തിരുവാഭരണം കട്ടത്‌ കരുണാകരനെ തകര്‍ക്കാനോ?
1985 ല്‍ ഗുരുവായൂര്‍ ക്ഷേത്രത്തില്‍ നിന്നും തിരുവാഭരണം കാണാതെ പോയത്‌ കെ.കരുണാകരനെ കേസില്‍ കുരുക്കാനായിരുന്നോ? കരുണാകരന്റെ വിശ്വസ്‌തനായിരുന്ന കക്കാട്‌ ദാമോദരന്‍ നമ്പൂതിരി വഴി തിരുവാഭരണം കരുണാകരന്റെ പൂജാമുറിയിലെത്തി എന്ന് പ്രചരിപ്പിച്ചവര്‍ തന്നെയാണ്‌ തിരുവാഭരണം കരസ്ഥമാക്കി മണികിണറിലിട്ടതെന്ന്‌ സംശയമുയരുന്നു. കരുണാകരന് തിരുവാഭരണം മോഷ്‌ടിച്ചതായി എല്ലാവരും കരുതി. എന്നാല്‍ എല്ലാം ഗുരുവായൂരപ്പനറിയാം എന്ന നിലപാടില്‍ കരുണാകരന് ഉറച്ചുനിന്നു. ഗുരുവായൂര്‍ ക്ഷേത്രത്തില്‍ രാഷ്‌ട്രീയം കൊടുമ്പിരികൊണ്ട കാലമായിരുന്നു ഇത്‌. മുഖ്യമന്ത്രിയായ കരുണാകരനെ അടിക്കാന്‍ തിരുവാഭരണത്തെക്കാളും വലിയൊരു പടിയില്ലെന്ന്‌ തല്‌പരകക്ഷികള്‍ കരുതിയെന്നാണ്‌ വിവരം. സംഭവത്തിന്‌ പിന്നില്‍ കമ്മ്യൂണിസ്റ്റുകാര്‍ മാത്രമല്ല കോണ്‍ഗ്രസുകരുമുണ്ടെന്ന്‌ പറയുന്നു.
അക്കാലത്ത്‌ എല്ലാ മലയാളമാസം ഒന്നാം തീയതിയും കരുണാകരന് ഗുരുവായൂരിലെത്തുമായിരുന്നു. ഭഗവാനെ കാണാനെത്തുന്ന കരുണാകരന് ഭഗവാന്റെ ആഭരണം മേല്‍ശാന്തി കാണിക്കയായി നല്‍കിയെന്നായിരുന്നു ആരോപണം. സര്‍വശക്തനായിരുന്നു അന്ന്‌ കരുണാകരന്. പി.ടി മോഹനകൃഷ്‌ണനായിരുന്നു അക്കാലത്ത്‌ ഗുരുവായൂര്‍ ദേവസ്വം ചെയര്‍മാന്‍. ഇദ്ദേഹം കരുണാകരന്റെ നോമിനിയായിരുന്നു. അക്കാലത്ത്‌ ഗുരുവായൂരില്‍ ഇലയനങ്ങണമെങ്കില്‍ കരുണാകരന് അറിയണം. പ്രതാപിയായ കരുണാകരനെ തറപറ്റിക്കണമെന്ന ആഗ്രഹം മാര്‍സിസ്റ്റുകാരെക്കാള്‍ കോണ്‍ഗ്രസുകാര്‍ക്കായിരുന്നു കൂടുതല്‍. തിരുവാഭരണ വിവാദം അങ്ങനെയുണ്ടായതാണെന്നാണ്‌ കരുതുന്നത്‌.
എന്നാല്‍ തിരുവാഭരണ വിവാദത്തില്‍ ഉന്നതതല അന്വേഷണം നടത്താന്‍ സര്‍ക്കാരിന്‌ താത്‌പര്യമില്ല. ചില കോണ്‍ഗ്രസ്‌ നേതാക്കളെ അന്വേഷണം വെട്ടിലാക്കുമോ എന്നാണ്‌ സംശയം. കോണ്‍ഗ്രസിലെ എ വിഭാഗം അറിയാതെ തിരുവാഭരണ വിവാദം കൊഴുക്കുകയില്ലായിരുന്നുവെന്ന്‌ കെ.മുരളീധരനുമായി അടുത്ത വൃത്തങ്ങള്‍ പറയുന്നു.
മുരളി തിരുവാഭരണ വിഷയം അഭിമാനപ്രശ്‌മായി എടുത്താല്‍ സര്‍ക്കാരിന്‌ അന്വേഷണത്തില്‍ നിന്നും ഒഴിഞ്ഞുമാറാനാവില്ല. എന്നാല്‍ പുനസംഘടനയില്‍ മന്ത്രിയാക്കുമെന്ന്‌ കരുതുന്ന മുരളി അതിനു തയ്യാറാകുമോ എന്ന് കണ്ടറിയണം. മുരളി മന്ത്രിയാകുമ്പോള്‍ ശിവകുമാര്‍ ഒഴിയും. ശിവകുമാറിന്റെ വകുപ്പുകള്‍ മുരളിക്ക്‌ ലഭിക്കുകയാണെങ്കില്‍ അദ്ദേഹത്തിന്‌ ദേവസ്വത്തിന്റെ ചുമതലയും ലഭിക്കും. അപ്പോള്‍ നേരിട്ട്‌ അന്വേഷണം നടത്താം.
അതേസമയം മേല്‍ശാന്തിയായിരുന്ന കക്കാട്‌ ദാമോദരന്‍ നമ്പൂതിരിയുടെ മകന്‍ ദേവദാസ്‌ നമ്പൂതിരി അന്വേഷണം ആവശ്യപ്പെട്ട്‌ കോടതിയെ സമീപിക്കുകയാണെങ്കില്‍ തിരുവാഭരണ വിവാദത്തിന്‌ പിന്നിലെ കഥകള്‍ പുറത്തുവരാനിടയുണ്ട്‌. അങ്ങനെ വരികയാണെങ്കില്‍ രാഷ്‌ട്രീയ ഗൂഢാലോചന പുതിയ വിവാദങ്ങള്‍ക്ക്‌ തിരികൊളുത്തും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
