ഏക പ്രതീക്ഷ ജസ്റ്റീസ് ഉബൈദിന്റെ നിരീക്ഷണങ്ങള്; ദിലീപിന്റെ ജാമ്യഹര്ജി ഇന്ന് പരിഗണിക്കുമ്പോള്...
കൊച്ചിയില് നടിയെ തട്ടിക്കൊണ്ടുപോയി ആക്രമിച്ച കേസില് റിമാന്ഡില് കഴിയുന്ന നടന് ദിലീപിന്റെ ജാമ്യാപേക്ഷ വിചാരണക്കോടതിയായ അങ്കമാലി മജിസ്ട്രേറ്റ് കോടതി ഇന്ന് പരിഗണിക്കാനിരിക്കുമ്പോള് നാടകീയ നീക്കങ്ങള്. ഹൈക്കോടതിയും അങ്കമാലി മജിസ്ട്രേറ്റ് കോടതിയും രണ്ടുതവണ ജാമ്യാപേക്ഷ തള്ളിയിരുന്നു.
നടിയുടെ നഗ്നചിത്രം പകര്ത്തണമെന്നാവശ്യപ്പെട്ടു എന്നതു മാത്രമാണ് തനിക്കെതിരേ ചുമത്തിയിട്ടുള്ള കുറ്റം എന്നാണ് ദിലീപ് ആരോപിക്കുന്നത്. പുതിയ കുറ്റമൊന്നും അന്വേഷണസംഘം ഇതുവരെ കണ്ടെത്തിയിട്ടില്ല. ഇതുവരെ അന്വേഷണവുമായി പൂര്ണമായും സഹകരിച്ചിട്ടുണ്ട്. കോടതിയുടെ ഉപാധികള് പൂര്ണമായും അനുസരിച്ച് അച്ഛന്റെ ശ്രാദ്ധച്ചടങ്ങില് പങ്കെടുത്ത കാര്യവും ദിലീപ് ജാമ്യഹര്ജിയില് ചൂണ്ടിക്കാട്ടി.
ജാമ്യംതേടി ദിലീപ് വീണ്ടും ഹൈക്കോടതിയെ സമീപിക്കുമെന്നായിരുന്നു ആദ്യം കരുതിയിരുന്നത്. എന്നാല്, കേസുമായി ബന്ധപ്പെട്ട് ദിലീപിന്റെ സുഹൃത്തായ നാദിര്ഷയോട് വെള്ളിയാഴ്ച അന്വേഷണ സംഘത്തിനുമുന്നില് ഹാജരാകാന് ഹൈക്കോടതി നിര്ദ്ദേശിച്ചിരുന്നു. നാദിര്ഷ സമര്പ്പിച്ച മുന്കൂര് ജാമ്യാപേക്ഷ പരിഗണിക്കുന്നത് കോടതി 18ലേക്ക് മാറ്റുകയും ചെയ്തു. ഈ ഹര്ജി ജസ്റ്റീസ് ഉബൈദാണ് പരിഗണിച്ചത്. നാദിര്ഷായ്ക്ക് അനുകൂലമായ പരാമര്ശങ്ങള് ഉണ്ടായി. കേസ് നീളുന്നതിനെ ചോദ്യം ചെയ്യുകയും ചെയ്തു. അതുകൊണ്ട് തന്നെ ദിലീപിന്റെ ജാമ്യാപേക്ഷയില് വിചാരണകോടതി എടുക്കുന്ന തീരുമാനം നിര്ണ്ണായകമാണ്. ജസ്റ്റീസ് ഉബൈദിന്റെ പരാമര്ശങ്ങള് കോടതിയെ സ്വാധീനിച്ചാല് ദിലീപിന് ജാമ്യം കിട്ടും. അല്ലാത്ത പക്ഷം ദിലീപിന് വീണ്ടും ഹൈക്കോടതിയെ സമീപിക്കേണ്ടി വരും.
