മതിയായ കാരണമില്ലാതെ ജോലിക്ക് ഹാജരാകാത്ത കെ.എസ്.ആര്‍.ടി.സി ഡ്രൈവര്‍മാര്‍ക്കും കണ്ടക്ടര്‍മാര്‍ക്കും ഇനി പണി കിട്ടും. തെക്കന്‍ ജില്ലകളില്‍ ജോലി ചെയ്യുന്നവരെ വടക്കോട്ടും തിരിച്ചാണെങ്കില്‍ തെക്കോട്ടും ഇത്തരക്കാരെ സ്ഥലം മാറ്റും. ജീവനക്കാര്‍ അനധികൃതമായി ജോലിക്കെത്താതെ സര്‍വീസ് മുടങ്ങിയാല്‍ കാരണക്കാരായവരെ വിദൂരസ്ഥലത്തേക്ക് സ്ഥലം മാറ്റണമെന്ന് കാണിച്ച് എം.ഡി എ. ഹേമചന്ദ്രന്‍ ഇന്നലെ ഉത്തരവിറക്കി. ആവശ്യത്തിലധികം ജീവനക്കാരുണ്ടെങ്കിലും മിക്ക ഡിപ്പോകളിലും ബസ് മുടങ്ങുന്നുണ്ട്. ബസ് പുറപ്പെടേണ്ട സമയത്ത് കണ്ടക്ടറും െ്രെഡവറും ഉണ്ടാകില്ല. ഇത്തരത്തിലെ ട്രിപ്പ് റദ്ദാക്കല്‍ വന്‍ നഷ്ടമാണുണ്ടാക്കുന്നത്. ഒരു ബസിന് എട്ടു ജീവനക്കാര്‍ വീതമുണ്ടെങ്കിലും ദിവസം 250 ബസുകള്‍വരെ ഇത്തരത്തില്‍ മുടങ്ങുന്നുണ്ട്. ജോലിക്കെത്തില്ലെന്ന കാര്യം മുന്‍കൂട്ടി അറിയിച്ചാല്‍ പകരം ജീവനക്കാരെ നിയോഗിക്കാനാകും. സമയത്ത് ജോലിക്ക് എത്താതിരിക്കുകയും പിന്നീട് ഒരു മെഡിക്കല്‍ സര്‍ട്ടിഫിക്കറ്റ് ഹാജരാക്കുകയും ചെയ്യുന്ന പ്രവണ വര്‍ദ്ധിച്ചുവരുകയാണെന്നും ഇത് അംഗീകരിക്കാനാവില്ലെന്നും എം.ഡി എ. ഹേമചന്ദ്രന്‍ ഉത്തരവില്‍ പറയുന്നു.

ജീവനക്കാരില്ലാത്തതിനാല്‍ മുടങ്ങുന്ന ബസുകളെക്കുറിച്ചുള്ള വിവരങ്ങള്‍ ഉച്ചയ്ക്ക് 12 മുമ്പ് ചീഫ് ഓഫീസില്‍ അറിയിക്കണം. എക്‌സിക്യൂട്ടിവ് ഡയറക്ടര്‍ ഓപ്പറേഷന്‍സ്, വിജിലന്‍സ് എക്‌സിക്യൂട്ടിവ് ഡയറക്ടര്‍ എന്നിവര്‍ക്കാണ് അന്വേഷണ ച്ചുമതല. തട്ടിക്കൂട്ട് മെഡിക്കല്‍ ലീവാണെന്ന് ബോദ്ധ്യമായാല്‍ അക്കാര്യം ഉടന്‍തന്നെ ഭരണവിഭാഗം മേധാവിക്ക് കൈമാറണം. ഇവരെ അന്നേദിവസം തന്നെ വിദൂരയൂണിറ്റുകളിലേക്ക് സ്ഥലംമാറ്റണം. ഇതിന്റെ റിപ്പോര്‍ട്ട് എം.ഡിക്ക് കൈമാറണമെന്നും നിര്‍ദ്ദേശമുണ്ട്. നിലവിലുള്ള നിര്‍ദ്ദേശങ്ങളാണ് വീണ്ടും പുതുക്കി നല്‍കിയിട്ടുള്ളത്.

ആവശ്യത്തിലധികം ജീവനക്കാരുള്ളപ്പോഴും ബസുകള്‍ മുടങ്ങുന്നത് ഗുരുതരമായ ക്രമക്കേടാണെന്ന് സ്ഥാപനത്തെക്കുറിച്ച് പഠിച്ച പ്രൊഫ.സുശീല്‍ഖയും സര്‍ക്കാരിന് റിപ്പോര്‍ട്ട് നല്‍കിയിരുന്നു. മറ്റു സംസ്ഥാനങ്ങള്‍ ബസുകളുടെ 95 ശതമാനവും വിനിയോഗിക്കുമ്പോള്‍ കെ.എസ്.ആര്‍.ടി.സി 81.46 ശതമാനം ബസുകളാണ് ഉപയോഗിക്കുന്നത്.