പോപ്പുലര്‍ ഫ്രണ്ട് തിരുവനന്തപുരത്ത് നടത്തുന്ന ഞങ്ങള്‍ക്കും പറയാനുണ്ട് മഹാസമ്മേളനം കേന്ദ്ര സര്‍ക്കാരിന്റെ കര്‍ശന നിരീക്ഷണത്തിലാണ് നടന്നത്. മഹാസമ്മേളനം റിപ്പോര്‍ട്ട് ചെയ്യാന്‍ കേന്ദ്ര ഇന്റലിജന്‍സ് ഏജന്‍സികള്‍ തിരുവനന്തപുരത്തുണ്ടായിരുന്നു. സമ്മേളനം കഴിയുന്നതോടെ സംഘടന നിരോധിക്കാനാണ് കേന്ദ്ര സര്‍ക്കാരിന്റെ നീക്കം.

അതേ സമയം കിഴക്കേക്കോട്ടയില്‍ സ്വകാര്യബസിന് നേരെ പോപ്പുലര്‍ഫ്രണ്ട് നടത്തിയ ആക്രമണം അവര്‍ക്ക് തന്നെ വിനയാകും. 25 പേര്‍ക്കെതിരേയാണ് കേസെടുത്തത്. ഇതിനിടെ അനുമതിയില്ലാതെ റാലി നടത്തിയതില്‍ പോലീസ് കേസുമെടുത്തു. ഇതെല്ലാം ഫലത്തില്‍ പോപ്പുലര്‍ ഫ്രണ്ടിന് എതിരാകാനാണ് സാധ്യത.

സംഘടനക്ക് കേരള സര്‍ക്കാരിന്റെ പിന്തുണയുണ്ടെന്ന സംശയത്തിലാണ് കേന്ദ്ര സര്‍ക്കാര്‍. അതിനാല്‍ കേരള സര്‍ക്കാരിന്റെ നീക്കങ്ങളും കേന്ദ്രം സൂക്ഷ്മമായി നിരീക്ഷിക്കുന്നുണ്ട്.

പാര്‍ട്ടികള്‍ നിരോധിക്കുന്നതിനോട് തങ്ങള്‍ക്ക് യോജിപ്പില്ലെന്ന കോടിയേരിയുടെ പ്രസ്താവനയെ കേന്ദ്ര സര്‍ക്കാര്‍ ഗൗരവമായി കാണുന്നു. കേരളം തീവ്രവാദ സംഘടനകളെ സഹായിക്കുന്നുണ്ടെന്ന റിപ്പോര്‍ട്ട് ഇതിനകം കേന്ദ്രത്തിന് നല്‍കിയിട്ടുണ്ടെന്നാണ് കേള്‍ക്കുന്നത്. അങ്ങനെയാണെങ്കില്‍ അത് സംസ്ഥാന സര്‍ക്കാരിന്റെ നിലനില്പിനെ തന്നെ ബാധിക്കും.

കേരളത്തില്‍ ഏറെ നാളായി നിലനിന്നിരുന്ന സമാധാനാന്തരീക്ഷം ഇതോടെ ഇല്ലാതാവുകയാണ്. കണ്ണൂരില്‍ ബിജെപി നടത്തുന്ന യാത്രയും തിരുവനന്തപുരത്ത് പോപ്പുലര്‍ ഫ്രണ്ട് നടത്തുന്ന ഞങ്ങള്‍ക്കും പറയാനുണ്ട് മഹാസമ്മേളനവുമാണ് പൊതുവേ സ്വസ്ഥമായിരുന്ന അന്തരീക്ഷത്തെ ബുദ്ധിമുട്ടിലാക്കിയത്.

ബി ജെ പി യോടും പോപ്പുലര്‍ ഫ്രണ്ടിനോടുമുള്ള മുഖ്യധാരാ പാര്‍ട്ടികളുടെ മൃദുസമീപനം കേരളത്തെ കൂടുതല്‍ ഭയപ്പെടുത്തുകയാണ്.

ചുവപ്പ് ജിഹാദി ഭീകരതക്കെതിരെയാണ് ബി ജെ പി യാത്ര നടത്തുന്നത്. യാത്രക്ക് കേരളത്തിലെ സാധാരണക്കാരുമായി യാതൊരു ബന്ധവുമില്ലെങ്കിലും അടുത്ത മണിക്കൂറില്‍ എന്ത് സംഭവിക്കുമെന്ന അശങ്കയുണ്ട്. അമിത് ഷാ പിണറായിയിലേക്ക് വരുന്നില്ലെന്ന വാര്‍ത്ത വലിയ ആശ്വാസത്തോടെയാണ് കേരളം കേട്ടത്. അന്നേ ദിവസം പിണറായിയില്‍ ഹര്‍ത്താലായിരുന്നു. എതിര്‍ശബ്ദം കേള്‍ക്കാന്‍ ഇഷ്ടമില്ലാത്തവരാണ് സി പി എമ്മും ബി ജെ പിയും. ഏതായാലും അവിടെ ചോര പുഴ ഒഴുകിയില്ല.

പോപ്പുലര്‍ ഫ്രണ്ടിനെ നിരോധിക്കുമെന്നു കേള്‍ക്കുന്നതിനിടയിലാണ് ഞങ്ങള്‍ക്ക് പറയാനുണ്ട് എന്ന പേരില്‍ മഹാസമ്മേളനം നടക്കുന്നത്. ബി ജെ പിയും മറ്റ് സംഘടനകളും നടത്തുന്ന കൊലവിളികള്‍ നിയന്ത്രിക്കാന്‍ സംസ്ഥാന സര്‍ക്കാരിന് അധികാരമുണ്ടെങ്കിലും ആരും മിനക്കെടാറില്ല. ബി ജെ പിയുടെ ജാഥയിലെ ജിഹാദി പ്രയോഗത്തിനെത്തിരെ വ്യാപക പ്രതിഷേധമാണ് ഉയര്‍ന്നിട്ടുള്ളത്. എന്നാല്‍ അത് തിരുത്താന്‍ അവര്‍ തയ്യാറായിട്ടില്ല. അതിനര്‍ത്ഥം യുദ്ധത്തിന് തയ്യാറാണ് എന്നത് തന്നെ. വോട്ട് ലക്ഷ്യമിട്ട് നടക്കുന്ന കളികള്‍ സാധാരണക്കാരെ കുഴപ്പത്തിലാക്കും.