കര്ത്താവ് ഇതെങ്ങനെ പൊറുക്കും? കന്യാസ്ത്രീ വിദ്യാര്ത്ഥിനിയെ മണ്ണെണ്ണ ഒഴിച്ച് തീ കൊളുത്തി കൊല്ലാന് ശ്രമിച്ചത് എന്തിന്?
പറവൂര് സെന്റ് ആന്സ് കോണ്വെന്റിലെ വൈദിക വിദ്യാര്ത്ഥിനി ഗുരുതരമായി പൊള്ളലേറ്റ നിലയില് ആശുപത്രിയില് . സംഭവം വിവാദമായതോടെ അന്വേഷണം ശക്തമാക്കി. തുടര്ന്നാണ് കന്യാസ്ത്രീ വിദ്യാര്ത്ഥിനിയെ കൊല്ലാനായി തീ കൊളുത്തിയ ആള് കുടുങ്ങിയത്.
സംഭവം ഇങ്ങനെ
ലത്തീന് കത്തോലിക്കാ സഭയുടെ കോട്ടപ്പുറം രൂപതയിലെ ഡോട്ടര് ഓഫ് ആന്സിന്റെ കീഴിലുള്ളതാണ് പറവൂര് സെന്റ് ആന്സ് കോണ്വെന്റ്. ഏഴ് കന്യാസ്ത്രീകളും ഏഴ് വൈദിക വിദ്യാര്ത്ഥിനികളുമാണ് ഇവിടത്തെ അന്തേവാസികള്. അഞ്ചാം വര്ഷ വൈദിക വിദ്യാര്ത്ഥിനിയായിരുന്നു ചെല്ലാനം വര്ഗീസിന്റെ മകള് ഡെല്ഫി (24). കോണ്വെന്റിലെ ഒന്നാം നിലയിലെ ഹാളിലാണ് വൈദിക വിദ്യാര്ത്ഥിനികള് താമസിച്ചിരുന്നത്.
രാത്രി ഒരുമണിയോടെയാണ് ഡെല്ഫിയുടെ നിലവിളി കേട്ടത്. ഒച്ചകേട്ട മറ്റ് വിദ്യാര്ത്ഥിനികള് ചാടി എഴുന്നേറ്റു. തീയില് കത്തിക്കൊണ്ടിരിക്കുന്ന ഡെല്ഫിയേണ് എല്ലാവരും കണ്ടത്. നിലവിളി കേട്ട് താഴത്തെ നിലയിലുള്ള കന്യാസ്ത്രീകളും ഓടിയെത്തി. എല്ലാവരും ചേര്ന്ന് വെള്ളമോഴിച്ച് തീയണച്ച് ഡെല്ഫിയെ ആശുപത്രിയിലാക്കി. 40 ശതമാനത്തോളം പൊള്ളലേറ്റ ഡെല്ഫിയുടെ നില ഗുരുതരമാണ്.
പിന്നീട് പറവൂര് പോലീസും മജിസ്ട്രേട്ടും ആശുപത്രിയിലെത്തി മൊഴിയെടുത്തു. തുടര്ന്നാണ് ഞെട്ടിപ്പിക്കുന്ന വിവരം പുറത്തായത്.
തീ കൊളുത്തിയത് കൂട്ടുകാരി
അഞ്ച് വര്ഷമായി ഡെല്ഫിയോടൊപ്പം ഒരുമിച്ച് കഴിയുന്ന ചേര്ത്തല അര്ത്തുങ്കല് വലിയ പറമ്പില് റെയ്ച്ചലാണ്(22) തീ കൊളുത്തിയതെന്ന് പോലീസ് പറഞ്ഞപ്പോഴാണ് ഇവരുടെ ശത്രുതയുടെ ആഴം എന്തെന്ന് പലരും ചോദിച്ചത്. ഇരുവരും സാമ്പത്തികമായി പിന്നാക്കം നില്ക്കുന്ന കുടുംബത്തിലെ അംഗങ്ങളാണ്. കന്യാസ്ത്രീ പട്ടം ലഭിക്കാന് ഇനി ഒരു വര്ഷം കൂടി പഠിച്ചാല് മതി.
കഴിഞ്ഞ വര്ഷം തിരുവനന്തപുരത്തെ കോണ്വെന്റില് വച്ച് ചെറിയ പ്രശ്നത്തിന് ഇവര് ഏറ്റുമുട്ടുകയുണ്ടായി. അന്ന് ഡെല്ഫിയുടെ മുഖത്ത് റെയ്ച്ചല് അടിച്ചു. കോണ്വെന്റിലെ സുപ്പീരിയര് റെയ്ച്ചലിനെ താക്കീത് ചെയ്തിരുന്നു. ഇതിന്റെ ദേഷ്യം റെയ്ച്ചല് കൊണ്ടു നടന്നു.
റെയ്ച്ചലിന്റെ അടുത്ത സുഹൃത്തായ ജിസ്മിക്കൊപ്പം ഡെല്ഫിയെ മൂന്നുമാസത്തെ പഠനത്തിന് ആന്ധ്രയിലേക്ക് വിടാന് കോണ്വെന്റ് അധികൃതര് തീരുമാനിച്ചിരുന്നു. ഇതില് അസ്വസ്തയായ റെയ്ച്ചല് ഡെല്ഫിയുടെ പോക്ക് മുടക്കാന് അവസരം കാത്തിരുന്നു.
കോണ്വെന്റില് ഓരോ ദിവസവും ഭക്ഷണം പാകം ചെയ്യുന്നതിന്റെ ചുമതല ഓരോ വിദ്യാര്ത്ഥിനികള്ക്കാണ്. റെയ്ച്ചലിന്റെ ഊഴം വന്നപ്പോള് സ്റ്റൗവിലെ മണ്ണെണ്ണ കുപ്പിയിലാക്കി കിടക്കുന്ന ഹാളില് രഹസ്യമായി കൊണ്ടു വച്ചു. അത്താഴത്തിനു ശേഷം തീപ്പെട്ടിയും എടുത്തുവച്ചു. എല്ലാവരും ഉറങ്ങിയെന്ന് ഉറപ്പു വരുത്തിയ ശേഷം ഡെല്ഫിയുടെ ദേഹത്ത് മണ്ണെണ്ണ ഒഴിച്ച് തീ കൊളുത്തി. ഉടന് തന്നെ സംശയം തോന്നാതെ റെയ്ച്ചല് കട്ടിലില് കയറി കിടന്നു. ബഹളത്തിനിടെ താമസിച്ച് എഴുന്നേറ്റ റെയ്ച്ചല് തീയണയ്ക്കാനും ആശുപത്രിയില് കൊണ്ടു പോകാനും സഹായിച്ചു. ഇതിനിടെ തീപ്പെട്ടി അടുക്കളയില് കൊണ്ടു വച്ചു.
ആര്ക്കും സംശയം തോന്നാതെ പെരുമാറിയ റെയ്ച്ചലിനെ കുടുക്കിയത് പോലീസിന്റെ ചോദ്യം ചെയ്യലാണ്. മറ്റുള്ളവരില് നിന്നും വിഭിന്നമായി മോഴി നല്കിയ റെയ്ച്ചലിനെ കൂടുതല് ചോദ്യം ചെയ്തപ്പോഴാണ് തീ കൊളുത്തിയത് താന് തന്നെയാണെന്ന് സമ്മതിച്ചത്. ഇതോടെ റെയ്ച്ചലിനെ പോലീസ് അറസ്റ്റു ചെയ്തു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
