പാവങ്ങള്ക്ക് വായ്പയില്ല; സര്ക്കാര് ആവശ്യം ബാങ്കേഴ്സ് സമിതി തള്ളി
നാടെങ്ങും കഴുത്തറുപ്പന് പലിശക്കാര് കൊമ്പന് മീശ പിരിച്ചു വിറപ്പിക്കുമ്പോള് ചെറുകിട വായ്പകള് നല്കണമെന്ന സര്ക്കാര് നിര്ദ്ദേശം സംസ്ഥാനതല ബാങ്കേഴ്സ് സമിതി നിഷ്കരുണം തള്ളി. ബാങ്കേഴ്സ് സമിതിയില് ഒരു സര്ക്കാര് പ്രതിനിധിയെ കൂടി നിയമിച്ചതു മാത്രമാണ് സര്ക്കാരിനുണ്ടായ ഏക നേട്ടം. വായ്പകള് ലഭ്യമാക്കുന്നതുമായി ബന്ധപ്പെട്ട കാലതാമസത്തെ കുറിച്ച് പഠിക്കാമെന്നു മാത്രമാണ് ബാങ്കേഴ്സ് സമിതി സര്ക്കാരിന് നല്കിയ ഉറപ്പ്.
വഴിപാട് പോലെ ബാങ്കേഴ്സ് സമിതി കൃത്യമായി കൂടാറുണ്ടെങ്കിലും യാതൊരു നടപടികളും ഉണ്ടാകാറില്ല. മുഖ്യമന്ത്രിയും ധനമന്ത്രിയും ധാരാളം നിര്ദ്ദേശങ്ങള് സമിതിക്ക് മുമ്പാകെ വയ്ക്കാറുണ്ടെങ്കിലും യാതൊരു നടപടികളും ഉണ്ടാകില്ല. ഇത്തവണ അനധികൃത പണമിടപാട് സ്ഥാപനങ്ങള്ക്കെതിരെ സര്ക്കാര് തലത്തില് കൈക്കൊള്ളുന്ന നടപടികളുടെ ഭാഗമായിട്ടാണ്
സംസ്ഥാനതല ബാങ്കേഴ്സ് സമിതിയുടെ പ്രത്യേക യോഗം വിളിച്ചു ചേര്ത്തത്.
വിദ്യാഭ്യാസ വായ്പ ഉള്ക്കൊള്ളുന്ന വിവിധ പദ്ധതികളില് ബാങ്കുകള് നിഷേധാത്മകമായ നിലപാടാണ് പിന്തുടരാറുള്ളത്. കൃത്യമായ ജാമ്യ വ്യവസ്ഥകള് നല്കിയാലും വായ്പ അനുവദിക്കാത്ത നിരവധി ബാങ്കുകള് കേരളത്തിലുണ്ട്. മുഖ്യമന്ത്രിയും ധനമന്ത്രിയുമൊക്കെ ശുപാര്ശ ചെയ്യുന്ന കേസുകള് പോലും ബാങ്കേഴ്സ് സമിതി അംഗീകരിക്കാറില്ല. വിദ്യാഭ്യാസ വായ്പ എടുക്കുന്ന കുട്ടിയോ ഗൃഹനാഥനോ മരിച്ചാല് വിദ്യാഭ്യാസ വായ്പ എഴുതി തള്ളണമെന്ന സര്ക്കാരിന്റെ ആവശ്യവും ബാങ്കേഴ്സ് സമിതി തള്ളി. എന്നിട്ടും ആഭ്യന്തരമന്ത്രി ഇക്കാര്യം ഉന്നയിച്ചു. എന്നാല് ഇത്തരം കേസുകളില് വായ്പ എഴുതി തള്ളാന് തങ്ങള്ക്ക് പരിമിതി ഉണ്ടെന്ന പഴയ നിലപാടാണ് ബാങ്കുകള് ആവര്ത്തിച്ചത്. അങ്ങനെ സംഭവിച്ചാല് അത്തരം കേസുകളില് വായ്പാ കുടിശ്ശിക സര്ക്കാര് ഏറ്റെടുക്കുമെന്ന് രമേശ് ചെന്നിത്തല പറഞ്ഞപ്പോള് ബാങ്കേഴ്സ് സമിതി കൈയ്യടിച്ചു പാസാക്കി.
വായ്പയെടുക്കാന് ചെല്ലുന്ന സാധാരണക്കാരെ നിരുത്സാഹപ്പെടുത്തുന്ന പ്രവണതയാണ് ബാങ്കുകള് പിന്തുടരുന്നത്സ്വര്ണ പണയത്തിന്മേലുള്ള കാര്ഷിക വായ്പയുടെ കാര്യത്തിലും ഇതു തന്നെയാണ് ഗതി. പലിശയടക്കാനും പുതുക്കാനുമുള്ള സമയം പൊതു മേഖലാ ബാങ്കുകള് സാധാരണ ഇടപാടുകാരെ അറിയിക്കാറില്ല. തുക അടയ്ക്കേണ്ട സമയം പിന്നിടുന്നതോടെ 4 ശതമാനം പലിശയുടെ സ്ഥാനത്ത് 13 ശതമാനം പലിശയും പിഴപ്പലിശയും ഈടാക്കും. ചുരുക്കത്തില് വായ്പയെടുത്ത തുകയുടെ ഒരിരട്ടി കൂടി പലിശ നല്കേണ്ടി വരും.
സര്ക്കാര് പറയുന്നതെല്ലാം തങ്ങള്ക്ക് അംഗീകരിക്കാനാകില്ലെന്നാണ് ബാങ്കുകളുടെ നിലപാട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
