കേരളത്തില്‍ കനത്ത മഴ ലഭ്യമായിട്ടും വൈദ്യുതി ക്ഷാമം രൂക്ഷമാവുകയാണ്‌. കല്‍ക്കരിക്ഷാമം മൂലം കേന്ദ്രവിഹിതം കുറഞ്ഞതും ഛത്തീസ്‌ഗഡില്‍ നിന്നു വൈദ്യുതി എത്തിക്കാനുള്ള ഇടനാഴി ലഭിക്കാത്തതുംമൂലം വൈകിട്ട്‌ അപ്രഖ്യാപിത ലോഡ്‌ ഷെഡിങ്‌ ഏര്‍പ്പെടുത്തി. കൂടംകുളത്ത്‌ അറ്റകുറ്റപ്പണി നടക്കുന്നതിനാല്‍ അവിടെ നിന്നുള്ള 150 മെഗാവാട്ടും ഏതാനും ദിവസമായി ലഭിക്കുന്നില്ല. കഴിഞ്ഞ രണ്ടുദിവസങ്ങളില്‍ രണ്ടു ഫീഡറുകളില്‍ 15 മിനിറ്റ്‌ വീതമാണു വൈദ്യുതി മുടങ്ങിയത്‌.
കനത്ത മഴയെത്തുടര്‍ന്നു ഡാമുകളില്‍ സംഭരണശേഷിയുടെ 50 ശതമാനത്തോളം നിറഞ്ഞിട്ടുണ്ട്‌. വൈകിട്ടത്തെ വൈദ്യുതിക്ഷാമം മുന്നില്‍ക്കണ്ടു ജലവൈദ്യുതനിലയങ്ങളില്‍ നിന്നുള്ള ഉല്‍പാദനം പരമാവധിയാക്കി. ഇന്നലെ 26 ദശലക്ഷം യൂണിറ്റ്‌ വൈദ്യുതി കേരളത്തില്‍ ഉല്‍പാദിപ്പിച്ചു. 27 ദശലക്ഷം യൂണിറ്റ്‌ വൈദ്യുതിയാണു പുറത്തുനിന്നു കൊണ്ടുവന്നത്‌. എത്ര മഴ കിട്ടിയാലും കേരളത്തില്‍ ഉല്‍പാദിപ്പിക്കാവുന്ന വൈദ്യുതിക്കു പരിധിയുണ്ടെന്നു കെഎസ്‌ഇബി ചെയര്‍മാന്‍ എം. ശിവശങ്കര്‍ പറഞ്ഞു. സംസ്‌ഥാനത്തിന്റെ ആവശ്യം പൂര്‍ണമായി നിറവേറണമെങ്കില്‍ പുതിയ ഉല്‍പാദനകേന്ദ്രങ്ങള്‍ തുടങ്ങുകയോ മറ്റു സ്‌ഥലങ്ങളില്‍ നിന്ന്‌ എത്തിക്കാന്‍ സംവിധാനമൊരുക്കുകയോ വേണമെന്നും അദ്ദേഹം പറഞ്ഞു.
ഉപയോഗം ഏറ്റവും കൂടുതലുള്ള വൈകുന്നേരങ്ങളില്‍ ശരാശരി 2900 മെഗാവാട്ട്‌ വൈദ്യുതിയാണു കേരളത്തിന്‌ ആവശ്യം. കഴിഞ്ഞ ദിവസങ്ങളില്‍ 2650 മെഗാവാട്ട്‌ മാത്രമാണു കിട്ടിയത്‌.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha