ഉടന് സമര്പ്പിക്കും; ദിലീപിനെ ഒന്നാം പ്രതിയാക്കാന് അന്വേഷണ സംഘത്തിന്റെ അടിയന്തിര യോഗത്തില് തീരുമാനം; കൃത്യം നടത്തിയത് ദിലീപിന്റെ നേരിട്ടുള്ള നേതൃത്വത്തില് തന്നെ
നടിയെ ആക്രമിച്ച കേസില് ദിലീപിനെ ഒന്നാം പ്രതിയാക്കാന് അന്വേഷണ സംഘത്തിന്റെ അടിയന്തിര യോഗത്തില് തീരുമാനം. കൃത്യം നടത്തിയത് ദിലീപിന്റെ നേരിട്ടുള്ള നേതൃത്വത്തിലാണെന്നും അന്വേഷണ സംഘം വിലയിരുത്തി.
നിലവില് പള്സര് സുനിയെന്ന സുനില്കുമാറാണ് ഒന്നാംപ്രതി. ദിലീപ് പതിനൊന്നാം പ്രതിയാണിപ്പോള്. അതേസമയം, കുറ്റപത്രം തയ്യാറാണെന്ന് ആലുവ റൂറല് എസ്.പി എ.വി. ജോര്ജ് വ്യക്തമാക്കി. കുറ്റപത്രം ഉടന് കോടതിയില് സമര്പ്പിക്കും.
പള്സര് സുനിക്ക് നടിയോട് മുന്വൈരാഗ്യം ഇല്ലെന്നും എല്ലാ കാര്യങ്ങളും നടന്നത് ദിലീപിന്റെ മേല്നോട്ടത്തിലാണെന്നുമാണ് പൊലീസിന്റെ കണ്ടെത്തല്. അതുകൊണ്ട് തന്നെ സെലബ്രിറ്റി പ്രതിയോട് യാതൊരു ദാക്ഷണ്യവും വേണ്ടെന്നാണ് എഡിജിപി സന്ധ്യ അടക്കമുള്ളമുള്ള അന്വേഷണ സംഘം വിലയിരുത്തുന്നത്.നടിയെ തട്ടിക്കൊണ്ടു പോയി ഉപദ്രവിക്കാന് ക്വട്ടേഷന് നല്കിയത് ദിലീപാണ്. നിലവില് ദിലീപ് 11ാം പ്രതിയും സുനില്കുമാര് എന്ന പള്സര് സുനി ഒന്നാം പ്രതിയുമാണ്. കൂട്ടമാനഭംഗം, ഗൂഢാലോചന, തട്ടിക്കൊണ്ടുപോകല്, തെളിവു നശിപ്പിക്കല്, പ്രതിയെ സംരക്ഷിക്കല്, തൊണ്ടിമുതല് സൂക്ഷിക്കല്, ഭീഷണി, അന്യായമായി തടങ്കലില് വയ്ക്കല് തുടങ്ങിയ വകുപ്പുകള് ദിലീപിനെതിരെ ചുമത്തും.
കുറ്റപത്രത്തിനൊപ്പം നല്കാന് നേരിട്ടുള്ള തെളിവുകളുടെയും സാഹചര്യ തെളിവുകളുടെയും അനുബന്ധ റിപ്പോര്ട്ടും പൊലീസ് തയാറാക്കി. യുവനടി ഉപദ്രവിക്കപ്പെട്ട് എട്ടു മാസം തികയുന്ന ദിവസം കുറ്റപത്രം നല്കാന് തീരുമാനിച്ചിരുന്നെങ്കിലും മാറ്റിവയ്ക്കുകയായിരുന്നു. ഒരാഴ്ചയ്ക്കുള്ളില് കുറ്റപത്രം സമര്പ്പിക്കാനാണു പൊലീസിന്റെ ശ്രമം. നിയമവിദഗ്ധരും മുതിര്ന്ന പൊലീസ് ഉദ്യോഗസ്ഥരും പങ്കെടുക്കുന്ന യോഗത്തിനു ശേഷം അടുത്ത ദിവസങ്ങളില് തന്നെ പ്രത്യേക അന്വേഷണ സംഘം കോടതിയില് കുറ്റപത്രം സമര്പ്പിക്കും. സമീപകാലത്തു കേരള പൊലീസ് തയാറാക്കിയ ഏറ്റവും സമഗ്രവും സൂക്ഷ്മവുമായ കുറ്റപത്രമാണിതെന്ന് അന്വേഷണ സംഘത്തിലെ മുതിര്ന്ന ഉദ്യോഗസ്ഥന് പറഞ്ഞു.
ഇരുപതിലേറെ നിര്ണായക തെളിവുകള് ചൂണ്ടിക്കാട്ടിയിട്ടുണ്ട്. കുറ്റസമ്മത മൊഴികള്, സാക്ഷിമൊഴികള്, കോടതി മുന്പാകെ നല്കിയ രഹസ്യ മൊഴികള്, ഫൊറന്സിക് റിപ്പോര്ട്ടുകള്, സൈബര് തെളിവുകള്, നേരിട്ടുള്ള തെളിവുകള്, സാഹചര്യ തെളിവുകള് എന്നിവ പട്ടികയാക്കി പ്രത്യേക ഫയലുകളാക്കിയാണ് അനുബന്ധ കുറ്റപത്രമായി സമര്പ്പിക്കുന്നത്. ഇതുവരെ പൊലീസ് വെളിപ്പെടുത്താത്ത വിവരങ്ങളും കുറ്റപത്രത്തിലുണ്ടെന്നാണു സൂചന.
നടിയെ ആക്രമിച്ച കേസില് പള്സര് സുനിയടക്കമുള്ള പ്രതികള്ക്കെതിരെ നേരത്തെ കുറ്റപത്രം നല്കിയിരുന്നു. ഗൂഢാലോചന കേസില് ദിലീപിനെതിരെ ഇതിന് അനുബന്ധമായാണ് കുറ്റപത്രം നല്കുക. നടിയുടെ അശ്ലീലദൃശ്യങ്ങള് പകര്ത്താന് ദിലീപ് ക്വട്ടേഷന് നല്കിയെന്ന സുനിയുടെ വെളിപ്പെടുത്തല് അടിസ്ഥാനമാക്കിയാണ് തുടരന്വേഷണം നടത്തി ദിലീപിനെ പ്രതിയാക്കിയത്. അറസ്റ്റിലായ ദിലീപ് 85 ദിവസത്തെ ജയില്വാസത്തിനുശേഷമാണ് ആലുവ സബ് ജയിലില് നിന്ന് ജാമ്യത്തിലിറങ്ങിയത്.
ഗൂഢാലോചനക്കുറ്റത്തിന് പുറമേ കൂട്ട മാനഭംഗം, തട്ടിക്കൊണ്ടുപോകല്, തെളിവ് നശിപ്പിക്കല് തുടങ്ങിയ കുറ്റങ്ങളും ദിലീപിനെതിരെ ചുമത്തിയാകും കുറ്റപത്രം നല്കുക. ഗായിക റിമി ടോമിയടക്കം 21 പേരുടെ രഹസ്യമൊഴികളും സാക്ഷിമൊഴികളും കുറ്റസമ്മത മൊഴികളും ഫോറന്സിക് പരിശോധനാ ഫലവും ഫോണ് കോള് രേഖ ടവര് ലൊക്കേഷന് വിവരങ്ങളും തുടങ്ങിയവ അടിസ്ഥാനമാക്കിയാണ് കുറ്റപത്രം തയ്യാറാക്കുന്നത്. ദൃശ്യങ്ങള് പകര്ത്താനുപയോഗിച്ച മൊബൈലും മെമ്മറികാര്ഡും ഇനിയും കണ്ടെടുക്കാന് കഴിഞ്ഞിട്ടില്ല. ഇവ കണ്ടെത്താന് തുടരന്വേഷണത്തിന് പൊലീസ് കോടതിയില് അനുമതി തേടും. ഇതോടൊപ്പം കേസിന്റെ വിചാരണയ്ക്കായി പ്രത്യേക കോടതി വേണമെന്ന ആവശ്യം സര്ക്കാരിനോട് ഉന്നയിക്കുന്നുണ്ട്.
ഫെബ്രുവരി 17 നാണ് തൃശൂരില് നിന്ന് കൊച്ചിയിലേക്ക് വരുന്ന വഴി നടി ആക്രമിക്കപ്പെട്ടത്. മഞ്ജുവാര്യരുമൊത്തുള്ള വിവാഹജീവിതം തകര്ത്തതിലുള്ള പക നിമിത്തമാണ് നടിക്കെതിരെ ദിലീപ് ക്വട്ടേഷന് നല്കിയതെന്നും ഒന്നരക്കോടി രൂപയുടെ ക്വട്ടേഷനാണ് നല്കിയതെന്നും പ്രോസിക്യൂഷന് കോടതിയില് നേരത്തെ വ്യക്തമാക്കിയിരുന്നു.
https://www.facebook.com/Malayalivartha
