ധനമന്ത്രി തോമസ് ഐസക്കും എക്‌സൈസ് മന്ത്രി റ്റി.പി.രാമകൃഷ്ണനും നേര്‍ക്കുനേര്‍. മുഖ്യമന്ത്രി നിര്‍ദ്ദേശിച്ചിട്ടും ധനമന്ത്രി അയയുന്നില്ലെന്നാണ് റിപ്പോര്‍ട്ടുകള്‍. ബീവറേജസ് കോര്‍പ്പറേഷനിലെ ഓണം ബോണസാണ് വിവാദമായത്.

ഒരാള്‍ക്ക് 85000 രൂപ വരെ ഓണം ബോണസ് നല്‍കാനാണ് എക്‌സൈസ് വകുപ്പ് തീരുമാനിച്ചിരിക്കുന്നത്. നേരത്തെ മുതല്‍ ഇതാണ് കീഴ്‌വഴക്കം. താനായിട്ട് ബോണസില്‍ മാറ്റം വരുത്തിയാല്‍ ജീവനക്കാര്‍ തനിക്ക് എതിരാകുമെന്നാണ് എക്‌സൈസ് മന്ത്രി പറയുന്നത്.

ബോണസ് കുറയ്ക്കുന്നതിനെതിരെ ബെവ്‌കോ ജീവനക്കാര്‍ രംഗത്തെത്തി കഴിഞ്ഞു. ഇടതു പക്ഷക്കാരാണ് ഇവരില്‍ അധികം പേരും. അവര്‍ പാര്‍ട്ടിക്കാര്‍ വഴി മുഖ്യമന്ത്രിയെ സമീപിച്ച് കഴിഞ്ഞു. മുഖ്യമന്ത്രി ബോണസില്‍ മാറ്റം വരുത്തേണ്ടതില്ലെന്ന് എക്‌സൈസ് മന്ത്രിക്ക് നിര്‍ദ്ദേശം നല്‍കിയിട്ടുണ്ട്. എന്നാല്‍ ധന സെക്രട്ടറിയും ധനമന്ത്രിയും ഇതിന് എതിരാണ്.

എക്‌സൈസ് മന്ത്രിയെ കുഴപ്പിക്കാന്‍ ധനമന്ത്രി അദ്ദേഹത്തിന്റെ കീഴിലുള്ള കെ.എസ്.എഫ്.ഇയില്‍ ബോണസ് കുറയ്ക്കുകയും ചെയ്തു. തന്റെ വകുപ്പില്‍ കുറയ്ക്കാമെങ്കില്‍ എക്‌സൈസിന് കുറച്ചാലെന്തെന്നാണ് ചോദ്യം. എന്നാല്‍ കെ.എസ്.എഫ്.ഇയെ പോലെയല്ല ബെവ്‌കോയെന്നും കോടിക്കണക്കിനു രൂപയുടെ ലാഭമാണ് സ്ഥാപനം നേടിയെടുക്കുന്നതെന്നും എക്‌സൈസ് വാദിക്കുന്നു. ഏതായാലും കൊത്തി കൊത്തി മലബാറില്‍ കയറി കൊത്തുന്ന തോമസ് ഐസക്കിന്റെ രീതിയോട് റ്റി.പിക്ക് താത്പര്യമില്ല

മുഖ്യമന്ത്രിയുടേതുള്‍പ്പെടെയുള്ള വകുപ്പുകളില്‍ ധനവകുപ്പ് നടത്തുന്ന ഇടപെടലുകളില്‍ പല മന്ത്രിമാരും എതിരാണ്. സ്വന്തം വകുപ്പിന്റെ അപ്രമാദിത്വം മറ്റുള്ളവരോട് കാണിക്കേണ്ടെന്നാണ് മന്ത്രിമാര്‍ പറയുന്നത്. ധനമന്ത്രിയുടെ അവശ്യങ്ങള്‍ അംഗീകരിച്ച് നല്‍കിയാല്‍ അത് അപകടമാകുമെന്നാണ് സി.പി.എം മന്ത്രിമാരുടെ കണക്കുകൂട്ടല്‍. അതിനിടെ ധനസെക്രട്ടറി കെ.എം എബ്രഹാമിനെ ചീഫ് സെക്രട്ടറിയാക്കി തന്റെ ഇംഗിതങ്ങള്‍ നടത്തിയെടുക്കാനുള്ള ധനമന്ത്രിയുടെ ശ്രമത്തിനും മന്ത്രിമാര്‍ എതിര്‍പ്പ് പ്രകടിപ്പിക്കുന്നു.

എന്നാല്‍ ഒടുവില്‍ റ്റി.പി. ജയിക്കാന്‍ തന്നെയാണ് സാധ്യത. മുഖ്യമന്ത്രി കടുപ്പിക്കുന്നതോടെ ഐസക്ക് മുട്ടുമടക്കും.