സുരക്ഷയ്ക്കായി ദിലീപ് സ്വകാര്യ ഏജന്‍സിയെ വെച്ചതില്‍ ജാമ്യവ്യവസ്ഥയുടെ ലംഘനമുണ്ടോ എന്ന് പൊലീസ് പരിശോധിക്കുന്നു. അതേസമയം താരത്തെ സമ്മര്‍ദ്ദത്തിലാക്കാനുള്ള അന്വേഷണ സംഘത്തിന്റെ തന്ത്രം മാത്രമാണിതെന്ന് നിയമവിദഗ്ധര്‍ ചൂണ്ടിക്കാട്ടുന്നു. സുരക്ഷാ ഏജന്‍സിയെ ചുമതലപ്പെടുത്തിയില്ലെന്നും അതിനുള്ള ചര്‍ച്ചകള്‍ മാത്രമാണ് നടന്നതെന്നുമുള്ള ദിലീപിന്റെ വിശദീകരണം പൊലീസ് വിശ്വസിച്ചിട്ടില്ല. ഇത് ശരിയാണോ എന്ന് പരിശോധിക്കാന്‍ തണ്ടര്‍ഫോഴ്‌സ് എന്ന സെക്യൂരിറ്റി ഏജന്‍സിയുടെ തൃശൂരിലെ ഓഫീസില്‍ പൊലീസ് പരിശോധന നടത്തിയിരുന്നു. ബന്ധപ്പെട്ടവരെ ചോദ്യം ചെയ്താലേ കാര്യങ്ങള്‍ സ്ഥിരീകരിക്കനാവൂ എന്ന് പൊലീസ് പറയുന്നു. എങ്ങനെയും താരത്തിന്റെ ജാമ്യം റദ്ദാക്കാനുള്ള പഴതുകള്‍ക്കായി അന്വേഷണ സംഘം കാത്തിരിക്കുകയാണ്. 

ഗോവ ആസ്ഥാനമാക്കി പ്രവര്‍ത്തിക്കുന്ന തണ്ടര്‍ഫോഴ്‌സിന് കേരളത്തില്‍ ആയുധം ഉപയോഗിക്കാന്‍ ലൈസന്‍സ് ഉണ്ടോ എന്നും പൊലീസ് പരിശോധിക്കുന്നുണ്ട്. അതേസമയം ഇന്ത്യയിലെവിടെയും ആയുധങ്ങള്‍ ഉപയോഗിക്കാന്‍ ലൈസന്‍സ് ഉണ്ടെങ്കില്‍ സംസ്ഥാനത്ത് മാത്രമായി പ്രത്യേകം ലൈസന്‍സ് വേണ്ട. അതേസമയം ദിലീപ് സുരക്ഷയ്ക്ക് സഹായം വേണമെന്ന് അപേക്ഷ നല്‍കിയതുമായി ബന്ധപ്പെട്ട രേഖകള്‍ ഗോവയിലെ ഓഫീസിലാണെന്നാണ് തൃശൂര്‍ ഓഫീസിലുള്ളവര്‍ പറയുന്നത്. ഇത് അന്വേഷണ സംഘം വിശ്വസിച്ചിട്ടില്ല. പൊലീസ് അന്വേഷണവുമായി ബന്ധപ്പെട്ട് രേഖകള്‍ മാറ്റിയതായാണ് വിവരം. ഗോവയിലെ ഓഫീസില്‍ ഇവിടുന്ന് പൊലീസ് ചെന്ന് വിവരങ്ങള്‍ പരിശോധിച്ച് , കണ്ടെത്തുന്നതിന് സമയമെടുക്കും. ഇത് മുന്‍കൂട്ടി മനസിലാക്കിയാണ് രേഖകള്‍ മാറ്റിയതെന്നും സംശയമുണ്ട്. 

തനിക്കെതിരെ പരാതി നല്‍കിയവരില്‍ നിന്ന് ഭീഷണിയുണ്ടെന്നാണ് ആലുവ പൊലീസിനോട് ദിലീപ് വ്യക്തമാക്കിയത്. എന്നാല്‍ അതാരൊക്കെയാണ് പൊലീസ് വ്യക്തമാക്കിയിട്ടില്ല. മുമ്പ് പള്‍സര്‍ സുനിയും കൂട്ടാളികളും തന്നെ ആക്രമിക്കാന്‍ സാധ്യതയുണ്ടെന്നും അതിനാല്‍ അവരെ പാര്‍പ്പിച്ചിരിക്കുന്ന കാക്കനാട് ജയിലില്‍ തന്നെ ഇടരുതെന്ന് ദിലീപ് അങ്കമാലി മജിസ്‌ട്രേട്ട് കോടതിയെ അറിയിച്ചിരുന്നു. തുടര്‍ന്നാണ് താരത്തെ ആലുവ സബ് ജയിലിലേക്ക് മാറ്റിയത്. കൊച്ചിയിലെ അറിയപ്പെടുന്ന ഗുണ്ടയായ പള്‍സറിന് വിവിധ ക്വട്ടേഷന്‍ സംഘങ്ങളുമായും മറ്റ് ഗുണ്ടകളുമായും അടുത്ത സൗഹൃദമാണുള്ളത്. അവരെ ഉപയോഗിച്ച് പള്‍സര്‍ തന്നെ ആക്രമിച്ചേക്കാമെന്ന് താരം ഭയക്കുന്നുണ്ട്. മാത്രമല്ല നടിയെ ആക്രമിച്ച സംഭവത്തിന് ശേഷം കൊച്ചിയില്‍ സിനിമാ മേഖലയില്‍ നിന്ന് ഗുണ്ടകളുടെ സാനിധ്യം ഏതാണ്ട് ഇല്ലാതായിട്ടുണ്ട്. ഇതും ക്വട്ടേഷന്‍ സംഘങ്ങളെ ചൊടിപ്പിച്ചിട്ടുണ്ട്. ഇതെല്ലാം അറിഞ്ഞ ശേഷമാണ് ദിലീപ് സുരക്ഷാ ഏജന്‍സിയെ വയ്ക്കാന്‍ ആലോചിച്ചതെന്ന് അറിയുന്നു.