കൊച്ചി മെട്രോയില് നവവധൂവരന്മാരുടെ സര്പ്രൈസ് യാത്ര
യാത്രക്കാര്ക്കായി മെട്രോ ആദ്യമായിത്തുറന്നതിന്റെ ആവേശത്തില് പൂരപ്പറമ്പു പോലെ ഇരമ്പിയ സ്റ്റേഷന് പെട്ടെന്നൊരു കല്യാണ വീടായി മാറി. നിലവിളക്കിനു പകരം നൂറുകണക്കിനു ക്യാമറ ഫ്ലാഷുകള് തെളിയിച്ചു യാത്രക്കാര് വധൂവരന്മാരെ സ്വീകരിച്ചു. അപ്പോഴും അമ്പരപ്പു മാറാത്ത വധുവിനെയും വരനെയും മുന്പേ വന്നു ക്യൂ നിന്നെടുത്ത ടിക്കറ്റ് നല്കി വീണ്ടും ഞെട്ടിച്ചു അളിയനും കൂട്ടുകാരും.
പിന്നെ ടിക്കറ്റിന്റെ ക്യു ആര് കോഡ് സ്കാന് ചെയ്ത് എസ്കലേറ്ററിലേറി മുഹൂര്ത്തം തെറ്റാതെതന്നെ മെട്രോയിലേക്കു 'ഗൃഹപ്രവേശം'. പിറവത്തെ കല്യാണമണ്ഡപത്തില് നിന്നു ബന്ധുക്കളുടെയും മാതാപിതാക്കളുടെയും വണ്ടികളെല്ലാം സീപോര്ട്–എയര്പോര്ട് റോഡിലൂടെ തിരിഞ്ഞു പോയപ്പോള് നവവരന് ആലുവ ചെങ്ങമനാട് സ്വദേശി ഇ.പി. വിപിന് സഹോദരി ദിവ്യയോടും അളിയന് അവിനാശിനോടും ചോദിച്ചതാണ് എന്തിനാണ് ഈ വണ്ടി മാത്രം കലൂര് വഴി വളഞ്ഞു പോകുന്നതെന്ന്.
പക്ഷേ, ഇല്ലാത്ത ബ്ലോക്ക് കഥകള് പറഞ്ഞ് അളിയന് വരന്റെ സംശയങ്ങള് തീര്ത്തു. കലൂരും കടന്നു പാലാരിവട്ടം സ്റ്റേഷനു മുന്നില് കാര് നിര്ത്തിയപ്പോള് മാത്രമാണ് അളിയനൊരുക്കിയ 'സര്െ്രെപസ്' വധൂവരന്മാര് മനസിലാക്കിയത്. പാലാരിവട്ടം മുതല് ആലുവ വരെ കൊച്ചി മെട്രോയില് യാത്ര. നഗരത്തിന്റെ പുതിയ യാത്രാ സംസ്കാരത്തിനു തുടക്കം കുറിക്കുന്ന മെട്രോയുടെ ആദ്യദിന സര്വീസില് തന്നെ പുതുജീവിതത്തിനും നല്ല തുടക്കം. വിവാഹത്തലേന്നു പിറവത്തുള്ള വധുവിന്റെ വീട്ടില് പോയി മടങ്ങുമ്പോള് അവിനാശിനു തോന്നിയ ആശയമാണു വധൂവരന്മാരുടെ ആദ്യ മെട്രോ യാത്ര. ബന്ധുക്കളെപ്പോലും അറിയിക്കാതെ കൃത്യമായി ആസൂത്രണം ചെയ്താണു വധൂവരന്മാരുടെ വണ്ടി വഴിതിരിച്ചു പാലാരിവട്ടത്തെത്തിച്ചത്.
നേരത്തെയെത്തിയ സുഹൃത്തുക്കള് ടിക്കറ്റ് എടുത്തതിനാല് വലിയ ക്യൂവില് കുരുങ്ങിയില്ല. പക്ഷേ, പ്ലാറ്റ്ഫോമിലെത്താന് വരിനിന്നു തന്നെ ക്യുആര് കോഡ് സ്കാന് ചെയ്തു വിപിനും വധു നീതുമോളും. തിരക്കിനിടയ്ക്കു സര്വാഭരണ വിഭൂഷിതരായെത്തിയ നവദമ്പതികളെ കണ്ടതോടെ യാത്രക്കാര്ക്കു മാത്രമല്ല, മെട്രോ ഉദ്യോഗസ്ഥര്ക്കും കൗതുകമായി.
ട്രെയിന് വരാനായി കാത്തുനിന്ന സമയമൊക്കെയും സെല്ഫി എടുക്കാനുള്ള തിരക്കിലായിരുന്നു അവര്. ട്രെയിനിനുള്ളില് 'മെട്രോ ദമ്പതികള്'ക്കായി മറ്റു യാത്രക്കാര് സീറ്റൊഴിഞ്ഞു കൊടുത്തു. വരന്റെ വീട്ടില് നേരത്തെ എത്തിയ ബന്ധുക്കളുടെ നിര്ത്താതുള്ള ഫോണ് വിളിയിലും സര്െ്രെപസ് പൊളിച്ചില്ല അവിനാശ്. മെട്രോ ആലുവ സാറ്റേഷനിലെത്തുമ്പോള് കാര് കാത്തു കിടക്കുന്നുണ്ടായിരുന്നു. മുഹൂര്ത്തം തെറ്റാതെ മെട്രോയില് പ്രവേശിച്ചെങ്കിലും വീട്ടിലെത്താന് അല്പം വൈകി. പക്ഷേ, വിവാഹദിനം അവിസ്മരണീയമായതിന്റെ ത്രില്ലിലായിരുന്നു രണ്ടുപേരും. കല്യാണദിവസം അളിയന് 'പണി' തരുമെന്നു പ്രതീക്ഷിച്ചെങ്കിലും ഇത്ര പ്രതീക്ഷിച്ചില്ലെന്നാണ് വിപിനും നീതുവും പറയുന്നത്. ചെങ്ങമനാട് ഇളയിടത്ത് പ്രഭാകരന്റെ മകനാണ് വിപിന്. പിറവം ഇട്ടിമറ്റത്തില് ശശിയുടെ മകളാണ് നീതു.
https://www.facebook.com/Malayalivartha
