്പ്തല നടപടിയെടുക്കും. ഓരോ വിഭാഗത്തില്പ്പെട്ട ഉദ്യോഗസ്ഥരും സമപിക്കേണ്ട തര്ക്ക പരിഹാര സംവിധാനങ്ങളുടെ വിശദാംശങ്ങളും ഉത്തരവിലുണ്ട്. ജീവനക്കാര് സര്വീസ് സംബന്ധമായകാര്യങ്ങള്ക്ക് കോടതിയെ സമീപിക്കുന്നത് അധികസാമ്പത്തിക ബാധ്യതയുണ്ടാക്കുന്നെന്നാണ് ബോര്ഡിന്റെ വിശദീകരണം.
മാത്രമല്ല നിലവിലെ സംവിധാനത്തില് പലകാര്യങ്ങളിലും തൃപ്തികരമായ വിശദീകരണം നല്കാന് ബോര്ഡിന് സാധിക്കുന്നില്ല. ഒട്ടേറെ വിഷയങ്ങളില് കോടതിയലക്ഷ്യ നടപടികളും നേരിടേണ്ടിവരുന്നു. കോടതി വ്യവഹാരങ്ങള് ബോര്ഡിന് സ്വന്തം നിലയില് നേരിടാനാകാത്ത സഹചര്യത്തിലാണ് ജീവനക്കാര് കോടതിയില് പോകരുതെന്ന ഉത്തരവ് പുറപ്പെടുവിച്ചിട്ടുള്ളത്. ഈ വിഷയത്തില് നടപടി ഭയന്ന് പ്രതികരിക്കാന് ജീവനക്കാര് തയ്യാറായിട്ടില്ല.
എന്നാല് ഈ സര്ക്കുലര് നിയമവിരുദ്ധമെന്ന് ചൂണ്ടിക്കാട്ടി കോടതിയെ സമീപിക്കാനൊരുങ്ങുകയാണ് ചില യൂണിയനുകള്.
https://www.facebook.com/Malayalivartha