ദിലീപിന്റെ ചിത്രമായ രാമലീല ഈ മാസം 28ന് റിലീസ് ചെയ്യുന്നുണ്ട്. അതിന് മുമ്പ് ജയില് മോചിതനാകാനാണ് ദിലീപിന്റെ നീക്കം. ഇതിന് വേണ്ടിയാണ് മജിസ്ട്രേട്ട് കോടതിയില് ജാമ്യ ഹര്ജി നല്കിയത്. ഇവിടെ തള്ളിയാല് ദിലീപ് വീണ്ടും അപ്പീല് കൊടുക്കും. നിലവില് ജസ്റ്റീസ് സുനില് തോമസാണ് ദിലീപിന്റെ ജാമ്യ ഹര്ജികള് ഹൈക്കോടതിയില് പരിഗണിച്ച് തള്ളിയത്. അതുകൊണ്ട് കൂടിയാണ് മജിസ്ട്രേട്ട് കോടതിയിലേക്ക് പോയത്. പുതിയ അപ്പീല് ജസ്റ്റീസ് ഉബൈദിന്റെ ബഞ്ചിലെത്തുമെന്നാണ് ദിലീപ് പക്ഷത്തിന്റെ പ്രതീക്ഷ. ദിലീപിനെതിരെ തെളിവുണ്ടെന്ന് കേസ് ഡയറി പരിശോധിച്ച് സുനില് തോമസ് നിഗമനത്തിലെത്തിയിരുന്നു. അതുകൊണ്ട് മജിസ്ട്രേട്ട് കോടതി ജാമ്യം നിഷേധിച്ച് ശേഷം അപ്പീലുമായി ഹൈക്കോടതിയില് എത്തുമ്പോള് അത് വീണ്ടും ജസ്റ്റീസ് സുനില് തോമസ് പരിഗണിക്കുന്നത് ദിലീപിന് തിരിച്ചടിയാവുകയും ചെയ്യും.
രാമലീലയുടെ റിലീസ് ദിവസം ആരാധകര്ക്കൊപ്പം ചിത്രം കാണാനാണ് ദിലീപിന്റെ ആഗ്രഹം. ഇതിലൂടെ തന്റെ നഷ്ടപ്പെട്ട ഇമേജ് വീണ്ടെടുക്കാനാകുമെന്നും കരുതുന്നു. രാമലീല വിജയിക്കുമെന്ന് തന്നെയാണ് പ്രതീക്ഷ. സിനിമയെ കൂകി തോല്പ്പിക്കരുതെന്ന് മോഹന്ലാലും മമ്മൂട്ടിയും പൃഥ്വി രാജും ഫാന്സുകളോട് നിര്ദ്ദേശിച്ചിട്ടുണ്ട്. അതുകൊണ്ട് തന്നെ ജാമ്യ ഹര്ജിയില് വിധി അനുകൂലമായി രാമലീലയ്ക്ക് മുമ്പേ താരത്തിന് പുറത്തിറങ്ങാനാകണെന്ന പ്രാര്ത്ഥനായാണ് ദിലീപിന്റെ ഫാന്സുകാര്ക്കുള്ളത്. മോചനം സാധ്യമായാല് വമ്പന് സ്വീകരണവും ദിലീപിന് നല്ുകം. റോഡ് ഷോയും നടത്തും. എന്നാല് ജാമ്യ ഹര്ജിയെ പ്രോസിക്യൂഷന് പല്ലും നഖവും ഉപയോഗിച്ച് എതിര്ക്കുമെന്ന് ഉറപ്പാണ്. നാദിര്ഷായുടെ ജാമ്യ ഹര്ജി വാദത്തിനിടെ ഉയര്ന്ന പൊലീസിനെതിരായ പരാമര്ശങ്ങളെ മറികടക്കാനുള്ള കടുത്ത നിലപാടും പ്രോസിക്യൂഷന് എടുക്കും. കേസ് അന്വേഷണം രണ്ടാഴ്ചയ്ക്കുള്ളില് തീരുമെന്നും ഹൈക്കോടതിയെ പ്രോസിക്യൂഷന് നല്കിയിട്ടുണ്ട്. ദിലീപിന് ജാമ്യം അനുവദിക്കാന് സമ്മതിക്കാതെ വിചാരണ തടവുകാരനാക്കാനാണ് പ്രോസിക്യൂഷന്റെ നീക്കം.
