കെ.എസ്.ആര്‍.ടി.സിയില്‍ കൂടുതല്‍ എം.പാനല്‍ ജീവനക്കാരെ പിരിച്ചു വിടുന്നതിന് മാനേജ്‌മെന്റ് നടപടി തുടങ്ങി. നേരത്തേ, മെക്കാനിക്കല്‍ വിഭാഗത്തിലെ അഞ്ഞൂറോളം എം പാനലുകാരെ രണ്ട് ഘട്ടങ്ങളിലായി പിരിച്ചു വിട്ടിരുന്നു. ഇപ്പോള്‍ കണ്ടക്ടര്‍, ഡ്രൈവര്‍  തസ്തികയില്‍ ജോലി ചെയ്യുന്ന എം പാനലുകാരില്‍ പിരിച്ചു വിടേണ്ടവരുടെ പട്ടികയാണ് തയ്യാറാക്കിയത്. രണ്ടു വിഭാഗത്തിലുമായി 7,500 ജീവനക്കാരാണുള്ളത്. അതില്‍ ആദ്യ ഘട്ടമായി രണ്ടായിരം പേരെ പിരിച്ചു വിടാനാണ് തീരുമാനം.

മെക്കാനിക്കല്‍ ജീവനക്കാരെ കൂട്ടത്തോടെ പിരിച്ചുവിട്ട നടപടി ഒച്ചപ്പാടുണ്ടാക്കിയ സാഹചര്യത്തില്‍ അനുകൂല സാഹചര്യം നോക്കിയാവും തീരുമാനം നടപ്പിലാക്കുക. ജീവനക്കാരുടെ എണ്ണം കുറച്ച് ദേശീയ ശരാശരിയിലെത്തിച്ചാലേ നഷ്ടത്തിന്റെ തോത് കുറയ്ക്കാനാവൂ എന്ന സുശില്‍ ഖന്ന റിപ്പോര്‍ട്ടിന്റെ അടിസ്ഥാനത്തിലാണ് കടുത്ത നടപടി.

മെക്കാനിക്കല്‍ ജീവനക്കാരെ പിരിച്ചുവിട്ട നടപടി വിവാദമായപ്പോള്‍ അവരെ തിരിച്ചെടുക്കണമെന്ന് വകുപ്പ് മന്ത്രി തോമസ് ചാണ്ടി ആവശ്യപ്പെട്ടെങ്കിലും അത് സാധിക്കില്ലെന്ന് എം.ഡി രാജമാണിക്യം മന്ത്രിയെ അറിയിച്ചിരുന്നു. നിലവില്‍ ബോഡി നിര്‍മ്മാണ ജോലികളൊന്നും നടക്കാത്തതിനാല്‍ ഇത്രയധികം പേരെ ജോലി ചെയ്യിക്കാതെ ഉള്‍ക്കൊള്ളാനാവില്ലെന്നാണ് എം.ഡി വിശദീകരിച്ചത്.

ഭാവിയില്‍ ബസുകള്‍ വാങ്ങുമ്പോള്‍ ഷാസി മാത്രമല്ലാതെ ബോഡി കൂടി നിര്‍മ്മിച്ചു വാങ്ങാനാണ് പദ്ധതി. അടുത്ത അഞ്ച് വര്‍ഷത്തേക്ക് പുതിയ നിയമനമൊന്നും നടത്തേണ്ടതില്ലെന്നാണ് കെ.എസ്.ആര്‍.ടി.സിയുടെ തീരുമാനം.

ഇപ്പോള്‍ സര്‍വീസ് നടത്തുന്ന ബസുകളുമായി കണക്കാക്കുമ്പോള്‍ ബസൊന്നിന് 8.5 ജീവനക്കാരാണുള്ളത്. അത് 5.5 ആക്കണമെന്നാണ് സുശില്‍ ഖന്ന റിപ്പോര്‍ട്ടിലുള്ളത്. റിപ്പോര്‍ട്ട് അപ്പാടെ അംഗീകരിച്ചാല്‍ 15,510 ജീവനക്കാരെ ബാധിക്കും. അതുകൊണ്ട് രണ്ടു വര്‍ഷത്തിനുള്ളില്‍ അനുപാതം ആറാക്കാനാണ് നീക്കം.

കെ.എസ്.ആര്‍.ടി.സിയില്‍ ഇപ്പോള്‍ 35,341 സ്ഥിരം ജീവനക്കാരും 8,549 താത്കാലിക ജീവനക്കാരും ഉള്‍പ്പെടെ ആകെ 43,890 പേരാണുള്ളത്. നിരത്തിലിറക്കുന്ന ബസുകള്‍ 5160. രണ്ടു വര്‍ഷത്തിനുള്ളില്‍ അനുപാതം ആറാക്കിയാല്‍ 5160 ബസുകള്‍ക്ക് 39,960 ജീവനക്കാര്‍ മതിയാവും. 12,930 ജീവനക്കാരെ ഒഴിവാക്കേണ്ടി വരും. അതില്‍ 4,381 പേര്‍ സ്ഥിരം ജീവനക്കാരാണ്. അവരെ പിരിച്ചു വിടാനാവില്ല. ഈ സാഹചര്യത്തിലാണ് 8549 താത്കാലിക ജീവനക്കാരുടെ ജോലി ആശങ്കയിലായത്.