എല്ഡിഎഫില് തോല്വിയെ ചൊല്ലി പോര് മുറുകുന്നു... തെരഞ്ഞെടുപ്പ് ഫലം പുറത്തുവന്ന് മൂന്നാഴ്ച കഴിഞ്ഞിട്ടും മുന്നണി യോഗം ചേരാന് സി.പി.എം തയ്യാറാകുന്നില്ല
എല്ഡിഎഫില് തോല്വിയെ ചൊല്ലി പോര് മുറുകുന്നു. സി.പി.എമ്മിനെതിരെ സി.പി.ഐയാണ് വാളോങ്ങി നില്ക്കുന്നത്. ലോക്സഭാ തെരഞ്ഞെടുപ്പ് ഫലം പുറത്തുവന്ന് മൂന്നാഴ്ച കഴിഞ്ഞിട്ടും മുന്നണി യോഗം ചേരാന് നേതൃത്വം നല്കുന്ന സി.പി.എം തയ്യാറായിട്ടില്ല. പലതവണ ആവശ്യപ്പെട്ടിട്ടും കണ്വീനര് വൈക്കംവിശ്വനും സി.പി.എമ്മും തയ്യാറായില്ല. സി.പി.എം അവരുടെ സംഘടനാ തലത്തിലുളള അവലോകനങ്ങള്ക്കും ചര്ച്ചകള്ക്കും പിന്നാലെയാണ്. സാധാരണഗതിയില് ഒരു പൊതു തെരഞ്ഞെടുപ്പ് ഫലം വന്നതിനുശേഷം അതാത് കക്ഷികള് അവലോകനം നടത്തുകയും പൊതുസ്ഥിതി എല്ഡിഎഫ് യോഗം ചേര്ന്ന് വിലയിരുത്തുകയുമാണ് ചെയ്യുന്നത്.
തെരഞ്ഞെടുപ്പ് ഫലം അവലോകനം ചെയ്യാനായി സി.പി.എമ്മും സി.പി.ഐയും സംസ്ഥാന നേതൃയോഗങ്ങള് നേരത്തെ ചേര്ന്നിരുന്നു. സി.പി.ഐയുടെ ദേശീയ നേതൃയോഗവും ഫലം വിലയിരുത്തി. സി.പി.എമ്മിന്റെ പൊളിറ്റ്ബ്യൂറോ, കേന്ദ്ര കമ്മിറ്റി യോഗങ്ങള് നടന്നുവരികയാണ്. എന്നാല് തെരഞ്ഞെടുപ്പിലെ ജയപരാജയങ്ങള് സംബന്ധിച്ച് മുന്നണിയായി ഒരു മേശക്ക് ചുറ്റുമിരുന്ന് ചര്ച്ച ചെയ്യാന് ഇതുവരെയും സാധിച്ചിട്ടില്ല. ഇപ്പോള് ആര്എസ്.പിയും മുമ്പ് ജനതാദള് വീരേന്ദ്രകുമാര് വിഭാഗവും മുന്നണി വിട്ടത് ഇടതുപക്ഷത്തിന് നേരിട്ട തിരിച്ചടിക്ക് കാരണമായതായും മുന്നണി ദുര്ബലമായതായും സി.പി.ഐയും മറ്റു ഘടക കക്ഷികളും തുറന്നു സമ്മതിക്കുന്നു. ഈ രണ്ട് പാര്ട്ടികളും മുന്നണിവിടാന് കാരണം സി.പി.എമ്മിന്റെ തെറ്റായ നിലപാട് കാരണമാണ്. ഇക്കാര്യം പ്രതിപക്ഷ നേതാവ് വി.എസ് അച്യുതാനന്ദന് കേന്ദ്ര കമ്മിറ്റി യോഗത്തില് ഉന്നയിച്ചു.
തെരഞ്ഞെടുപ്പിന് മുമ്പ് എല്ഡിഎഫ് വികസിപ്പിക്കണമെന്ന സി.പി.എം കേന്ദ്ര നേതൃത്വത്തിന്റെ നിര്ദേശമിരിക്കെയാണ് ആര്എസ്.പിയെ കൊല്ലം സീറ്റിന്റെ പേരില് മുന്നണിയില് നിന്നും പുകച്ചുപുറത്തു ചാടിക്കാനാണ് സംസ്ഥാന നേതൃത്വം ശ്രമിച്ചത്. ആര്എസ്.പി മുന്നണി വിട്ടതിനെ സി.പി.എമ്മിനൊപ്പം ചേര്ന്ന് സി.പി.ഐയും മറ്റു പാര്ട്ടികളും എതിര്ത്തെങ്കിലും അവര് മുന്നണി വിട്ടതു തെരഞ്ഞെടുപ്പില് ഏറെ ദോഷം ചെയ്തുവെന്നാണ് പിന്നീടു വിലയിരുത്തിയത്. വിഷയങ്ങള് മുന്നണിക്കുള്ളില് കൈകാര്യം ചെയ്യാന് കഴിയാത്തതാണ് കാര്യങ്ങള് വഷളാക്കിയതെന്നാണ് സി.പി.ഐ കേന്ദ്രനേതൃത്വം വിലയിരുത്തിയത്. സി.പി.എമ്മിനെ കുറ്റംപറയുന്നുവെങ്കിലും എല്.ഡി.എഫിനെ ഐക്യത്തോടെ കൊണ്ടുപോകുന്നതില് സി.പി.ഐ സംസ്ഥാന ഘടകത്തിനും വീഴ്ച പറ്റിയതായി കേന്ദ്രനേതൃത്വം തുറന്നു സമ്മതിക്കുന്നുണ്ട്. നിയമസഭാ സമ്മേളനം തുടങ്ങിയെങ്കിലും സഭയില് സര്ക്കാറിനെതിരെ സ്വീകരിക്കേണ്ട നിലപാടുകള് സംബന്ധിച്ചും ഇടതമുന്നണിക്കുള്ളില് യാതൊരു ചര്ച്ചകളും നടന്നിട്ടില്ലെന്നും സി.പി.ഐ ചൂണ്ടിക്കാട്ടുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