നാദിര്ഷയെ ചോദ്യം ചെയ്തശേഷം 18ന് ജാമ്യഹര്ജി പരിഗണിക്കാമെന്ന് ജസ്റ്റീസ് ഉബൈദ് നിലപാട് എടുത്തിരുന്നു. എന്നാല് ഇന്നലെ നാദിര്ഷായെ ചോദ്യം ചെയ്യാന് പൊലീസിന് കഴിഞ്ഞില്ല. പൊലീസ് ചോദ്യം ചെയ്യല്ലിനിടെ ആരോഗ്യസ്ഥിതി മോശമായതിനെ തുടര്ന്ന് ആശുപത്രിയില് പ്രവേശിപ്പിച്ച നടന് നാദിര്ഷയെ ചോദ്യം ചെയ്യുന്നത് പൊലീസ് മറ്റൊരു ദിവസത്തേക്ക് മാറ്റി. ഇന്നലെ തന്നെ ചോദ്യം ചെയ്യലിന് ഹാജരാവാമെന്ന് ചികിത്സയില് കഴിയുന്ന നാദിര്ഷാ പൊലീസിനെ അറിയിച്ചെങ്കിലും ഇന്നലെ ഇനി ചോദ്യം ചെയ്യല് വേണ്ടെന്നായിരുന്നു പൊലീസ് നിലപാട് എടുത്തത്. ഹൈക്കോടതിയുടെ നിര്ദ്ദേശപ്രകാരമാണ് ദിലീപിന്റെ അടുത്ത സുഹൃത്ത് കൂടിയായ നാദിര്ഷാ ചോദ്യം ചെയ്യല്ലിനായി ആലുവ പൊലീസ് ക്ലബിലെത്തിയത്. പൊലീസിന്റെ ചോദ്യങ്ങള്ക്ക് സത്യസന്ധമായി മറുപടി പറയണമെന്ന് ഹൈക്കോടതി നാദിര്ഷയോട് നേരത്തെ നിര്ദ്ദേശിച്ചിരുന്നു. നാദിര്ഷ സമര്പ്പിച്ച മുന്കൂര് ജാമ്യഹര്ജി പരിഗണിച്ചു കൊണ്ടായിരുന്നു ഹൈക്കോടതിയുടെ ഈ നിര്ദ്ദേശം.
ഇന്നലെ രാവിലെ 9.45 ഓടെയാണ് നാദിര്ഷ ആലുവ പൊലീസ് ക്ലബ്ബില് എത്തിയത്. തുടര്ന്ന് ചോദ്യം ചെയ്യലിനുള്ള പ്രാരംഭ നടപടികള് പുരോഗമിക്കവെയാണ് നാദിര്ഷായുടെ രക്തസമ്മര്ദം ഉയര്ന്നത്. ഉടന് തന്നെ വൈദ്യ പരിശോധനയ്ക്കായി ഡോക്ടര്മാരുടെ സംഘത്തെ പൊലീസ് ക്ലബ്ബിലേക്ക് വിളിച്ചു വരുത്തി. റൂറല് എസ്പി എ.വി ജോര്ജ്, അന്വേഷണ ചുമതലയുള്ള ഉദ്യോഗസ്ഥന് ബൈജു പൗലോസ് എന്നിവരുടെ സാന്നിധ്യത്തില് നടത്തിയ പരിശോധനയില് രക്തത്തില് പഞ്ചസാരയുടെ അളവ് താഴ്ന്നതായും കണ്ടെത്തി. വൈദ്യ പരിശോധനയില് ആരോഗ്യ സ്ഥിതി തൃപ്തികരമാണെന്ന് കണ്ടെത്തിയാല് മാത്രമേ നാദിര്ഷയെ വീണ്ടും ചോദ്യം ചെയ്യലിനു വിധേയമാക്കുകയുള്ളു എന്ന് റൂറല് എസ്പി എ.വി. ജോര്ജ്ജ് അറിയിച്ചു. ഇക്കാര്യം കോടതിയെ അറിയിക്കും.
https://www.facebook.com/Malayalivartha
