രൂപമാറ്റം വരുത്തിയ വാഹനങ്ങള്ക്കു നേരെ കര്ശന നടപടിയെന്നു സംസ്ഥാന പോലീസ് മേധാവി
നിയമപരമല്ലാത്ത രൂപമാറ്റം നടത്തിയ വാഹനങ്ങള്ക്കു നേരെ കര്ശന നടപടിയെന്നു സംസ്ഥാന പോലീസ് മേധാവി ലോക്നാഥ് ബെഹറ. ഇത്തരത്തില് രൂപമാറ്റം വരുത്തിയ വാഹനങ്ങള് റോഡപകടങ്ങള്ക്കു കാരണമാകുന്ന സാഹചര്യത്തിലാണ് കര്ശന നടപടിയുമായി പോലീസ് രംഗത്തു വരുന്നത്. വാഹനങ്ങളില് കമ്ബനി നല്കുന്ന രൂപകല്പ്പനയ്ക്കനുസരിച്ചുള്ള ബോഡി, സൈലന്സര് തുടങ്ങിവ മാറ്റിയവര്ക്ക് എതിരെ നടപടിയുണ്ടാകും. ഇത്തരം അനാവശ്യമായ മാറ്റങ്ങള് വലിയ അപകടങ്ങള്ക്കു കാരണമാകുന്നുണ്ട്. ഇനി മുതല് അനിവാര്യമായ ആവശ്യങ്ങള്ക്കു മാത്രമേ വാഹനങ്ങള്ക്ക് രൂപമാറ്റം നല്കുന്നതിന് മോട്ടോര് വാഹന വകുപ്പ് അധികൃതരില് നിന്നും അനുമതി ലഭിക്കൂ. ബൈക്കുകളുടെ ഹാന്ഡില്, സൈലന്സര് തുടങ്ങിയവ മാറ്റിവയ്ക്കുന്നതുപോലെ ശാസ്ത്രീയമല്ലാതെ വാഹനത്തില് വരുത്തുന്ന മാറ്റങ്ങള്ക്ക് അനുമതി ലഭിക്കുകയുമില്ലെന്നും ഡിജിപി ലോക്നാഥ് ബെഹറ ഫെയ്സ്ബുക്കിലൂടെ അറിയിച്ചു.
ഡിജിപി ലോക്നാഥ് ബെഹറയുടെ ഫെയ്സ്ബുക്ക് പോസ്റ്റ്
വാഹനങ്ങളുടെ നിയമപരമല്ലാത്ത രൂപമാറ്റത്തിനെതിരെ നടപടി ശക്തമാക്കും
റോഡപകടങ്ങളില് രൂപമാറ്റം വരുത്തിയ വാഹനങ്ങളുടെ പങ്ക് ചെറുതല്ല. വാഹനങ്ങളില് കമ്പനി നല്കുന്ന രൂപകല്പ്പനയ്ക്കനുസരിച്ചുള്ള ബോഡി, സൈലന്സര് തുടങ്ങിയ ഭാഗങ്ങള് മാറ്റി പകരം മറ്റ് വാഹനഭാഗങ്ങള് കൂട്ടിച്ചേര്ത്ത് വരുത്തുന്ന രൂപമാറ്റം നിരവധി സുരക്ഷാപ്രശ്നങ്ങള്ക്കും അപകടങ്ങള്ക്കും കാരണമാകുന്നു. എറ്റവും അനിവാര്യമായ ആവശ്യങ്ങള്ക്കുമാത്രമേ വാഹനങ്ങള്ക്ക് രൂപമാറ്റം നല്കുന്നതിന് മോട്ടോര് വാഹന വകുപ്പ് അധികൃതരില് നിന്നും അനുമതി ലഭിക്കൂ. ബൈക്കുകളുടെ ഹാന്ഡില്, സൈലന്സര് തുടങ്ങിയവ മാറ്റിവയ്ക്കുന്നതുപോലെ ശാസ്ത്രീയമല്ലാതെ വാഹനത്തില് വരുത്തുന്ന മാറ്റങ്ങള്ക്ക് അനുമതി ലഭിക്കുകയുമില്ല.
എന്നാല് അനുമതിയില്ലാതെ രൂപമാറ്റം വരുത്തിയ നിരവധി വാഹനങ്ങള് സംസ്ഥാനത്ത് ഉപയോഗിക്കപ്പെടുന്നുണ്ടെന്നാണ് മനസ്സിലാക്കുന്നത്. തിരുവനന്തപുരം സിറ്റിയില് ഇത്തരം വാഹനങ്ങള് ഈയിടെ പരിശോധിച്ചതില് രൂപമാറ്റം വരുത്തിയതും വേണ്ടത്ര രേഖകളില്ലാത്തതുമായ 30 വാഹനങ്ങള് പിടിച്ചെടുത്തു. ഇവയില് രൂപമാറ്റത്തിന് അനുമതിയില്ലാത്ത വാഹനങ്ങളുടെ രജിസ്ട്രേഷന് ക്യാന്സല് ചെയ്യുന്നതുള്പ്പെടെയുള്ള നടപടികള്ക്കായി ശുപാര്ശ ചെയ്യും. കൂടാതെ, ഇത്തരം നിയമലംഘനം നടത്തുന്നവര്ക്കെതിരെ മോട്ടോര് വെഹിക്കിള് ആക്റ്റ് പ്രകാരം പിഴ ചുമത്താനുള്ള നടപടിയും സ്വീകരിച്ചു വരുന്നു. തിരുവനന്തപുരം സിറ്റി പോലീസ് നടത്തിയ ഇത്തരത്തിലുള്ള പരിശോധന മറ്റു ജില്ലകളിലും നടപ്പാക്കാന് നിര്ദ്ദേശം നല്കിയിട്ടുണ്ട്.
ഇത്തരം രൂപമാറ്റം വരുത്തിയ വാഹനം ഓടിക്കുന്നത് റോഡ് ഉപയോഗിക്കുന്ന മറ്റ് സഹയാത്രികരുടേയും ജീവനു ഭീഷണിയാണ്. ആയതിനാല് നിയമപ്രകാരമല്ലാതേയും ആവശ്യമായ അനുമതി വാങ്ങാതേയും വാഹനങ്ങളില് രൂപമാറ്റം വരുത്തി ഉപയോഗിക്കുന്നതില് ആരും ഏര്പ്പെടരുതെന്ന് അഭ്യര്ത്ഥിക്കുന്നു.
https://www.facebook.com/Malayalivartha
