പരനാറി പ്രയോഗത്തെ ന്യായീകരിച്ച്‌ ദേശാഭിമാനിയുടെ മുഖപ്രസംഗം; പിണറായി ഉപയോഗിച്ചത്‌ സാധാരണക്കാരുടെ ഭാഷ
സിപിഎം സെക്രട്ടറി പിണറായി വിജയന്റെ പരനാറി പ്രയോഗത്തെ ന്യായീകരിച്ച്‌ പാര്‍ട്ടി മുഖപത്രമായ ദേശാഭിമാനിയുടെ മുഖപ്രസംഗം. പിണറായി ഉപയോഗിച്ചത്‌ സാധാരണക്കാരുടെ ഭാഷയാണ്‌. പച്ചയായ മനുഷ്യരുടെ കാര്യങ്ങള്‍ പറയുമ്പോള്‍ സാധാരണക്കാരുടെ ഭാഷയാണ്‌ ഉപയോഗിക്കേണ്ടത്‌. അതില്‍ തെറ്റു കാണേണ്ടതില്ലെന്നും ദേശാഭിമാനി പറയുന്നു. സാധാരണക്കാരില്‍ നിന്ന് ഉയര്‍ന്നുവരുന്ന നേതാക്കള്‍ സാധാരണക്കാരുടെ ഭാഷയില്‍ സംസാരിക്കുമ്പോള്‍ അലക്കിതേച്ച് മിനുക്കി വെടിപ്പാക്കിയ ഭാഷ ഉപയോഗിക്കില്ലെന്നും ദേശാഭിമാനി എഴുതുന്നു. അതില്‍ അഭിജാത വരേണ്യമാധ്യമങ്ങള്‍ വിഷമിക്കേണ്ടന്നും മുഖപ്രസംഗം വിമര്‍ശിക്കുന്നു. ‘ഭാഷയുടെ പരിവേഷ നഷ്ടം’ എന്ന തലക്കെട്ടിലുളള മുഖപ്രസംഗം പിണറായിയുടെ പരാമര്‍ശത്തെ ന്യായീകരിക്കുകയാണ്. രാഷ്ട്രീയ നേതാക്കള്‍ ഏത് ഭാഷയിലാണ് സംസാരിക്കേണ്ടതെന്ന് ചില മാധ്യമങ്ങള്‍ കല്‍പ്പിച്ചു തുടങ്ങിയിരിക്കുന്നു, സാധാരണ ഭാഷയില്‍ നേതാക്കള്‍ സംസാരിക്കുമ്പോള്‍ അഭിജാത-വരേണ്യ മാധ്യമങ്ങള്‍ക്ക് വല്ലാത്ത വിഷമമാണെന്ന വിമര്‍ശനത്തോടെയാണ് മുഖപ്രസംഗത്തിന്റെ തുടക്കം.
ചതിയും വഞ്ചനയും നെറികേടും തുറന്നുകാട്ടുമ്പോള്‍ സത്യസന്ധതയുളള നേതാക്കള്‍ അത് തുറന്ന് കാട്ടാന്‍ പറ്റുന്ന നാടന്‍ വാക്കുകള്‍ ഉപയോഗിക്കും. അതല്ലാതെ അലക്കിത്തേച്ച് മിനുക്കി വെടിപ്പാക്കിയ ഭാഷ ഉപയോഗിക്കാനുളള കാപട്യം കാട്ടില്ല.
കൊല്ലത്തെ സിപിഎം സ്ഥാനാര്‍ഥി എം.എ. ബേബിയുടെ തോല്‌വിക്ക്‌ ഒരു പ്രധാന കാരണം പിണറായിയുടെ പരനാറി പ്രയോഗമാണെന്ന്‌ വിമര്‍ശനങ്ങള്‍ ഉയര്‍ന്നിരുന്നു. ഇതിനിടെയാണ്‌ പിണറായിയെ ന്യായീകരിച്ച്‌ പാര്‍ട്ടിപത്രം രംഗത്തെത്തിയത്‌. എല്‍ഡിഎഫില്‍ നിന്ന് യുഡിഎഫില്‍ ചേക്കേറിയ ആര്‍എസ്‌പി നേതാവ്‌ എന്‍.കെ. പ്രേമചന്ദ്രനെ പരാമര്‍ശിച്ചാണ്‌ പിണറായി പദപ്രയോഗം നടത്തിയത്‌. വ്യക്തമായ മേല്‍ക്കൈയോടെയാണ്‌ കൊല്ലത്ത്‌ എം.എ. ബേബിക്കെതിരേ പ്രേമചന്ദ്രന്‍ വിജയം നേടിയത്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
