കൊച്ചിയില്‍ ആക്രമിക്കപ്പെട്ട യുവനടിയുടെ പേര് ഫെയ്‌സ് ബുക്കിലൂടെ വെളിപ്പെടുത്തിയ കേസില്‍ നടന്‍ അജു വര്‍ഗീസിനെ അറസ്റ്റ് ചെയ്തു. ഐ.പി.സി 222 (എ) വകുപ്പാണ് അജുവിനെതിരെ പൊലീസ് ചുമത്തിയിട്ടുള്ളത്. കളമശേരി സര്‍ക്കിള്‍ ഇന്‍സ്‌പെക്ടര്‍ അറസ്റ്റ് രേഖപ്പെടുത്തിയ ശേഷം അജുവിനെ ജാമ്യത്തില്‍ വിട്ടയച്ചു.

ചൊവ്വാഴ്ച വൈകുന്നേരം 6.30ഓടെയാണ് അജു വര്‍ഗീസിനെ വിളിച്ചുവരുത്തി അറസ്റ്റ് രേഖപ്പെടുത്തിയത്. ലൈംഗീക ആക്രമണങ്ങള്‍ക്ക് ഇരയാകുന്നവരുടെ പേര് സമൂഹമദ്ധ്യത്തില്‍ വെളിപ്പെടുത്തത് ശിക്ഷാര്‍ഹമാകുന്ന ഐ.പി.സി 228 (എ) വകുപ്പാണ് നടനെതിരെ ചുമത്തിയിട്ടുള്ളത്.

നേരത്തെ ഫെയ്‌സ്ബുക്ക് പോസ്റ്റിലൂടെ ആക്രമണത്തിനിരയായ നടിയുടെ പേര് വെളിപ്പെടുത്തിയും, ഇതേ സംഭവത്തില്‍ ആരോപണ വിധേയനായിരുന്ന നടന്‍ ദിലീപിനെ പിന്തുണച്ചുമായിരുന്നു അജു വര്‍ഗീസ് രംഗത്തെത്തിയത്. തുടര്‍ന്ന് വിവാദമായതോടെ, പൊലീസ് അജുവിനെതിരെ കേസ് രജിസ്റ്റര്‍ ചെയ്യുകയും, ചോദ്യം ചെയ്യലിനായി വിളിച്ചുവരുത്തുകയും ചെയ്തിരുന്നു. തുടര്‍ന്ന് അജുവിന്റെ ഫോണ്‍ പൊലീസ് കസ്റ്റഡിയില്‍ എടുക്കുകയും ഫൊറന്‍സിക് പരിശോധനയ്ക്ക് വിധേയമാക്കുകയും ചെയ്തിരുന്നു.

അതിനിടെ, കേസിലെ എഫ്.ഐ.ആര്‍ റദ്ദാക്കമമെന്ന് ആവശ്യപ്പെട്ട് അജു വര്‍ഗീസ് ഹൈക്കോടതിയെ സമീപിച്ചിരുന്നു. മനപൂര്‍വമല്ല തന്റെ പേര് വെളിപ്പെടുത്തിയതെന്നും തനിക്ക് ഇക്കാര്യത്തില്‍ പരാതിയില്ലെന്നും നടി എഴുതി നല്‍കിയ സത്യവാങ്മൂലവും ഉള്‍പ്പെടെയായിട്ടായിരുന്നു അജു ഹൈക്കോടതിയെ സമീപിച്ചത്. എന്നാല്‍ ഇത്തരമൊരു കേസില്‍ എഫ്.ഐ.ആര്‍ റദ്ദാക്കുന്നത് സമൂഹത്തിന് ശരിയായ സന്ദേശമായിരിക്കില്ല നല്‍കുന്നതെന്ന പൊലീസ് വാദം അംഗീകരിച്ച് എഫ്.ഐ.ഐര്‍ റദ്ദാക്കാന്‍ കോടതി വിസമ്മതിക്കുകയായിരുന്നു.