ഗര്‍ഭപാത്രത്തിന്റെ ചൂടില്‍ നിന്ന് 22 ആഴ്ച പ്രായവും അരക്കിലോ തൂക്കവും മാത്രമുള്ളപ്പോള്‍ പുറത്തെടുത്ത ഇരട്ടകള്‍ അഞ്ചുമാസത്തെ തീവ്രപരിചരണത്തിലൂടെ ജീവിതത്തിലേക്ക്. ഇതോടെ ഗര്‍ഭപാത്രത്തില്‍ ഏറ്റവും കുറച്ചുകാലം കഴിഞ്ഞു ഭൂമിയിലേക്കു പിറന്നുവീഴുന്ന ഇരട്ടകളാവുകയാണ് എറണാകുളം സ്വദേശികളായ അനൂപ് നീലിമ ദമ്പതികളുടെ ഈ പെണ്‍കുഞ്ഞുങ്ങള്‍.

കുഞ്ഞുങ്ങളുണ്ടാകാന്‍ വേണ്ടിയുള്ള ചികില്‍സയിലായിരുന്നു രണ്ടു വര്‍ഷമായി ദമ്പതികള്‍. ഗര്‍ഭം ധരിച്ച് ഇരുപതാമത്തെ ആഴ്ച തുടങ്ങി ആശുപത്രിവാസം. ഇതിനിടെ അമ്മയുടെ ആരോഗ്യസ്ഥിതി മോശമായി. ആലുവ രാജഗിരി ആശുപത്രിയിലെ ഗൈനക്കോളജിസ്റ്റ് വി.പി.പൈലിയുടെ നേതൃത്വത്തിലുള്ള സംഘം 22 ആഴ്ചയും നാലുദിവസവും പ്രായമുള്ള കുഞ്ഞുങ്ങളെ പുറത്തെടുത്തു. 452, 505 ഗ്രാം വീതമായിരുന്നു തൂക്കം. നിയോനേറ്റോളജിസ്റ്റ് ഡോ.മധു ജോര്‍ജിന്റെ നേതൃത്വത്തിലുള്ള സംഘമാണു പരിചരണം ഏറ്റെടുത്തത്.

മാസം തികയാതെ പിറക്കുന്ന കുഞ്ഞുങ്ങള്‍ക്ക് ഉണ്ടാകാന്‍ സാധ്യതയുള്ള തലച്ചോറിലെ രക്തസ്രാവം, കുടലിലെ അണുബാധ എന്നിവ ഒഴിവാക്കാനായി. നൂറു ദിവസത്തോളം വെന്റിലേറ്ററിന്റെ സഹായത്താലാണു ജീവന്‍ നിലനിര്‍ത്തിയത്. ആരോഗ്യം മെച്ചപ്പെട്ടതോടെ തീവ്രപരിചരണ വിഭാഗത്തിലേക്കു മാറ്റി.

ഗര്‍ഭപാത്രത്തില്‍ 24 ആഴ്ചയെങ്കിലും വളര്‍ന്ന കുഞ്ഞുങ്ങളെ മാത്രമേ പുറത്തെടുക്കാന്‍ ശ്രമിക്കാവൂ എന്നാണു പൊതുതത്വം. മാസം തികയാതെയുള്ള ജനനത്തില്‍ ഇന്ത്യയില്‍ റിപ്പോര്‍ട്ട് ചെയ്യപ്പെട്ടിട്ടുള്ള ഏറ്റവും കുറഞ്ഞ പ്രായം 23 ആഴ്ചയിലേതാണ്. അന്നു മുംബൈയിലായിരുന്നു സാക്ഷി എന്ന കുഞ്ഞിന്റെ ജനനം. 2015 മേയ് അഞ്ചിനു കുഞ്ഞിനെ പുറത്തെടുക്കുമ്പോള്‍ 460 ഗ്രാം മാത്രമായിരുന്നു തൂക്കം. ആകെ നീളം 30 സെന്റിമീറ്റര്‍. സാക്ഷി ഇപ്പോള്‍ പൂര്‍ണ ആരോഗ്യവതി. കാനഡയില്‍ 21 ആഴ്ചയും നാലു ദിവസവും പ്രായമുള്ളപ്പോള്‍ ജനിച്ച ജെയിംസ് എര്‍ഗിന്‍ ഗില്ലാണു ലോകത്തെ ഏറ്റവും 'പ്രായം കുറഞ്ഞ' കുട്ടി.