ചെന്നൈ ഇരട്ട സ്‌ഫോടനത്തിന്‌ പിന്നില്‍ ഭീകര സംഘടനകളുടെ പങ്ക്‌ തളളിക്കളയാനാകില്ലെന്ന്‌ കേന്ദ്ര ആഭ്യന്തരമന്ത്രാലയം. ഐ.എസ്‌.എയും, എല്‍.ടി.ടി ഇയെയുമാണ്‌ സംശയിക്കുന്നത്‌. സ്‌ഫോടനത്തിന്റെ പശ്ചാത്തലത്തില്‍ വിമാനത്താവളങ്ങളിലും റെയില്‍വേ സ്റ്റേഷനുകളിലും തെരഞ്ഞെടുപ്പ്‌ നടക്കാനിരിക്കുന്ന സംസ്ഥാനങ്ങളിലും സുരക്ഷ ശക്തമാക്കാന്‍ ആഭ്യന്തരമന്ത്രാലയം നര്‍ദ്ദേശം നല്‍കി. സ്‌ഫോടനവുമായി ബന്ധപ്പെട്ട്‌ രണ്ട്‌ പേരെ പോലീസ്‌ കസ്റ്റഡിയിലെടുത്തു.
അന്വേഷണത്തിനായി എന്‍.ഐ.എ സംഘം ചെന്നൈയില്‍ എത്തി. ചെന്നൈ സെന്‍ട്രല്‍ റെയില്‍വേ സ്റ്റേഷനിലെ ഒന്‍പതാം നമ്പര്‍ പ്ലാറ്റ്‌ഫോമിലുണ്ടായ ഇരട്ട ബോംബ്‌ സ്‌ഫോടനത്തില്‍ യുവതി കൊല്ലപ്പെടുകയും 9 പേര്‍ക്ക്‌ പരിക്കേല്‍ക്കുകയും ചെയ്‌തു. ഇതില്‍ രണ്ടു പേരുടെ നില ഗുരുതരമാണ്‌.

രാവിലെ 7.25 നാണ് സംഭവം. സ്‌റ്റേഷനില്‍ നിര്‍ത്തിയിട്ടിരുന്ന ഗുവഹാത്തി ബാംഗ്ലൂര്‍ എക്‌സ്പ്രസിനുള്ളിലാണ് സ്‌ഫോടനം ഉണ്ടായത്. ട്രെയിനിന്റെ എസ് 4, എസ് 5 കോച്ചുകളിലാണ് സ്‌ഫോടനം. സീറ്റിനടിയില്‍ ഘടിപ്പിച്ചിരുന്ന നിലയിലായിരുന്ന ബോംബാണ് പൊട്ടിത്തെറിച്ചതെന്നാണ് പ്രാഥമിക നിഗമനം. സ്‌ഫോടനവുമായി ബന്ധപ്പെട്ട് ട്രെയിനിനുള്ളില്‍ ഒളിച്ചിരുന്ന ഒരാളെ പോലീസ് അറസ്റ്റു ചെയ്തു. ശ്രീലങ്കന്‍ സ്വദേശിയയെയാണ് അറസ്റ്റ് ചെയ്തത്. ഇയാളെ ചോദ്യം ചെയ്ത് വരികയാണ്. സ്‌ഫോടനം സിബിസിഐഡി അന്വേഷിക്കുമെന്ന് തമിഴ്‌നാട് മുഖ്യമന്ത്രി ജയലളിത അറിയിച്ചു. മരിച്ച യുവതിയുടെ കുടുംബത്തിന് ഒരു ലക്ഷം രൂപയും ഗുരുതരമായി പരിക്കേറ്റവര്‍ക്ക് 25,000 രൂപ വീതവും നിസാരപരിക്കേറ്റവര്‍ക്ക് 5,000 രൂപ വീതവും ധനസഹായം നല്‍കുമെന്ന് റെയില്‍വെ അറിയിച്ചു.