സംസ്ഥാനത്ത് പാചകവാതക വിതരണം പ്രതിസന്ധിയില്
എല്.പി.ജി സിലിണ്ടര് വിതരണം ചെയ്യുന്ന ട്രക്കുകളിലെ ജീവനക്കാര് അനിശ്ചിതകാല പണിമുടക്ക് ആരംഭിച്ചതോടെ സംസ്ഥാനത്ത് പാചകവാതക വിതരണം പ്രതിസന്ധിയിലായി. പണിമുടക്കുന്ന തൊഴിലാളികളുമായി നാളെ സര്ക്കാര് ചര്ച്ച നടത്തുമെന്നാണ് പ്രഖ്യാപിച്ചിരിക്കുന്നത്. അതിനിടെ വിതരണക്കാരുടെ ഉടമസ്ഥതയിലുളള ട്രക്കുകള് സമരത്തില് നിന്ന് പിന്മാറി.
ശബള പരിഷ്കരണം ആവശ്യപ്പെട്ടാണ് എല്.പി.ജി ട്രക്ക് തൊഴിലാളികള് അനിശ്ചിതകാല പണിമുടക്ക് ആരംഭിച്ചിരിക്കുന്നത്. സംസ്ഥാനത്ത് മൂന്ന് എണ്ണകമ്പനികള്ക്കുമായി ഏഴ് എല്.പി.ജി പ്ലാന്റുകളാണുളളത്. ഇതില് പാരിപ്പളളിയിലേതൊഴിച്ചുളള പ്ലാന്റുകളില് നിന്നുളള എല്.പി.ജി വിതരണം തടസപ്പെട്ടു. ഉദയംപേരൂര്, കഴക്കൂട്ടം, കരിമുകള്, ഇരുമ്പനം, കഞ്ചിക്കോട്, ചേളാരി പ്ലാന്റുകളില് നിന്നായി രണ്ടായിരത്തോളം ജീവനക്കാര് സമരത്തില് പങ്കുചേര്ന്നിട്ടുണ്ട്. കഴക്കൂട്ടം പ്ലാന്റില് ജീവനക്കാരുമായുളള കരാര് കഴിഞ്ഞ ഒക്ടോബറിലും മറ്റു പ്ലാന്റുകളില് ഡിസംബറിലും അവസാനിച്ചിരുന്നു. ഇതനുസരിച്ച് ആറുമാസം മുന്പ് ജീവനക്കാര് പണിമുടക്ക് നോട്ടീസ് നല്കിയിരുന്നു.
സര്ക്കാര് അംഗീകരിച്ച ശബളവ്യവസ്ഥകള് നടപ്പാക്കണമെന്നാണ് തൊഴിലാളികളുടെ ആവശ്യം. ഇതനുസരിച്ച് കഴിഞ്ഞ ദിവസം നടന്ന ചര്ച്ചയില് തീരമാനമായിരുന്നില്ല. അതിനിടെ മൂന്ന് കമ്പനികളുടെയും സിലിണ്ടര് വിതരണം ചെയ്യുന്ന ഡിസ്ട്രിബ്യൂട്ടര്മാരുടെ ട്രക്കുകള് പണിമുടക്കില് നിന്ന് പിന്മാറി.
https://www.facebook.com/Malayalivartha
