വിമാന ഇന്ധനം കയറ്റിവന്ന ടാങ്കര്ലോറി തലകീഴായി മറിഞ്ഞു; രക്ഷാപ്രവര്ത്തകരുടെ സമയോചിത ഇടപെടല് മൂലം ഒഴിവായത് വന്ദുരന്തം
വിമാന ഇന്ധനം കയറ്റി വന്ന ടാങ്കര് ലോറി തലകീഴായി മറിഞ്ഞ് ഇന്ധനം ചോര്ന്നതു നാടിനെ മുള്മുനയിലാക്കി. രക്ഷാപ്രവര്ത്തകരുടെ സമയോചിതമായ ഇടപെടല് മൂലം വന് ദുരന്തം ഒഴിവായി. ദേശീയ പാതയില് പുറക്കാട് പുത്തന്നട ജങ്ഷന് സമീപം ഇന്നലെ പുലര്ച്ചെ ഒരു മണിയോടെയായിരുന്നു അപകടം. എറണാകുളത്തെ അമ്പലമുകള് ഭാരത് പെട്രോളിയം കമ്പനിയില്നിന്നു വിമാന ഇന്ധനവും കയറ്റി തിരുവനന്തപുരത്തേക്ക് പോയ ടാങ്കര് ലോറിയാണ് അപകടത്തില്പെട്ടത്. ഡ്രൈവര് ഉറങ്ങിയതാണ് അപകട കാരണമെന്നു പോലീസ് പറഞ്ഞു. അപകടത്തില് പരുക്കേറ്റ ലോറി ക്ലീനര് ഉത്തര്പ്രദേശുകാരന് സന്തോഷ് കുമാറിനെ ആലപ്പുഴ മെഡിക്കല് കോളജ് ആശുപത്രിയില് പ്രവേശിപ്പിച്ചു.
ലോറി തലകീഴായി മറിഞ്ഞതോടെ ഒരു ഭാഗം തകര്ന്ന് ഇന്ധനം ചോരാന് തുടങ്ങി. അഞ്ച് അറകളിലായി ആകെ 25000 ലിറ്റര് ഇന്ധനമാണുണ്ടായിരുന്നത്. ഇന്ധനം ചോര്ന്നതോടെ പ്രദേശമാകെ ഭീതിയിലായി. തുടര്ന്ന് ഭാരത് പെട്രോളിയത്തിന്റേയും തകഴി, ഹരിപ്പാട് എന്നിവിടങ്ങളില്നിന്നുള്ള ഫയര്ഫോഴ്സ് സംഘവും അമ്പലപ്പുഴ സി.ഐ: ബിജു വി.നായര്, എസ്.ഐ. പ്രതീഷ് കുമാര് എന്നിവരുടെ നേതൃത്വത്തിലുള്ളപോലീസും പെട്രോളിയം കമ്പനിയുടെ നാലംഗ ദൗത്യസേനയുമെത്തി രക്ഷാപ്രവര്ത്തനം ആരംഭിച്ചു.
മൂന്ന് ക്രെയിന് ഉപയോഗിച്ചു ലോറി ഉയര്ത്തി. ഏകദേശം ഒന്നര മണിക്കൂറോളം ദേശീയ പാതയില് ഗതാഗതം സ്തംഭിച്ചു. അപകടത്തില്പ്പെട്ട ടാങ്കര് ലോറിയില്നിന്നു മറ്റൊരു ലോറിയിലേക്ക് ഇന്ധനം മാറ്റി. 18 ലക്ഷം രൂപയുടെ നഷ്ടം കണക്കാക്കുന്നതായി ഭാരത് പെട്രോളിയം കമ്പനി അധികൃതര് പറഞ്ഞു.
https://www.facebook.com/Malayalivartha
