സോളാര്‍ കേസിന്റെ കഥ കഴിഞ്ഞു ; ഇനി ഒരാഴ്‌ച കൂടി ആയുസ്‌
സോളാര്‍ കേസും സരിതയും ബിജുരാധാകൃഷ്‌ണനും ഓര്‍മ്മകളുടെ പിന്നാമ്പുറത്തേക്ക്‌. സോളാര്‍ കേസ്‌ പൂര്‍ണമായും അട്ടിമറിക്കപ്പെട്ടു. വി.എസ്‌.അച്യുതാനന്ദന്‍ ഫയല്‍ ചെയ്‌ത കേസില്‍ കേരള ഹൈക്കോടതിയുടെ ചീഫ്‌ ജസ്റ്റിസ്‌ അടങ്ങിയ ഡിവിഷന്‍ ബഞ്ച്‌ അടുത്തയാഴ്‌ച വിധി പറയുന്നതോടെ സോളാര്‍ കേസ്‌ ഐസ്‌ക്രീം പോലെ അലിഞ്ഞില്ലാതാകും.
സോളാര്‍ കേസില്‍ സര്‍ക്കാരിന്‌ ഒരു നഷ്‌ടവുമുണ്ടാകാത്ത സാഹചര്യത്തില്‍ സിബിഐ അന്വേഷണം ആവശ്യമില്ലെന്ന സര്‍ക്കാരിന്റെ സത്യവാങ്‌മൂലം കേരള ഹൈക്കോടതി സ്വീകരിക്കാനാണ്‌ സാധ്യത. പ്രതികളെ ഒഴിവാക്കുകയോ തട്ടിപ്പിന്‌ ഇരയായവര്‍ സര്‍ക്കാരിനെതിരെ ആരോപണം ഉന്നയിക്കുകയോ ചെയ്‌തിട്ടില്ലെന്ന്‌ സര്‍ക്കാര്‍ ഹൈക്കോടതിയില്‍ വ്യക്തമാക്കി.
തട്ടിപ്പുമായി ബന്ധപ്പെട്ട 35 കേസുകളും സിബിഐയ്‌ക്ക്‌ കൈമാറണമെന്ന അച്യുതാനന്ദന്റെ ആവശ്യം ഹൈക്കോടതി ചെലവു സഹിതം തള്ളിക്കളയാനാണ്‌ സാധ്യത. കേസില്‍ പ്രതിയായവരുടെ സാമ്പത്തിക ഇടപാടുകള്‍ അന്വേഷിക്കണമെന്നും വി.എസ്‌. ആവശ്യപ്പെട്ടിരുന്നു.
കേസുകള്‍ വിചാരണഘട്ടത്തിലാണെന്നും ഈ പശ്ചാത്തലത്തില്‍ ഇത്‌ സിബിഐക്ക്‌ കൈമാറുന്നത്‌ ശരിയല്ലെന്നുമാണ്‌ കേരള സര്‍ക്കാര്‍ വാദിച്ചത്‌. ഡല്‍ഹിയിലും തിരുവനന്തപുരത്തുമുള്ള പ്രമുഖ അഭിഭാഷകരുമായി കൂടിയാലോചിച്ച ശേഷമാണ്‌ സര്‍ക്കാര്‍ സത്യവാങ്‌മൂലം ഫയല്‍ ചെയ്‌തിരിക്കുന്നത്‌. വിഎസിന്റെ ആവശ്യം രാഷ്‌ട്രീയപ്രേരിതമാണെന്നും സോളാര്‍ കേസുമായി സര്‍ക്കാരിന്‌ യാതൊരു ബന്ധവുമില്ലെന്നും സര്‍ക്കാര്‍ ഹൈക്കോടതിയില്‍ വാദിച്ചു. അഴിമതി നിരോധന നിയമപ്രകാരമുള്ള കേസ്സുകള്‍ നടന്നിട്ടില്ലെന്ന്‌ പ്രത്യേക അന്വേഷണ സംഘം കണ്ടെത്തിയിട്ടില്ലെന്നും സര്‍ക്കാര്‍ പറഞ്ഞു. 6.01 കോടി രൂപയാണ്‌ പദ്ധതിക്കു വേണ്ടി സമാഹരിച്ചതെന്നും ഇതില്‍ അഞ്ചര കോടി രൂപ വ്യക്തിപരമായ ചിലവുകള്‍ക്കു വേണ്ടി വിനിയോഗിച്ചതാണെന്നും അന്വേഷണ സംഘം കണ്ടെത്തിയിട്ടുണ്ട്‌. ഇതില്‍ ഒരു രൂപ പോലും സര്‍ക്കാര്‍ പണമല്ല.എളുപ്പം പണക്കാരാവാനുള്ള ചിലരുടെ ശ്രമമാണ്‌ സോളാര്‍ കേസിനു പിന്നിലുണ്ടായതെന്നും സര്‍ക്കാര്‍ വാദിക്കുന്നു. പ്രതികളുടെ ബാങ്ക്‌ അക്കൗണ്ടുകള്‍ പരിശോധിച്ചതായും അന്വേഷണസംഘം കണ്ടെത്തിയിട്ടുണ്ട്‌.
ഏതായാലും സര്‍ക്കാര്‍ തലത്തില്‍ നടന്ന ഗൂഢാലോചനയെ കുറിച്ച്‌ ഇതില്‍ യാതൊരു പരാമര്‍ശവുമില്ല. ചില ഉദ്യോഗസ്ഥര്‍ ഇതുമായി ബന്ധപ്പെട്ട്‌ പ്രവര്‍ത്തിച്ചിട്ടുണ്ടെന്നും അവരെയെല്ലാം നിയമത്തിനു മുമ്പില്‍ എത്തിച്ചിട്ടുണ്ടെന്നും സര്‍ക്കാര്‍ വാദിച്ചു. കേസ്‌ അടുത്തയാഴ്‌ച പരിഗണിക്കും. സര്‍ക്കാര്‍ വൃത്തങ്ങളില്‍ സോളാര്‍ കേസിന്റെ കഥ കഴിഞ്ഞെന്നു തന്നെയാണ്‌ വിശ്വാസം.
ആഭ്യന്തരമന്ത്രി രമേശ്‌ ചെന്നിത്തല സോളാര്‍ കേസ്‌ മൂപ്പിക്കാന്‍ ശ്രമിച്ചിരുന്നെങ്കിലും അത്‌ വേണ്ടത്ര വിജയിച്ചില്ല. അന്വേഷണസംഘത്തോട്‌ ചില നിബന്ധനകള്‍ ആഭ്യന്തരമന്ത്രി പറഞ്ഞിരുന്നെങ്കിലും കേസ്‌ മുഖ്യനെതിരെ തിരിക്കേണ്ടതില്ലെന്ന്‌ ഉദ്യോഗസ്ഥര്‍ തീരുമാനിച്ചു. ആഭ്യന്തര സെക്രട്ടറിയും ഡിജിപിയും സോളാര്‍ വിവാദത്തില്‍ ആഭ്യന്തരമന്ത്രിയെക്കാള്‍ മുഖ്യമന്ത്രിക്കൊപ്പമാണ്‌ നിലകൊണ്ടത്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
