എ.കെ.ജിക്കെതിരെ വി.ടി ബല്‍റാം എം.എല്‍.എ ഉന്നയിച്ച മോശംപരാമര്‍ശങ്ങള്‍ക്ക് അടിസ്ഥാനമായ ആരോപണങ്ങള്‍ പൊളിയുന്നു. 1940ല്‍ എ.കെ.ജി സുശീലയുടെ വീട്ടില്‍ ഒളിവില്‍ കഴിഞ്ഞെന്നാണ് ബല്‍റാം പറയുന്നത്. ആ സമയം എ.കെ.ജി കേരളത്തില്‍ ഉണ്ടായിരുന്നില്ല . തമിഴ് നാട്ടിലെ തൃശ്‌നാപ്പള്ളിയിലായിരുന്നു. അവിടെ ഒളിവിലിരുന്ന് റെയില്‍വെ തൊഴിലാളികളെ സംഘടിപ്പിക്കുകയായിരുന്നു. ഒരു വര്‍ഷം തമിഴ്‌നാട്ടിലെ ഒളിവു ജീവിതത്തിന് ശേഷം 1941 മാര്‍ച്ച് 24ന് തൃശ്‌നാപ്പള്ളിയില്‍ അറസ്റ്റ് ചെയപ്പെട്ട അദ്ദേഹത്തെ വെല്ലൂര്‍ ജയിലിലാണ് തടവില്‍ പാര്‍പ്പിച്ചത്. ഇതിനെല്ലാം രേഖകളുള്ളതാണ്.

1941 സെപ്റ്റംബര്‍ 25 അര്‍ദ്ധരാത്രിയില്‍ എ കെ ജിയും കൂട്ടരും വല്ലൂര്‍ ജയിലിലെ മതില്‍ തുരന്ന് തടവ്ചാടി ഉത്തരേന്ത്യയിലേക്ക് രക്ഷപെട്ടു. നേരെ ബോംബെയിലേക്കും അവിടന്ന് കാണ്‍പൂരിലേക്കും തുടര്‍ന്ന് കല്‍ക്കട്ടയിലേക്ക് കടന്നു. കല്‍ക്കട്ടയിലെ ഇഷ്ടിക ചൂളയില്‍ ദുരിതപൂര്‍ണ്ണമായ ജോലിയെക്കുറിച്ചും അവിടെ തൊഴിലാളികളെ സംഘടിപ്പിച്ചതിനെക്കുറിച്ചും എ കെ ജി വിശദമായി എഴുതിയട്ടുണ്ട്. വര്‍ഷങ്ങള്‍ നീണ്ട ഉത്തരേന്ത്യയിലെ ഒളിവ് ജീവിതം അവസാനിപ്പിച്ച് കേരളത്തിലേക്ക് സഖാവ് വരുന്നത് 1946 ലെ തിരഞ്ഞെടുപ്പില്‍ കോഴിക്കോട് നിന്ന് മല്‍സരിക്കാനായിരുന്നു . ആ കാലഘട്ടത്തിലായിരുന്നു സഖാവ് സുശീലയുടെ വീട്ടില്‍ ഒളിവില്‍ താമസിച്ചത് . മൂന്ന് മാസത്തോളം സുശീലയുടെ വീട്ടില്‍ ഒളിവില്‍ താമസിച്ചിരുന്നു . അന്ന് പതിനാറ് വയസുണ്ടായിരുന്ന സുശീല കോളജ് വിദ്യാര്‍ത്ഥിനി ആയിരുന്നു .

അന്നത്തെ കാലത്തെ ശരാശരി വിവാഹപ്രായം പതിനഞ്ച് പതുനാറു വയസായിരുന്നു. 1946 ല്‍ ഒളിവ് ജീവിതം കഴിഞ്ഞ് പുറത്ത് വന്ന എ കെ ജി അറസ്റ്റിലായി. സ്വാതന്ത്ര്യം കിട്ടുമ്പോള്‍ പോലും അദ്ദേഹം ജയിലില്‍ അടക്കപ്പെടുകയുമായിരുന്നു . 1947 ല്‍ കോയമ്പത്തൂര്‍ ജയിലില്‍ കിടന്ന എ കെ ജി യെ സുശീല സന്ദര്‍ശ്ശിക്കുകയും അവിടെ വെച്ച് അവര്‍ വിവാഹിതരാകാന്‍ തീരുമാനിക്കുകയും ചെയ്തു. പുന്നപ്ര വയലാറിന്റെ സമര പാരംമ്പര്യമുള്ള കുടുംബത്തില്‍ നിന്ന് വരുന്ന സുശീല അക്കാലത്ത് കമ്യുണിസ്റ്റ് പാര്‍ട്ടി പ്രവര്‍ത്തകയായിരുന്നു .1948ല്‍ പതിനെട്ട് വയസില്‍ കമ്യുണിസ്റ്റ് പാര്‍ട്ടിയുടെ മെംബര്‍ഷിപ്പ് സുശീല എടുത്തിരുന്നു . സംഘടനാ പ്രവര്‍ത്തനം കാരണം കോളജുകളില്‍ നിന്ന് പുറത്താക്കപ്പെട്ട സുശീല നാലു കോളജുകളില്‍ നിന്നാണു പഠനം പൂര്‍ത്തിയാക്കിയത് . 23ാംവയസിലാണ് പാവങ്ങളുടെ പടത്തലവനായ എ.കെ.ജിയുടെ ഭാര്യ ആയത്.