താജ്മഹലിനെതിരെ ബിജെപി നേതാക്കളുടെ പ്രചാരണത്തിനെതിരെ എഴുത്തുകാരിയും അധ്യാപികയുമായി ദീപാ നിശാന്ത് രംഗത്ത്. 'ഹിന്ദുക്കളെ ദ്രോഹിച്ച' ഷാജഹാന്റെ താജ്മഹലിനെ ചരിത്രത്തില്‍ നിന്ന് നീക്കാന്‍ സര്‍ക്കാര്‍ ശ്രമിച്ചുകൊണ്ടിരിക്കുകയാണെന്ന് പറയാന്‍ മാത്രം അധഃപതിച്ച ജനപ്രതിനിധികള്‍ തന്നെയാണ് ഇന്ത്യയുടെ തീരാക്കളങ്കം എന്നും ദീപാ നിശാന്ത് പറയുന്നു.

ന്യൂനപക്ഷങ്ങള്‍ക്കെതിരെ നുണപ്രചാരണങ്ങള്‍ നടത്തി വിദ്വേഷം വളര്‍ത്തുന്ന തന്ത്രം ചരിത്രത്തില്‍ എല്ലായിടത്തും ഫാസിസ്റ്റുകള്‍ പയറ്റിത്തെളിഞ്ഞതാണ്. അപരമതവിദ്വേഷത്തിലധിഷ്ഠിതമായ പ്രത്യയശാസ്ത്രമാണ് അവരുടെ അടിസ്ഥാന പ്രമാണം. ഒരാള്‍ നുണ പറയുന്നതു പോലെയല്ല ഒരു കൂട്ടം ആളുകള്‍ നുണ പ്രചരിപ്പിക്കുന്നത്. നുണകള്‍ ആവര്‍ത്തിച്ച് ചരിത്രത്തെ അവര്‍ വളച്ചൊടിക്കുമെന്നും ദീപ പറയുന്നു.

ഗുജറാത്തിലെ കുട്ടികള്‍ പഠിക്കുന്ന പുസ്തകങ്ങളില്‍ ഇന്നത്തെ ജറുസലേം ' യദുനിഷാദാലയ' മായി മാറുന്നത് അങ്ങനെയാണ്. യാദവരെ ആട്ടിയോടിച്ച് െ്രെകസ്തവര്‍ പിടിച്ചെടുത്ത ജറുസലേമിനെ ഹിന്ദുക്കള്‍ ഗൃഹാതുരതയോടെ നോക്കണം! നെടുവീര്‍പ്പിടണം! ലക്ഷ്യം അതുതന്നെ! പാരീസ് 'പരമേശ്വരീയ' മാണെന്ന് പാഠപുസ്തകങ്ങളില്‍ വായിച്ചു പഠിക്കുന്ന കുട്ടി അതൊരു ആധികാരികരേഖയായി മനസ്സില്‍ പ്രതിഷ്ഠിക്കും.

ഇന്തോനേഷ്യയിലെ 'ബാലിദ്വീപി'നേയും അഫ്ഗാനിസ്ഥാനിലെ കാണ്ഡഹാറിനേയുമൊക്കെ വൈകാരികത ഉണര്‍ത്തുന്ന നുണപ്രചാരണങ്ങളിലൂടെ തങ്ങളുടേതാക്കി മാറ്റാന്‍ ശ്രമിക്കുന്ന അതേ ആളുകള്‍ തന്നെയാണ് ഇപ്പോള്‍ താജ്മഹലിന്റെ ചരിത്രത്തെയും വളച്ചൊടിക്കാന്‍ ശ്രമിക്കുന്നത് എന്നും ദീപ നിശാന്ത് പറയുന്നു.