കൊച്ചിയില്‍ നടി ആക്രമിക്കപ്പെട്ട കേസില്‍ നടന്‍ ദിലീപ് അറസ്റ്റിലായതോടെ പൊളിയുന്നത് മുന്‍ ഡി.ജി.പി ടി.പി.സെന്‍കുമാറിന്റെ വാദങ്ങളാണ്. ദിലീപിനെ അറസ്റ്റ് ചെയ്യാന്‍ തെളിവുകളില്ലെന്നും നടക്കുന്നത് അന്വേഷണത്തിന്റെ മേല്‍നോട്ട ചുമതലയുള്ള എ.ഡി.ജി.പി ബി.സന്ധ്യയുടെ പബ്ലിസിറ്റി സ്റ്റണ്ടാണെന്നും അദ്ദേഹം ഒരു വാരികയ്ക്ക് നല്‍കിയ അഭിമുഖത്തില്‍ അദ്ദേഹം പറഞ്ഞിരുന്നു.

എന്നാല്‍ അന്വേഷണത്തില്‍ ഒരു പോരായ്മയും ഇല്ലെന്നും എല്ലാം നല്ല വഴിക്കാണെന്നും പൊലീസ് മേധാവി ലോക്‌നാഥ് ബെഹ്‌റ ആവര്‍ത്തിച്ചു വ്യക്തമാക്കിയിട്ടും സെന്‍കുമാര്‍ എന്തുകൊണ്ട് ഇങ്ങനെ പ്രതികരിച്ചു.

അഭിമുഖത്തിലെ പ്രസക്തഭാഗങ്ങള്‍ 

അടിസ്ഥാനപരമായി ബി.സന്ധ്യയുടെ പബ്ലിസിറ്റി സ്റ്റണ്ടാണ് കേസിലുള്ളത്. അവരാണ് എല്ലാം ചെയ്യുന്നതെന്നു വരുത്തണം. അതിനുള്ള ശ്രമമാണ്. അതുകൊണ്ട് ആ കേസ് ചിലപ്പോള്‍ തുലഞ്ഞുപോകും. അന്വേഷണ സംഘത്തെ നയിക്കുന്ന ഐ.ജി ദിനേന്ദ്ര കശ്യപിനെ ഒന്നും അറിയിക്കുന്നില്ല. അതുകൊണ്ട് സന്ധ്യ ഒറ്റയ്ക്ക് അന്വേഷിക്കേണ്ട എന്ന് താന്‍ നിര്‍ദേശം നല്‍കിയിരുന്നതായും അദ്ദേഹം പറയുന്നു. 

നടിയെ ആക്രമിച്ച കേസില്‍ ഇതുവരെ സര്‍ക്കാരിന്റെയോ സി.പി.എമ്മിന്റെയോ ഇടപെടല്‍ ഉണ്ടായിട്ടില്ലെന്നും അദ്ദേഹം പറയുന്നു. അതില്‍ ആകെയുള്ളത് സന്ധ്യയ്ക്ക് സ്വാമിയുടെ കേസിലൊക്കെ ഉണ്ടായിട്ടുള്ള നാണക്കേട് പരിഹരിക്കാനുള്ള ഇടപെടലാണ്. ദിലീപിനെതിരെ ഇതുവരെ ഒരു തെളിവും കിട്ടിയിട്ടില്ല. സുനില്‍കുമാര്‍ മുമ്‌ബേ ഈ രീതിയില്‍ ഒന്നിലധികം നടിമാരോട് പെരുമാറിയിട്ടുള്ളയാളാണ്. 2013ല്‍ ക്വട്ടേഷന്‍ കൊടുത്തുവെന്നാണ് പറയുന്നത്. അത് 2017ലാണോ ചെയ്യുന്നത്. ക്വട്ടേഷനെടുക്കുന്നവന്‍ അഡ്വാന്‍സ് വാങ്ങാതെ അതു ചെയ്യുമോയെന്നും സെന്‍കുമാര്‍ ചോദിക്കുന്നു.

സംവിധായകന്‍ നാദിര്‍ഷായെ എ.ഡി.ജി.പി തച്ചങ്കരി വൈറ്റിലയില്‍ വച്ചു കണ്ടിട്ടുണ്ടെന്നും അത് താന്‍ അറിഞ്ഞെന്നും സെന്‍കുമാര്‍ സമ്മതിക്കുന്നു. നേരത്തേ എന്തോ കാസറ്റൊക്കെ ഇറക്കിയ ബന്ധമുണ്ട് അവര്‍ തമ്മിലെന്നും അദ്ദേഹം കൂട്ടിച്ചേര്‍ത്തു.