മന്ത്രി തോമസ്ചാണ്ടി കായല്‍ കൈയ്യേറിയെന്ന ആരാപണങ്ങളില്‍ റവന്യൂ പ്രിന്‍സിപ്പല്‍ സെക്രട്ടറിക്ക് ആലപ്പുഴ കളക്ടര്‍ ടി.വി അനുപമ സമര്‍പ്പിച്ച റിപ്പോര്‍ട്ട് റവന്യൂ മന്ത്രി കാണുന്നതിനു മുമ്പ് റിപ്പോര്‍ട്ടിലെ ഉള്ളടക്കം മാധ്യമങ്ങള്‍ക്ക് ചോര്‍ത്തി നല്‍കിയത് കളക്ടറേറ്റ് ജീവനക്കാരെന്ന് ആക്ഷേപം. നിലവില്‍ തിരുവനന്തപുരത്തുള്ള റിപ്പോര്‍ട്ട് ചോര്‍ന്നത് ആലപ്പുഴ ജില്ലയില്‍ നിന്നാണെന്ന് മലയാള മനാരമയുടെയും ഏഷ്യാനെറ്റിന്റെയും ലേഖകന്മാര്‍ അവിടെ നിന്നും നല്‍കിയ വാര്‍ത്തകള്‍ വ്യക്തമാക്കുന്നു. 

തിങ്കളാഴ്ചത്തെ മനോരമ ദിനപത്രം റിപ്പോര്‍ട്ടിലെ ഉള്ളടക്കം ഏറെക്കുറെ അതേപടി നല്‍കിയിട്ടുണ്ട്. ഞായറാഴ്ച്ച മുതല്‍ ഏഷ്യാനെറ്റും വളളിപുള്ളി വിടാതെ തങ്ങള്‍ പറഞ്ഞു വന്ന തരത്തിലാണ് റിപ്പോര്‍ട്ടെന്ന് ആവര്‍ത്തിച്ച് വാര്‍ത്ത നല്‍കിയിരുന്നു. ഇതിനര്‍ത്ഥം കളക്ടര്‍ , വകുപ്പു സെക്രട്ടറിക്കു നല്‍കിയ രഹസ്യ സ്വഭാവമുള്ള റിപ്പോര്‍ട്ട് ചോര്‍ന്നു. അല്ലെങ്കില്‍ ചോര്‍ത്തി. ഇതോടെ റിപ്പോര്‍ട്ട് ചോര്‍ന്നത് ആലപ്പുഴ ജില്ലാ കളക്ടറുടെ ഓഫീസില്‍ നിന്നു തന്നെയെന്ന് വ്യക്തമെന്ന് എന്‍.സി.പി സംസ്ഥാന നേതൃത്വം സംശയിക്കുന്നു.

കുറേനാളായി പാര്‍ട്ടിയേയും നേതാക്കന്‍മാരെയും കരിവാരിത്തേക്കാനുള്ള ശ്രമങ്ങളാണ് മാധ്യമങ്ങളുടേത് അടക്കമുള്ളവരുടെ ഭാഗത്ത് നിന്ന് ഉണ്ടാകുന്നു. നല്ല രീതിയില്‍ ഭരണം നടത്തിവന്ന എ.കെ ശശീന്ദ്രനെ പെണ്‍കെണിയില്‍ പെടുത്തി മംഗളം ചാനല്‍ പുറത്താക്കി. അതിന് പിന്നാലെയാണ് ഏഷ്യാനെറ്റ് തോമസ് ചാണ്ടിക്കെതിരെ വാര്‍ത്തകള്‍ നല്‍കുന്നത്. ഇക്കാര്യം പാര്‍ട്ടി ദേശീയ നേതൃത്വം പരിശോധിച്ചിരുന്നു. മന്ത്രിയുടെ ഭാഗത്ത് തെറ്റില്ലെന്ന് ദേശീയ നേതൃത്വം വ്യക്തമാക്കിയിരുന്നു. എന്നിട്ടും മാധ്യമങ്ങളും പ്രതിപക്ഷവും വേട്ടയാടുകയാണ്. സോളാര്‍ പുനരന്വേഷണം പ്രഖ്യാപിച്ചതിന് ശേഷമാണ് പ്രതിപക്ഷനേതാവ് രമേശ് ചെന്നിത്തല, മന്ത്രി തോമസ് ചാണ്ടിയുടെ ലേക്ക് പാലസ് റിസോര്‍ട്ടും പരിസരവും സന്ദര്‍ശിച്ചതും കയ്യേറ്റമുണ്ടെന്ന് പ്രഖ്യാപിച്ചതെന്നും എന്‍.സി.പി നേതാക്കള്‍ പറയുന്നു.