സംസ്ഥാനത്തെ കെഎസ്‌ആര്‍ടിസി പൂട്ടണമോ വേണ്ടയോ എന്നു ജനങ്ങള്‍ തീരുമാനിക്കട്ടെയെന്നു ഗതാഗതമന്ത്രി തിരുവഞ്ചൂര്‍ രാധാകൃഷ്‌ണന്‍ . കെഎസ്‌ആര്‍ടിസി പൂട്ടുന്നതാണ്‌ നല്ലതെന്ന ഹൈക്കോടതി പരാമര്‍ശത്തെക്കുറിച്ചുള്ള മാധ്യമ പ്രവര്‍ത്തകരുടെ ചോദ്യങ്ങള്‍ക്കു മറുപടി പറയുകയായിരുന്നു മന്ത്രി. കെഎസ്ആര്‍ടിസിയില്‍ പുനരുദ്ധാരണ പാക്കേജ് നടന്നേ മതിയാകൂ. പ്രവര്‍ത്തനക്ഷമത കൂട്ടുകയാണ് ലക്ഷ്യം. കെഎസ്ആര്‍ടിസിയില്‍ നടപ്പാക്കാന്‍ പോകുന്ന പദ്ധതികളെക്കുറിച്ച് കോടതിയെ അറിയിക്കും. കോടതിയുടെ അനുമതി ലഭിച്ചാലുടന്‍ 2700 രൂപ വരെയുള്ള പെന്‍ഷന്‍ നല്‍കുമെന്നും മന്ത്രി പറഞ്ഞു. കെഎസ്‌ആര്‍ടിസി വിവിധ നികുതികള്‍ അടക്കം പ്രതിവര്‍ഷം 209 കോടി രൂപ സര്‍ക്കാരിനു നല്‍കുന്നുണ്ട്‌. യാത്രാ സൗജന്യം ഉള്‍പ്പെടെയുള്ള സാമൂഹിക പ്രതിബദ്ധതാ പദ്ധതികള്‍ നടപ്പാക്കിയതിനു കഴിഞ്ഞ ഏഴു വര്‍ഷത്തിനകം 1616 കോടി രൂപയാണു സര്‍ക്കാര്‍ കെഎസ്‌ആര്‍ടിസിക്കു നല്‍കാനുള്ളത്‌. 

ലാഭകരമല്ലാത്ത റൂട്ടുകള്‍ ഏറ്റെടുത്തു സര്‍വീസ്‌ നടത്തിയതിന്റെ പേരില്‍ 427 കോടി രൂപയുടെ നഷ്ടവും പ്രതിവര്‍ഷം കോര്‍പറേഷന്‍ വഹിക്കുന്നുണ്ട്‌. എന്നാല്‍, കെഎസ്‌ആര്‍ടിസിക്ക്‌ അര്‍ഹതപ്പെട്ട തുക പോലും സര്‍ക്കാരില്‍ നിന്നു ലഭിക്കുന്നില്ല.
കെഎസ്‌ആര്‍ടിസി പുനഃസംഘടനയ്‌ക്കായി പ്രതിവര്‍ഷം 240 കോടി രൂപ വീതം നല്‍കണമെന്ന ആവശ്യമാണ്‌ ഉയര്‍ത്തിയിട്ടുള്ളത്‌. കെഎസ്‌ആര്‍ടിസിയുടെ വരുമാനത്തിന്റെ 25 ശതമാനം തുക പെന്‍ഷന്‍ പദ്ധതിക്കായി നീക്കിവയ്‌ക്കും.
യാത്രക്കാരനു യാത്രയ്‌ക്കിടയില്‍ പരിക്കേറ്റാല്‍ 3,000 രൂപ വരെ നഷ്ടപരിഹാരം നല്‍കുന്നതിന്‌ ഉള്‍പ്പെടെയായി ടിക്കറ്റ്‌ നിരക്കിനൊപ്പം സെസ്‌ ഇനത്തില്‍ തുക ഈടാക്കാന്‍ പുനരുദ്ധാരണ പാക്കേജില്‍ വ്യവസ്ഥയുണ്ട്‌. 15 രൂപ വരെയുള്ള ടിക്കറ്റിന്‌ ഒരു രൂപയും 25 രൂപയ്‌ക്ക്‌ രണ്ടു രൂപയും 100 രൂപയുടെ ടിക്കറ്റിന്‌ അഞ്ചു രൂപയുമാണു സെസ്‌ ഇനത്തില്‍ ഈടാക്കാനാണു നിര്‍ദേശത്തിലുള്ളത്‌.ഈ വര്‍ഷം ഇതുവരെ സാമൂഹിക പ്രതിബദ്ധതാ പദ്ധതികള്‍ വഴി 323.39 കോടി രൂപയുടെ സാമ്പത്തിക ബാധ്യത കോര്‍പറേഷനുണ്ടായി. 2012-13 ല്‍ 359.4 കോടിയും 2011-12 ല്‍ 353.02 കോടിയും സര്‍ക്കാര്‍ നല്‍കാനുണ്ട്‌.. 2010- 11ല്‍ 285.88 കോടി രൂപയും 2009- 10ല്‍ 134 കോടിയും 2008- 09ല്‍ 106 കോടിയും 2007- 08ല്‍ 101.5 കോടി രൂപയുമാണു നല്‍കാനുള്ളത്‌. ഡീസല്‍ വിലയുടെ 20 ശതമാനം നികുതിയാണു സംസ്ഥാനത്തിനു ലഭിക്കുന്നത്‌. വാഹന നികുതി ഇനത്തില്‍ 12 കോടി രൂപയും വില്‍പന നികുതി ഇനത്തില്‍ 17 കോടി രൂപയും ഉള്‍പ്പെടെയാണ്‌ 209 കോടി പ്രതിവര്‍ഷം സംസ്ഥാന ഖജനാവിനു നല്‍കുന്നത്‌.
കെഎസ്‌ആര്‍ടിസി പെന്‍ഷന്‍ ബാധ്യത ഉള്‍പ്പെടെയുള്ള കാര്യങ്ങളില്‍ എത്രയും വേഗം നടപടി സ്വീകരിക്കുമെന്നും മന്ത്രി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha