അസംഘടിത മേഖലയിലെ തൊഴിലാളികള്ക്ക് മിനിമംവേതനം നല്കാത്ത തൊഴിലുടമകള്ക്ക് അഞ്ചുലക്ഷം വരെ പിഴ
അസംഘടിത മേഖലയിലെ തൊഴിലാളികള്ക്ക് മിനിമംവേതനം നല്കാത്ത തൊഴിലുടമകള്ക്ക് അഞ്ചുലക്ഷം വരെ പിഴ ശിക്ഷ നല്കാനുള്ള വ്യവസ്ഥകളടങ്ങിയ, നിയമസഭ പാസാക്കിയ ബില്ലില് രാഷ്ട്രപതി രാംനാഥ് കോവിന്ദ് ഒപ്പുവച്ചു. ഇതോടെ സര്ക്കാര് നിശ്ചയിച്ച മിനിമംകൂലി തൊഴിലാളികളുടെ അവകാശമായി മാറി. ഭരണഘടനയുടെ 254(2) അനുച്ഛേദപ്രകാരം നിയമസഭ പാസാക്കിയ ബില്ലിന് രാഷ്ട്രപതി അംഗീകാരം നല്കിയാല് അതാണ് ആ സംസ്ഥാനത്തെ നിയമം.
കേന്ദ്രതൊഴില് മന്ത്രാലയത്തിന്റെ മിനിമം വേജസ് നിയമഭേദഗതി ബില് പ്രാബല്യത്തിലായാലും കേരളത്തില് നിയമസഭ പാസാക്കിയ മിനിമം വേജസ് ആക്ട് നിലനില്ക്കുമെന്ന് നിയമസെക്രട്ടറി ബി.ജി.ഹരീന്ദ്രനാഥ് പറഞ്ഞു.
തൊഴിലാളികള്ക്ക് മിനിമംകൂലി നിഷേധത്തിന് ആദ്യതവണ ഒരുലക്ഷമാണ് പിഴയെങ്കിലും തുടര്ച്ചയായി മിനിമംകൂലി നല്കാതിരുന്നാല് അഞ്ചുലക്ഷം വരെ പിഴയീടാക്കാം. മുന്പ് 500 രൂപയായിരുന്ന പിഴ 5,000രൂപയാക്കി വര്ദ്ധിപ്പിക്കാനാണ് മന്ത്രി ജി.സുധാകരന് ഭേദഗതി കൊണ്ടുവന്നതെങ്കിലും നിയമസഭാ സബ്ജക്ട് കമ്മി?റ്റിയുടെ നിര്ദ്ദേശം അംഗീകരിച്ച് പിഴ ഒരുലക്ഷമാക്കി വര്ദ്ധിപ്പിക്കുകയായിരുന്നു. വ്യാജപരാതികള് നല്കുന്ന തൊഴിലാളിക്ക് ചുമത്തിയിരുന്ന പിഴ 50രൂപയില്നിന്ന് 100രൂപയാക്കി. 1,000 രൂപയായി ഉയര്ത്താനായിരുന്നു ബില്ലിലെ നിര്ദ്ദേശമെങ്കിലും സബ്ജക്ട് കമ്മിറ്റി 100രൂപയാണ് നിശ്ചയിച്ചത്. ഈ ഭേദഗതികളെല്ലാം രാഷ്ട്രപതി അംഗീകരിച്ചു.
80 മേഖലകളില് തൊഴിലെടുക്കുന്നവര്ക്ക് സര്ക്കാര് നിശ്ചയിച്ചിട്ടുള്ള മിനിമംകൂലി നല്കാത്ത തൊഴിലുടമകള് ഇനി വന്തുക പിഴ നല്കേണ്ടിവരും. മിനിമംകൂലി സംബന്ധിച്ച പരാതികളില് 10,000 രൂപ വരെ മാത്രം പിഴ ചുമത്താനുള്ള അധികാരമായിരുന്നു മജിസ്ട്രേട്ടുമാര്ക്കുണ്ടായിരുന്നത്. ഈ പരിധി ഇനിമുതല് നിലവിലുണ്ടാവില്ല. മിനിമംകൂലി സംബന്ധിച്ച തര്ക്കങ്ങള് പരിഹരിക്കാന് ഏഴ് ജോയിന്റ് ലേബര് കമ്മിഷണര്മാര്ക്ക് കൂടി അധികാരം നല്കിയിട്ടുണ്ട്. മജിസ്ട്രേട്ടുമാര്ക്കു പുറമെ റവന്യൂറിക്കവറി ഉദ്യോഗസ്ഥര്ക്കുകൂടി ശിക്ഷ വിധിക്കാനുള്ള അധികാരം ലഭിക്കും.
അസംഘടിത മേഖലയിലെ തൊഴിലാളിചൂഷണം പൂര്ണമായി അവസാനിപ്പിക്കാനാണ് സര്ക്കാര് മിനിമംകൂലി ഭേദഗതി കൊണ്ടുവന്നത്. ചെറുകിട തോട്ടങ്ങള്, കടലാസ് നിര്മ്മാണമേഖല, സ്വകാര്യധനകാര്യ സ്ഥാപനങ്ങള്, സെക്യൂരിറ്റി സര്വീസ്, ഉച്ചഭക്ഷണപദ്ധതിയിലെ തൊഴിലാളികള്, കൊറിയര് സര്വീസ്, ഇന്റര്നെറ്റ് കഫേ, ഹൗസ്ബോട്ട് സര്വീസ്, ബാങ്കിംഗ് നോണ്ബാങ്കിംഗ് ഇന്ഷ്വറന്സ്, ആനപരിപാലനം, സംരക്ഷണം, വിദേശനാണ്യവിനിമയ സ്ഥാപനങ്ങള് അടക്കമുള്ള അസംഘടിതമേഖലയിലെ തൊഴിലാളികള്ക്ക് കുറഞ്ഞവേതനം സര്ക്കാര് നിശ്ചയിച്ചിട്ടുണ്ട്.
1948ലെ കുറഞ്ഞകൂലി സംബന്ധിച്ച കേന്ദ്രനിയമം അടിസ്ഥാനമാക്കിയാണ് സര്ക്കാര് എല്ലാ മേഖലകളിലെയും മിനിമം കൂലി നിശ്ചയിച്ചത്. മിനിമം കൂലിക്കു പുറമേ ക്ഷാമബത്ത, സര്വീസ് വെയിറ്റേജ്, അധികജോലിക്ക് കൂടുതല്വേതനം, റിസ്ക്അലവന്സ് എന്നിവയും നിര്ബന്ധമാണ്. ആനപരിപാലനം നടത്തുന്ന എല്ലാ തൊഴിലാളികള്ക്കും ഇന്ഷ്വറന്സ് പരിരക്ഷ നല്കണം. ചെറുകിടതോട്ടങ്ങളിലെ തൊഴിലാളികള്ക്ക് 1948ലെ നിയമത്തിന്റെ 27ാംസെക്ഷന് പ്രകാരമാണ് മിനിമംകൂലി നിശ്ചയിച്ചിട്ടുള്ളത്. അടിസ്ഥാനശമ്പളത്തിനു പുറമേ ക്ഷാമബത്തയും നഗരപ്രദേശങ്ങള്ക്ക് പ്രത്യേകഅലവന്സും സേവന കാലാവധി കണക്കിലെടുത്തുള്ള വെയിറ്റേജ് ആനുകൂല്യവും ചേര്ത്താണ് മിനിമംകൂലി നിശ്ചയിച്ചത്.
https://www.facebook.com/Malayalivartha
