മിനിമം ബാലന്സ് കൊള്ള മനുഷ്യാവകാശ കമ്മിഷന് ഇടപെടുന്നു
അക്കൗണ്ടില് മിനിമം ബാലന്സ് ഇല്ലാത്തതിന്റെ പേരിലെ കൊള്ളകളുടെ പരാതി ഉയരുന്നു. പെന്ഷന്കാരുടെ ഉള്പ്പെടെ പണവും ബാങ്കുകള് പിടിച്ചുപറിക്കുന്നെന്ന പരാതി വ്യാപകം. പെന്ഷന് അക്കൗണ്ടാണെന്ന് അറിയിച്ചിട്ടില്ലെന്ന സാങ്കേതികത്വമാണു ന്യായീകരണം. ഓരോ മാസവും ബാങ്കിങ് ഓംബുഡ്സ്മാന്റെ കേരള ഓഫീസിലെത്തുന്ന മുന്നൂറോളം പരാതികളിലേറെയും പെന്ഷന്കാരുടേത്.
മിനിമം ബാലന്സിന്റെ പേരില് പണം നഷ്ടമാകുന്നവരുടെ കേസുകള് അനുഭാവപൂര്വം പരിഗണിക്കുന്നുണ്ടെന്നും ചട്ടംലംഘിച്ചു പിഴയീടാക്കുന്നതു കണ്ടെത്തിയാല് പണം തിരികെ നല്കാന് ബാങ്ക് മാനേജര്മാര്ക്ക് കര്ശനനിര്ദേശം നല്കാറുണ്ടെന്നും തിരുവനന്തപുരത്തുള്ള ഓംബുഡ്സ്മാന്റെ ഓഫീസ് അറിയിച്ചു.
പിന്നാക്ക വിദ്യാര്ഥിനിയുടെ സ്കോളര്ഷിപ്പും കയര്ത്തൊഴിലാളി സ്ത്രീയുടെ ക്ഷേമപെന്ഷനും സ്വന്തമാക്കിയ സ്റ്റേറ്റ് ബാങ്ക് ഓഫ് ഇന്ത്യക്കെതിരേ സംസ്ഥാന മനുഷ്യാവകാശ കമ്മിഷന് സ്വമേധയാ കേസെടുക്കുകയും ചെയ്തു. ക്രൂരമായ മനുഷ്യാവകാശ ലംഘനമാണ് ഇതെന്നു നിരീക്ഷിച്ച കമ്മിഷന് എസ്.ബി.ഐ. ജനറല് മാനേജരോടും ആലപ്പുഴ ശാഖാ മാനേജരോടും കമ്മിഷന് ആക്ടിങ് അധ്യക്ഷന് പി. മോഹനദാസ് വിശദീകരണം ആവശ്യപ്പെട്ടു.
ആലപ്പുഴ ഇരവുകാട് സ്വദേശിനിയായ ആമിന എന്ന വിദ്യാര്ഥിനിക്ക് പിന്നാക്ക സ്കോളര്ഷിപ്പായി സംസ്ഥാന സര്ക്കാര് നല്കിയ 1000 രൂപയാണ് എസ്.ബി.ഐ. ആലപ്പുഴ ശാഖ കൊണ്ടുപോയത്. ആമിനയ്ക്ക് ഒരു രൂപ പോലും കിട്ടിയില്ല. കയര്ത്തൊഴിലാളിയായ ആലപ്പുഴ ആപ്പൂര് ലക്ഷംവീട് കോളനിയിലെ ഹമീദാ ബീവിയുടെ ക്ഷേമപെന്ഷനില്നിന്നു ബാങ്ക് കൊണ്ടുപോയത് 3050 രൂപയാണ്. കുടിശികയടക്കം ബാങ്കിലെത്തിയ 3300 രൂപയില്നിന്ന് ഇവര്ക്കു കിട്ടിയത് വെറും 250 രൂപ! ആനുകൂല്യങ്ങള് ബാങ്ക് വഴിയാക്കിയതിന്റെ തിക്തഫലം അനുഭവിക്കുന്നത് പാവപ്പെട്ടവരാണെന്നു കമ്മിഷന് നിരീക്ഷിച്ചു.
മിനിമം ബാലന്സില്ലാത്ത അക്കൗണ്ടുകളില്നിന്നു പണം പിടിക്കുന്നത് തടയാന് റിസര്വ് ബാങ്ക് ഓഫ് ഇന്ത്യക്കു കഴിയില്ലെങ്കിലും ചട്ടം ലംഘിക്കപ്പെട്ടാല് കര്ശന നടപടി സ്വീകരിക്കാന് കഴിയുമെന്നും ഓംബുഡ്സ്മാന്റെ ഓഫീസ് അറിയിച്ചു. പരാതികള് ബാങ്ക് മാനേജര്മാര്ക്കും നല്കാം. പരാതിയില് കഴമ്പുണ്ടെങ്കില്, നഷ്ടമായ പണം അക്കൗണ്ട് ഉടമയ്ക്കു മടക്കിക്കൊടുക്കാന് ബാങ്ക് മാനേജര്മാര്ക്ക് അധികാരമുണ്ടെങ്കിലും ഇക്കാര്യത്തില് ഇടപാടുകാരുടെ അറിവില്ലായ്മ ചൂഷണം ചെയ്പ്പെടുകയായണ്.
https://www.facebook.com/Malayalivartha
