മന്ത്രി തോമസ് ചാണ്ടി ഭൂമി പരിവര്‍ത്തനപ്പെടുത്തിയെന്ന കളക്ടറുടെ അന്തിമറിപ്പോര്‍ട്ടിന്റെ പകര്‍പ്പ് പുറത്തായി. 2003 നുശേഷം റിസോര്‍ട്ട് ഭൂമിയുടെ രൂപത്തില്‍ മാറ്റം വന്നു. നിലം നികത്തി മറ്റൊരാളുടെ പേരിലാണെങ്കിലും കമ്പനിയുടെ നിയന്ത്രണത്തില്‍ അനുമതി വാങ്ങാതെ പാര്‍ക്കിങ് ഗ്രൗണ്ട് നിര്‍മിച്ചു തുടങ്ങിയ കാര്യങ്ങളാണ് കളക്ടറുടെ റിപ്പോര്‍ട്ടിലുള്ളത്. നെല്‍വയല്‍ തണ്ണീര്‍തട നിയമം അട്ടിമറിച്ചാണ് മന്ത്രിയുടെ കയ്യേറ്റമെന്ന് റിപ്പോര്‍ട്ട് പറയുന്നു.

ലേക് പാലസ് വിഷയം സംബന്ധിച്ചാണ് കളക്ടറുടെ റിപ്പോര്‍ട്ട്. വലിയകുളം മുതല്‍ സീറോ ജെട്ടി വരെയുള്ള റോഡ് നിര്‍മ്മാണം. പാര്‍ക്കിംഗ്, ബണ്ടിന്റെ വീതി കൂട്ടല്‍ എന്നിവയാണ് കളക്ടര്‍ അന്വേഷിച്ചത്. റവന്യു രേഖകളും ഉപഗ്രഹ ചിത്രങ്ങളും ആസ്പദമാക്കിയാണ് അന്വേഷണം പൂര്‍ത്തിയാക്കിയത്. പാര്‍ക്കിംഗ് സ്ഥലം മന്ത്രിയുടെ സഹോദരി ലീലമ്മ ജോസിന്റെ പേരിലാണ്. ഈ സ്ഥലം വര്‍ഷങ്ങളായി വാട്ടര്‍വേള്‍ഡ് ടൂറിസം കമ്പനിയുടെ കൈവശമാണ്.

2007 മുതലാണ് ഇത് കമ്പനിയുടെ കൈവശമെത്തിയത്. ഭൂമി നികത്തിയത് വാട്ടര്‍വേള്‍ഡ് ടൂറിസം കമ്പനിയാണെന്ന് പരോക്ഷമായാണ് കളക്ടറുടെ പരാമര്‍ശം. അതേസമയം തോമസ് ചാണ്ടിയുടെ നിലംനികത്തല്‍ കേസില്‍ സിപിഐഎം നിലപാട് ഇന്നറിയാം. രാവിലെ പത്തിന് തിരുവനന്തപുരം എ.കെ.ജി സെന്ററില്‍ ചേരുന്ന സെക്രട്ടേറിയറ്റ് യോഗം വിവാദം ചര്‍ച്ച ചെയ്യും. വിജിലന്‍സ് കോടതി ത്വരിതാന്വേഷണം നിര്‍ദേശിച്ച സാഹചര്യത്തില്‍ സിപിഐഎം നിലപാട് കടുപ്പിക്കാനാണ് സാധ്യത.

നിയമസഭയിലും പുറത്തും തോമസ്ചാണ്ടിയെ സംരക്ഷിക്കുന്ന നിലപാടായിരുന്നു മുഖ്യമന്ത്രിയും സിപിഐഎമ്മും സ്വീകരിച്ചിരുന്നത്. എന്നാല്‍ ജനജാഗ്രത യാത്രക്കിടെ മന്ത്രി നടത്തിയ പ്രസ്താവനകള്‍ സിപിഐഎം നേതൃത്വത്തെ ചൊടുപ്പിച്ചു. ഒപ്പം വിജിലന്‍സ് കോടതിയുടെ ത്വരിതാന്വേഷണം കൂടിയായതോടെയാണ് നിലപാടുമാറ്റത്തിനുള്ള സാധ്യത പാര്‍ട്ടിയില്‍ തെളിയുന്നത്. കുരുക്കുകള്‍ മുറുകുമ്പോഴും രാജിയില്ലെന്ന നിലപാടിലാണ് തോമസ്ചാണ്ടി.