വരുന്നു നേരറിയാന് സി ബി ഐ; ഒന്നല്ല മൂന്ന്! മാറാട്, ജയക്യഷ്ണന്, ടി പി...
മാര്ക്സിസ്റ്റ് പാര്ട്ടിയെ കൂടുതല് പ്രതിസന്ധിയിലേക്ക് തള്ളിവിട്ട് ടി പി ചന്ദ്രശേഖരന് കൊലക്കേസ് അന്വേഷിക്കാന് സി ബി ഐ ഒരുങ്ങുന്നു. ഒപ്പം ജയകൃഷ്ണന് മാസ്റ്റര് വധക്കേസും മാറാട് കൊലപാതകവും സി ബി ഐ അന്വേഷിക്കും. ബി ജെ പി കേരള ഘടകത്തിന്റെ ആവശ്യ പ്രകാരമാണ് മൂന്നു കേസുകളും പുനരന്വേഷിക്കാന് സി ബി ഐ ഒരുങ്ങുന്നത്. കേസുകളുടെ വിശദാംശങ്ങള് കേന്ദ്ര ആഭ്യന്തര മന്ത്രാലയം സി ബി ഐയ്ക്ക് കൈമാറും. യു പി എ സര്ക്കാരിന്റെ കാലത്ത് മൂന്നും അന്വേഷിക്കേണ്ടതില്ലെന്ന് സി ബി ഐ തീരുമാനിക്കുകയായിരുന്നു. കേരള സര്ക്കാര് സി ബി ഐ അന്വേഷണം ആവശ്യപ്പെട്ടെങ്കിലും ഡല്ഹിയില് സി പി എമ്മുമായി കോണ്ഗ്രസ് നടത്തിയിരുന്ന ഒത്തുകളിയാണ് അന്വേഷണങ്ങള്ക്ക് തടസമായി തീര്ന്നത്. സി പി എമ്മിനെതിരെ ചെറുവിരല് അനക്കാന് പോലും കോണ്ഗ്രസ് തയ്യാറായിരുന്നില്ല.
ബി ജെ പി അധികാരത്തിലെത്തിയതോടെ സി ബി ഐയില് സര്ക്കാരിനുള്ള പിടി വര്ദ്ധിച്ചു. സി ബി ഐ മേധാവി സര്ക്കാരിന് കീഴിലാണെന്നാണ് കേന്ദ്രസര്ക്കാര് വാദം. അന്വേഷണങ്ങള് നടത്തുമ്പോള് കേന്ദ്രസര്ക്കാരുമായി കൂടിയാലോചിക്കണമെന്നുമുണ്ട്. സി ബി ഐ സ്വതന്ത്ര സ്ഥാപനമാണെന്ന് കേന്ദ്രസര്ക്കാര് കരുതുന്നില്ല. സി ബി ഐ കൂട്ടിലിട്ട തത്ത തന്നെയാണെന്നാണ് കേന്ദ്രസര്ക്കാര് നിലപാട്.
ടി പി കേസിലുള്ള ഗൂഢാലോചന അന്വേഷിക്കുകയാണെങ്കില് സി പി എം സംസ്ഥാന നേതാക്കള് കുടുങ്ങും. കൃത്യം നടന്നയുടന് സി പി എം സംസ്ഥാന നേതാവിന് വന്ന ഫോണ് തന്നെയാണ് പ്രധാന തെളിവ്. മാറാട് കേസില് പുനരന്വേഷണം ഉണ്ടായാല് അത് മുസ്ലീം ലീഗിനെ പ്രതിസന്ധിയിലാക്കും. 2003 മെയ് രണ്ടിന് മാറാട് കടപ്പുറത്ത് 9 പേര് മരിക്കാനിടയായ സംഭവം ഒരു പ്രമുഖ കക്ഷി ആസൂത്രണം ചെയ്തതെന്നാണ് ബി ജെ പിയുടെ ആരോപണം. ഇത് സംബന്ധിച്ച് അന്വേഷണം നടത്തിയ തോമസ് പി ജോസഫ് കമ്മീഷന് ഗൂഢാലോചന പുറത്തു കൊണ്ടു വരണമെന്നാവശ്യപ്പെട്ടെങ്കിലും യാതൊന്നും സംഭവിച്ചില്ല. തോമസ് പി ജോസഫ് കമ്മീഷന്റെ കണ്ടെത്തല് അന്വേഷിക്കണമെന്നാണ് ബി ജെ പി സംസ്ഥാന കമ്മിറ്റി മുന്നോട്ടു വയ്ക്കുന്ന ആവശ്യം.
ജയകൃഷ്ണന് മാസ്റ്റര് വധക്കേസും സി പി എമ്മാണ് ആസൂത്രണം ചെയ്തത്. പിടിയിലായത് യഥാര്ത്ഥ പ്രതികളല്ല. സി പി എം പ്രതികളെ നല്കുകയായിരുന്നുവെന്നാണ് ആരോപണം. തിരുവഞ്ചൂര് രാധാകൃഷ്ണന് ആഭ്യന്തര മന്ത്രിയായിരുന്ന കാലത്ത് ജയകൃഷ്ണന് മാസ്റ്റര് കൊലക്കസ് അന്വേഷിക്കാന് തീരുമാനിച്ചിരുന്നെങ്കിലും അട്ടിമറിക്കപ്പെടുകയായിരുന്നു.
മൂന്നു കേസുകളും അന്വേഷിക്കണമെന്ന് ആവശ്യപ്പെട്ട് ബി ജെ പി സംസ്ഥാന നേതാക്കള് കേന്ദ്രസര്ക്കാരിനെ സമീപിക്കാന് തീരുമാനിച്ചു. എന്നാല് രേഖാമൂലം അപേക്ഷ നല്കുന്നതിന് മുമ്പ് തന്നെ ഡല്ഹിയിലുണ്ടായിരുന്ന ബി ജെ പി സംസ്ഥാന പ്രസിഡന്റ് വി മുരളീധരന് ഇത് സംബന്ധിച്ച് അനൗപചാരിക ചര്ച്ചകള് നടത്തിയതായി അറിയുന്നു. സി ബി ഐ അന്വേഷണം സംബന്ധിച്ച് ബി ജെ പി സംസ്ഥാന വൈസ് പ്രസിഡന്റ് എം ടി രമേശാണ് കേന്ദ്രസര്ക്കാരുമായി ചര്ച്ച നടത്തുക.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
