മുഖ്യമന്ത്രിക്ക് സുരക്ഷാ വീഴ്ച; കാരണം രമേശിന്റെ അതൃപ്തിയോ, സി പി എമ്മിന്റെ അട്ടിമറിയോ?
ആഭ്യന്തരമന്ത്രി മാറിയെങ്കിലും പോലീസ് മാറില്ലെന്ന് തെളിഞ്ഞു. ടി പി ചന്ദ്രശേഖരന് പ്രതികള്ക്ക് സമയാസമയം മദ്യം കിട്ടുന്നു. ജയിലിലെ സി സി ടി വി ക്യാമറകള് തകര്ക്കുന്നു. പുറത്തുള്ളവരുടെ പേരില് സിം കാര്ഡുകള് സുലഭമായി ലഭിക്കുന്നു. മുഖ്യമന്ത്രിയെ കല്ലെറിഞ്ഞവര്ക്ക് മുഖ്യമന്ത്രി തന്നെ സമ്മാനം നല്കുന്നു. പോലീസിന്റെ ഭാഗത്ത് ഗുരുതരമായ വീഴ്ചയാണ് സംഭവിച്ചു കൊണ്ടിരിക്കുന്നത്.
മുഖ്യമന്ത്രിയെ കല്ലെറിഞ്ഞ പ്രതികള്ക്ക് മുഖ്യമന്ത്രി തന്നെ പരിസ്ഥിതി ദിന സമ്മാനം നല്കിയതില് സുരക്ഷാ വീഴ്ചയില്ലെന്നാണ് ഇന്റലിജന്സ് വൃത്തങ്ങള് പറയുന്നത്. അതേസമയം പരിപാടിയുടെ സംഘാടനത്തില് പിഴവുണ്ടെന്നും പോലീസ് പറയുന്നു.
മുഖ്യമന്ത്രിയെ സുരക്ഷാ വീഴ്ചയിലേക്ക് കൊണ്ടു പോയതിന്റെ ഉത്തരവാദിത്വം ആഭ്യന്തര വകുപ്പിനാണെന്നും എ ഗ്രൂപ്പ് ആരോപിക്കുന്നു. രമേശിന് മുഖ്യമന്ത്രിയോടുള്ള തൃപ്തിക്കുറവാണ് സംഭവത്തിന് കാരണമായതെന്നും എ ഗ്രൂപ്പ് ആരോപിക്കുന്നു.
മുഖ്യമന്ത്രിയെ കല്ലെറിഞ്ഞ കേസിലെ നാലും അഞ്ചും പ്രതികള്ക്കാണ് അദ്ദേഹം തന്നെ പുരസ്കാരം നല്കിയത്. നേരത്തെ സരിതാനായര് മുഖ്യമന്ത്രിയുമായി സംസാരിച്ച ചിത്രം പുറത്തുവന്ന ശേഷം മുഖ്യമന്ത്രി പങ്കെടുക്കുന്ന ചടങ്ങില് ഇന്റലിജന്സ് നിരീക്ഷണം ഏര്പ്പെടുത്തിയിരുന്നു. എന്നാല് മുഖ്യമന്ത്രിക്ക് നല്കുന്ന അതീവ സുരക്ഷയില് ഇന്റലിജന്സിന് പാളിച്ച സംഭവിച്ചിരിക്കുന്നു എന്നാണ് പുതിയ സംഭവ വികാസങ്ങള് തെളിയിക്കുന്നത്. സര്ക്കാരിന്റെ പരിപാടിയിലായിരുന്നു മുഖ്യമന്ത്രി പങ്കെടുത്തത്. അതേസമയം ഇടതുപക്ഷ സഹയാത്രികരായ ഉദ്യോഗസ്ഥര് പരിപാടി അട്ടിമറിച്ചതാണെന്നും ആരോപണമുണ്ട്.
ഇതിനിടെ വിയ്യൂര് സെന്ട്രല് ജയിലില് ടി പി കേസ് പ്രതികളില് നിന്നും പോലീസ് പിടിച്ചെടുത്ത സിം കാര്ഡ് പന്തീരങ്കാവ് സ്വദേശിയുടേതാണെന്ന് വ്യക്തമായി. ആയിരത്തിലധികം കോളുകളാണ് ഇതില് നിന്നും വിളിച്ചിട്ടുള്ളത്. കഴിഞ്ഞ ദിവസം നടത്തിയ പരിശോധനയില് ഒരു പ്രതിയില് നിന്നും മൊബൈല് ഫോണ് കണ്ടെത്തിയിരുന്നു. സി സി ടി വി കേടാക്കിയത് ജയില് പുള്ളികാളാണെന്നും ആരോപണമുണ്ട്. ഇതിനിടെ വിയ്യൂരില് നിന്നും കണ്ണൂരിലേക്ക് മാറ്റിയ ജയില് സൂപ്രണ്ടിനെ സര്ക്കാര് സസ്പെന്റ് ചെയ്തിരുന്നു. കണ്ണൂരിലും ടി പി കേസ് പ്രതികള്ക്ക് അനുകൂലമായാണ് കാര്യങ്ങള് നീങ്ങുന്നത്.
പോലീസിന്റെ ഉന്നത തലങ്ങളില് രാഷ്ട്രീയ പ്രവര്ത്തനം അഭംഗുരം തുടരുന്നുവെന്നാണ് ആരോപണം. ആഭ്യന്തര മന്ത്രാലയത്തിന് ഉദ്യോഗസ്ഥരെ നിയന്ത്രിക്കാന് സാധിക്കുന്നില്ലെന്നും പരാതിയുണ്ട്. അതേ സമയം ജയില് പുള്ളികള്ക്കിടയില് തങ്ങളുടെ ജീവന് അപകടത്തിലാണെന്നാണ് ഉദ്യോഗസ്ഥരുടെ നിലപാട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
