സംസ്ഥാന സ്കൂള് കലോത്സവത്തിന് തിരിതെളിഞ്ഞു; സ്പീക്കര് പി. ശ്രീരാമകൃഷ്ണന് ഉദ്ഘാടനം ചെയ്തു
സ്കൂള് കലോത്സവത്തിന് തിരി തെളിഞ്ഞു. പാറമേക്കാവ്, തിരുവമ്പാടി വേല മഹോത്സവങ്ങളുടെ മേള, താള സംഗീത നിറവില് പൂത്തുലഞ്ഞ് നില്ക്കുന്ന തൃശൂര് പൂരപ്പറമ്പില് ഒന്നാം വേദിയായ 'നീര്മാതള'ത്തില് രാവിലെ 10ന് സ്പീക്കര് പി. ശ്രീരാമകൃഷ്ണന് ഉദ്ഘാടനം ചെയ്തു. മുഖ്യമന്ത്രി പിണായി വിജയന് ചടങ്ങിന് എത്താന് സാധിക്കാത്തതിനാലാണ് സ്പീക്കര് ഉദ്ഘാടനം ചെയ്യുന്നത്.
പതിവുള്ള ഘോഷയാത്രയില്ലാതെയാണ് ഇത്തവണ കലോല്സവത്തിന് അരങ്ങുണരുന്നത്. രാവിലെ 8.45ന് സൂര്യ കൃഷ്ണമൂര്ത്തിയുടെ മേല്നോട്ടത്തില് തനത് കലകള് ചേര്ത്തൊരുക്കിയ ദൃശ്യ വിസ്മയത്തോടെയാണ് മേളത്ത് തുടക്കം കുറിച്ചത്. 24ാം വേദിയായ 'നിശാഗന്ധി'യില് (തെക്കേ ഗോപുരനട) സാംസ്കാരിക സായാഹ്നമാണ് നടക്കുക.
വെള്ളിയാഴ്ച രാവിലെ 9.30ന് പൊതു വിദ്യാഭ്യാസ ഡയറക്ടര് കെ.വി. മോഹന് കുമാര് 'നീര്മാതള'ത്തില് പതാക ഉയര്ത്തി. മോഹിനിയാട്ടം, ഭരതനാട്യം, ഒപ്പന എന്നീ ഗ്ലാമര് ഇനങ്ങള് അടക്കം അമ്പതോളം ഇനങ്ങളില് ശനിയാഴ്ച മത്സരം നടക്കും. മൊത്തം 231 ഇനങ്ങളിലാണ് അഞ്ച് ദിവസങ്ങളിലായി നടക്കുന്ന കലോത്സവത്തില് മത്സരമുണ്ടാവുക. അപ്പീല് പ്രവാഹത്തിന് കോടതി വഴി സര്ക്കാര് തടയണ കെട്ടി എന്നതാണ് ഇക്കുറി ഏറ്റവും ശ്രദ്ധേയം. സ്റ്റേജ്, സ്റ്റേജിതര ഇനങ്ങള് ഒന്നിച്ച് തുടങ്ങുന്നുവെന്നതാണ് മറ്റൊരു പ്രത്യേകത.
കലോത്സവ പ്രഖ്യാപനവുമായി നഗരത്തില് വിളംബര ജാഥയും നടന്നു. ഉദ്ഘാടനം സമ്മേളനത്തില് മന്ത്രി സി. രവീന്ദ്രനാഥ് അധ്യക്ഷത വഹിക്കും. 58 അധ്യാപകര് പങ്കെടുക്കുന്ന സ്വാഗതഗാനവും അതിന്റെ ദൃശ്യാവിഷ്കാരവും അരങ്ങേറും. വൈകീട്ട് നാലിന് നടക്കുന്ന സമാപന സമ്മേളനം പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യും.
https://www.facebook.com/Malayalivartha
